Nokkuð landshlutaskipt

Íbúar á Suður- og Vesturlandi virðast ánægðir með júlímánuð, enda sólin skinið löngum stundum og hiti verið í besta lagi. Ekki er alveg sömu sögu að segja um landið norðanvert. Ekki hefur þó verið illviðrasamt þar um slóðir - en oft skýjað og heldur svalt - alla vega sé miðað við hitafar á þessari öld. 

Þetta sést vel á myndinni - en hún sýnir meðalhitavik fyrstu 29 daga mánaðarins á fjölmörgum veðurstöðvum miðað við sömu daga síðustu tíu ár (2006 til 2015).

Rauðar tölur tákna að hiti hafi verið ofan tíu ára meðallagsins - en bláar að hann hafi verið undir því. Í ljós kemur að strandsvæði á Austurlandi hafa líka verið í meðallagi og svæðið þar sem hiti hefur verið ofan meðallags nær norður fyrir Breiðafjörð. Fremur kalt hefur verið inn til landsins fyrir norðan og austan - og sömuleiðis á Ströndum - en mest er neikvæða vikið í byggð á Gjögurflugvelli (og enn meira reyndar á Brúarjökli). Mest eru jákvæðu vikin á Kambanesi og í Papey.  

En þetta eru svosem ekki mjög háar tölur - lesendur geta rifjað upp samskonar kort sem birtist á hungurdiskum í fyrra og sýndi hita í köldum júlí sem þá var.

En - þrátt fyrir að svalasvipur sé á allstórum hluta landsins hyrfi hann að miklu leyti ef vikareikningarnir miðuðu við 1961 til 1990. Við skulum því líta á kort þar sem sjá má samanburð júlíhita þessara tveggja tímabila.

Júlímánuðir síðustu 10 ára hafa verið hlýrri en venjan var á fyrra skeiðinu. Mestu munar vestanlands, en minna fyrir austan. Sú stöð sem virðist hafa hlýnað mest eru Þingvellir - en höfum í huga að þar hafa verið verulegar tilfærslur á mælingum - og ekki alveg víst að meðalalið 1961 til 1990 sé alveg samanburðarhæft við síðari mælingarnar - en það munar þó litlu ef einhverju. 

Minnstur er munurinn á Héraði, Egilsstöðum og Hallormsstað og einnig á Fagurhólsmýri. Ástæðan er líklega sú að sumarkuldarnir á 9. áratugnum sem mjög svo plöguðu íbúa Suður- og Vesturlands voru mun vægari eystra og sömuleiðis fengu íbúar Norður- og Austurlands fáein mjög góð sumur á 8. áratugnum - sumur sem voru í daufara lagi um landið suðvestanvert. 

Það er nefnilega nokkur áratugamunur á veðri landshlutanna. 

Júlílandsmeðaltal áranna 2006 til 2015 er 1,0 stigi hærra en 1961-1990.

Hæð yfir Grænlandi

Undanfarna daga hefur hita verið mjög misskipt á landinu - og þannig verður það víst áfram - nema hvað allar tölur verða lægri en verið hefur að undanförnu. Hæðin yfir Grænlandi er í nokkrum vexti til okkar stefnir öllu kaldara loft.

Kortið sýnir tillögu evrópureiknimiðstöðvarinnar um sjávarmálsþrýsting, hita í 850hPa-fletinum og úrkomu síðdegis á laugardag, 30.júlí og má sjá ákveðna norðaustanátt hér á landi. Hiti er um eða rétt undir frostmarki í 850 hPa-fletinu (í um 1500 metra hæð) um allt norðanvert landið. 

Sæmilega hlýtt ætti þó að vera í sólinni á Suðurlandi - en vestanlands verður víða næðingur og best veður þar sunnan undir vegg - eða í góðu skjóli. Norðanlands verður væntanlega þungbúið - en ekki veruleg úrkoma (sé að marka spána) - annars er erfitt um það að segja.

Sé rýnt í tölur á kortinu má sjá 1040 hPa við hæðina - þetta er reyndar fullmikið í lagt - reiknilíkön vilja gjarnan keyra upp þrýsting við sjávarmál þar sem ekkert sjávarmál er að finna - eins og yfir Grænlandsjökli - einkum í kuldapollum. 

Því hæðin er reyndar ekki öll þar sem hún er séð - yfir henni er dálítil lægð í háloftunum - kuldapollur. Þetta sést vel á kortinu að neðan.

Hér má sjá hæð 500 hPa-flatarins (heildregnar línur) og þykktina. Langt er á milli jafnhæðarlína - vestanvindabeltið í sinni veikustu sumarstöðu á norðurhveli. Áttin er mun norðvestlægari heldur en á sjávarmálskortinu. Regla segir að snúist vindur á móti sól með hæð sæki kalt loft að. Það má alveg trúa þessari reglu - en þó verður að hafa í huga að við erum hér að stökkva upp um heila 5 km í einum rykk - og stöku sinnum (alloft) er eitthvað á milli sem flækir málin. - Förum ekki að ganga fyrir björg í ályktunum byggðum á nær engum athugunum. 

Við sjáum að mörkin á milli gulu og grænu litanna liggur um Ísland - eins og reyndar að meðaltali í júlí - það þýðir að á laugardaginn verður ekki orðið sérlega kalt miðað við meðaltal - bara kaldara en verið hefur að undanförnu, og við finnum auðvitað fyrir því. - En svo á græni liturinn að ná til landsins alls og dekkri grænn litur (kaldari) að fara suður á mitt land - um 3 stiga hitabil er á milli lita.

En hvað um það. Hlýtt loft er fyrir sunnan Grænland. Það fer reyndar aðallega til austurs fyrir sunnan land en kemur þó í veg fyrir að kuldapollurinn ryðjist yfir okkur um helgina og fyrri hluta næstu viku af fullum þunga. Hann hörfar því að nokkru aftur - en gæti svo snúið til baka enn síðar. Alla vega er ekki gert ráð fyrir neinum hlýindum að kalla næstu viku til tíu daga - en munum eins og alltaf að spár eru oft vitlausar. 

Fréttir af Bláabletti

Neikvæðu sjávarhitavikin fyrir sunnan land, þau sem kölluð hafa verið „blái bletturinn“, eru enn á sínum stað - en úr þeim hefur samt talsvert dregið. 

Kortið er úr ranni evrópureiknimiðstöðvarinnar og Litakvarðinn sýnir vik hita frá meðallagi síðustu 20 ára. Neikvæðu vikin fyrir sunnan land eru hér harla lítil - en mikil jákvæð vik (þar sem sjávarhiti er yfir meðallagi) eru nær alls staðar með ströndum fram. - Ekki þó mikið að marka þau á hefðbundnum hafíssvæðum - meðalhiti er þar illa skilgreindur.

En hér er bara um yfirborðshita að ræða - um leið og vindar fara að blása að ráði síðla sumars og í haust kemur hið sanna ástand í ljós - hvað sem það nú er. Líklega kemur þá í ljós að sum hlýju svæðanna eru aðeins svona hlý í yfirborði - og vel má vera að kuldinn veturna 2014 og 2015, sá sem bjó bláablett til, leynist enn undir yfirborðinu þannig að hann birtist aftur og verði enn ríkjandi á svæðinu í vetur.

Ritstjóri hungurdiska yrði alla vega undrandi ef í ljós kæmi að hann sé horfinn - svo er spurning hvað næsti vetur gerir. Hvaða staða verður á vestanvindabeltinu?

Lofthiti, sjávarhiti

Hér við land er sjávarhiti að meðaltali hærri en lofthiti mestallt árið. Að sjálfsögðu bregður mjög út af einstaka daga og um skamma hríð yfir hásumarið er sjórinn við landið víðast hvar kaldari en loftið yfir honum og talsvert kaldari heldur en síðdegishiti inni í sveitum. Þetta kaldsjávartímabil er þó mislangt eftir landshlutum auk þess sem breytileiki er nokkur frá ári til árs.

Í síðustu pistlum var lítillega fjallað um langtímabreytingar sjávarhita hér við land. Nú skulum við kanna hvernig sjávarhiti og lofthiti hafa fylgst að við Norðurland síðan um 1880.

Fyrst er mynd sem sýnir ársmeðalhita í Grímsey aftur til 1874. 

Eins og venjulega sýnir lárétti ásinn árin, en sá lóðrétti hitann. Nærri 6 stiga munur er á meðalhita kaldasta og hlýjasta ársins og sé leitni reiknuð kemur í ljós að ársmeðalhiti í Grímsey virðist hafa hækkað um nærri 2 stig á tímabilinu. 

Breytileikinn á 19. öld er eftirtektarverður og sömuleiðis virðist greinilegt að breytileiki frá ári til árs er mun meiri á köldum heldur en hlýjum skeiðum. 

Eins og fram kom í fyrri pistli hefur sjávarhitinn ekki hækkað alveg jafnmikið. Síðari myndin sýnir mismun sjávarhita fyrir Norðurlandi og ársmeðalhita í Grímsey. 

Það er eftirtektarvert að munur á sjávar- og lofthita hefur farið minnkandi - hefur að jafnaði minnkað í kringum 0,5 stig. Ársmeðaltal sjávarhitans er alltaf hærra en lofthitans - hið ofurhlýja ár 2014 munaði þó ekki nema 0,3 stigum. 

Af þessu virðist mega ráða að sjórinn mildar mjög veðurfar hér á landi - og ekki síst á kuldaskeiðum. Trúlega hefur það alltaf verið þannig. En við getum líka farið að velta okkur upp úr fleiru. - Kuldi á sér fleiri en eina ástæðu. Við gætum gróflega talað um þrjár tegundir - ekki þó alveg ótengdar - (i) almenna kulda, (ii) norðanáttarkulda, og (iii) hafískulda. Fjallað hefur verið um kuldategundir þessar áður á hungurdiskum - og við teygjum ekki lopann frekar í þessum pistli.

Svo er það framtíðin? Ekkert vitum við um hana frekar en venjulega, en yrði það ekki að teljast töluverð veðurfarsbreyting ef sjórinn færi að halda hitanum á Íslandi niðri á ársgrundvelli (eins og við borð lá í Grímsey 2014)? Hvers konar veðurlag yrði það eiginlega? 

Sjávarhiti við Suðvesturland (í gegnum tíðina)

Upplýsingar um sjávarhita við Suðvesturland eru enn götóttari en fyrir norðan. Þó er til allgóð röð frá Vestmannaeyjum og nær hún yfir tímabilið 1878 til 1964. Aftur var mælt í Vestmannaeyjum frá 1998 - að minnsta kosti til 2010 - en ritstjóri hungurdiska hefur ekki séð nýrri tölur þaðan. Einnig var alllengi mælt í Grindavík og mætti e.t.v. með splæsingum ná saman eins konar suðurlandsröð svipað og þeirri norðlensku. 

Bláir ferlar sýna mælingar í Vestmannaeyjum, en grænir mælingar úr Grindavík. Atburðir falla nokkuð vel saman. Nokkru kaldara er lengst af í Grindavík - þar gætir landáhrifa meira heldur en í Vestmannaeyjum. Engar mælingar voru í Vestmannaeyjum á kuldaskeiðinu á síðari hluta 20. aldar, en Grindavíkurmælingarnar sýna vel hina míklu hlýnun sem átti sér stað um aldamótin síðustu - rétt eins og fyrir norðan. Hér vantar meðaltöl fyrir 2011 til 2015 - spurning hvað þá hefur gerst?

Á kalda tímanum fyrir 1920 eru sveiflur frá ári til árs ekki mjög miklar í Vestmannaeyjum - miklu, miklu minni heldur en fyrir norðan (sjá pistil gærdagsins) - en það vekur samt athygli að sveifla 10-ára meðaltala kaldra og hlýrra skeiða er samt ámóta mikil á báðum hafsvæðum, nærri 1,5 stig. 

Fjögur ár, 1885 til 1888 (og reyndar 1892 líka), skera sig mjög úr fyrir kulda sakir í sjó við Vestmannaeyjar. Þetta virðast vera ár hámarksútbreiðslu kaldsjávar við Ísland. Í júní 1888 fylti ís höfnina í Vestmannaeyjum. 

Myndin hér að neðan hafur reyndar sést á hungurdiskum áður - 

Sjávarhiti við Norðurland (í gegnum tíðina)

Það er ekkert sérlega auðvelt að mæla sjávarhita við strendur landsins á áreiðanlegan hátt. Það hefur samt verið reynt - en eyður eru margar og óþægilegar í gagnaröðunum. Einna skást langra raða er talin gagnaröð sem fyrir 10 árum var soðin saman úr mælingum á norðlenskum veðurstöðvum og var fjallað um í grein í tímaritinu Journal of Climate (sjá tilvísun neðst í pistlinum). Fleira má lesa um sjávarhitamælingar gerðar við ströndina hér á landi í ritgerð ritstjóra hungurdiska frá árinu 2003. Sú er aðgengileg á vef Veðurstofunnar - og var gerð hennar ritstjóranum umtalsverð heilsubót. 

En mælingar hafa haldið áfram í Grímsey og við skulum nú líta á nýja mynd sem byggir á gögnum fengnum úr greininni áðurnefndu - og nýrri mælingum.

Lárétti ásinn sýnir tímabil mælinganna - síðasta árið er 2015. Lóðrétti ásinn sýnir ársmeðalsjávarhita (þrep) ásamt 10- og 30-ára keðjum. Við könnumst við flesta meginviðburði - tíminn fyrir 1920 er gríðarlega breytilegur - að nokkru má ráða hafísmagn á hitanum. 

Hlýindin á árunum 1925 til 1964 er kannski tvískipt. Mestu hlýindin eru á árunum frá 1927 til 1941, en síðan slaknar aðeins á. Hlýtt er þó fram til 1964, en þá kólnaði mjög snögglega. Kuldinn varð þó aldrei eins mikill og mest varð á kalda tímanum fyrir 1920. 

Árið 1995 var síðasta kalda árið í sjónum og eftir það fór hlýnandi, hlýjast varð 2003 og 2004. Ekkert lát er að sjá á hlýindunum - en þó er varla hægt að reikna með að þau haldist endalaust. Gríðarlegur hávaði er nú á norðurslóðum, það gnístir í íshafinu og illmögulegt að segja fyrir um hvaða skilaboð munu berast þaðan á næstu árum. 

Hlýindin sem fyrtu 4 ár mælinganna sýna (1875 til 1878, lengst til vinstri á myndinni) vekja auðvitað nokkra athygli - síðan er eyða - sjávarhitamælirinn brotnaði og langan tíma tók að fá nýjan frá Danmörku. Kalt var í sjó við Austurland þessi ár og freistandi að telja gamla mælinn í Grímsey einfaldlega vitlausan. En að henda mælingum bara af því að þær falla ekki inn í eitthvað sem búið er að ákveða er varla gott. 

Við lítum e.t.v. á fleiri sjávarhitalínurit síðar.

Greinin sem vísað er í:

Hanna, E., Jónsson T., Ólafsson, J. and Valdimarsson (2006): H. Icelandic coastal sea-surface temperature records constructed: putting the pulse on air-sea-climate interactions in the northern North Atlantic. Part I: Comparison with HadISST1 open ocean surface temperatures and preliminary analysis of long-term patterns and anomalies of SSTs around Iceland , J. Climate 19, pp. 5652–5666

Mikil lægðasveigja (næstu vikuna)

Nú virðist sem allmikil lægð setjist til þrautar í námunda við landið eða skammt suðausturundan. Hún er í sjálfu sér ekki illkynja, hvorki kröpp né köld - en hætt er við að bleyta fylgi áveðurs á landinu - og jafnvel líka inn til landsins í öðrum landshlutum.

Við lítum á 10 daga spár evrópureiknimiðstöðvarinnar sem gilda fyrir tímabilið 21. til 30. júlí. Eins og venjulega verður að hafa í huga að hér er um meðalkort að ræða - og fráleitlega verður veðrið eins alla dagana.

Jafnhæðarlínur 500 hPa-flatarins eru heildregnar. Jafnþykktarlínur strikaðar, en þykktarvikin sýnd í lit. Þykktarvikin segja frá hitafari í neðri hluta veðrahvolfs - miðað við meðallag áranna 1981 til 2010. Við sjáum að hita er spáð lítillega yfir meðallagi - minnst þó suðaustanlands. Hlýtt er á öllu svæðinu - aðeins smáblettur undir meðallaginu. - Sérlega hlýtt á að vera á Grænlandi. 

Við sjáum líka að margar jafnhæðarlínur hringa sig kringum lægðina - það táknar að norðaustanáttin er mjög eindregin og lægðarboginn - bleytuleg satt best að segja.

Úrkomuspáin er í samræmi við þetta.

Hér eru jafnþrýstilínur við sjávarmál heildregnar - lægðin er líka mjög áberandi á þessu korti. Litir sýna úrkomuvik. Á brúnu svæðunum er úrkomu spáð undir meðallagi - þau svæði rétt snerta Vesturland - annars er úrkomu spáð yfir meðallagi á landinu. Vikatölurnar eru mjög háar á norðanverðum Vestfjörðum - sýnist standa þar 1147 prósent þar sem mest er.

En hér skulum við athuga að hluti þessarar miklu úrkomu er þegar fallinn - því víða rigndi drjúgt í morgun - og spáin byrjaði að telja frá miðnætti. 

Skammvinn hlýindi á Englandi

Á morgun (þriðjudag 19. júlí) er óvenjuhlýtt loft á leið yfir England - en fer fljótt hjá. Staðan er sýnd á kortinu hér að neðan - spá bandarísku veðurstofunnar sem gildir kl.18. 

Örin bendir á England þar sem þykktin á að fara yfir 5700 metra. Þetta er ekki algengt, sagt er að Bretlandsmetið sé 5760 metrar. Hiti í 850 hPa á að fara yfir 20 stig yfir Suður-Englandi á morgun - mættishiti í þeim fleti er þá í kringum 35 stig. - Trúlegt að hiti fari víða í 30 til 35 stig inn til landsins á Englandi. 

En þetta stendur stutt við - rétt svona til að sýnast. Heldur svalt er á kortinu við Norður-Noreg - en þar hafa oft verið mikil hlýindi í sumar og á að hlýna verulega aftur mjög fljótlega. 

Hér á landi er líklegt að um 5550 metrar verði hámarkið í þessari umferð (á miðvikudag eða fimmtudag) - sem er svosem allgott - en það er samt eins og mjög hlýtt loft hafi heldur viljað sveigja frá landinu í sumar. Kannski það sýni sig síðar. 

Hringrás í júlí - (og veðurfarsbreytingar?)

„Spár“ um breytingar á veðurfari af völdum vaxandi gróðurhúsaáhrifa eru á margan hátt varasamar viðfangs - margt í þeim sem getur farið úrskeiðis. Þess vegna hafa menn fremur kosið að tala um framtíðarsviðsmyndir - bæði þá um losun gróðurhúsalofttegunda og annarra efna sem kunna að hafa áhrif á geislunareiginleika lofthjúpsins - sem og veðurfarslegar afleiðingar hverrar losunarsviðsmyndar. Við erum því - oft í einum graut - að tala um, losunarsviðsmyndir (losunarróf) og líklegt veðurlagsróf hverrar sviðsmyndar. 

Fjölmargar losunarsviðsmyndir hafa komið við sögu - miklu fleiri en svo að veðurfarsróf verði reiknuð að viti fyrir þær allar. Í reynd hefur verið valið úr og má lesa um það val í skýrslum milliríkjanefndar sameinuðu þjóðanna um loftslagsbreytingar (IPCC). Til eru enn öfgafyllri sviðsmyndir en þar er minnst á. 

Í þessum sviðsmyndasjó og afleiðingarófi er í sjálfu sér enginn jaðar hugsanlegra framtíðarbreytinga - en þar er þó að finna umræður um 6 stiga hlýnun - bæði 6 stiga almenna hlýnun um mestallan heim, sem og 6 stiga hlýnun á norðurslóðum - en um tvö stig annars staðar. Hvort tveggja telst ekki ólíklegt - haldi losun áfram svipað og verið hefur. 

Við skulum hér líta á almennt ástand í neðri hluta veðrahvolfs í júlímánuði. Til að ræða það þurfum við að líta náið á myndina hér að neðan. Hún sýnir meðalhæð 500 hPa-flatarins og 500/1000 hPa þykkt yfir norðurhveli í mánuðinum á árunum 1981 til 2010.

Grunngerð myndarinnar er sú sama og lesendur hungurdiska hafa oft séð - nema hvað jafnhæðarlínur eru dregnar á hverja 3 dekametra í stað 6 sem venjulegast er, eru sum sé tvöfalt þéttari. Þykktin er sýnd í hefðbundnum litum (skipt um lit á 6 dam bili) en auk þess eru jafnþykktarlínur dregnar - líka á 3 hPa bili. - Myndin skýrist nokkuð sé hún stækkuð. 

Mörkin á milli grænu og gulu litanna er að vanda við 546 dekametra, sú er meðalþykkt á Íslandi í júlí. Við megum taka eftir því að hér fylkir Ísland sér að nokkru leyti með heimskautaslóðum - víðast hvar er hlýrra í júlí á sama breiddarstigi heldur en hér - mjög ólíkt vetrarstöðunni. - Að sumu leyti er þetta heldur dapurlegt. 

En gerum nú nánari athugun - hér að neðan er sama kortið aftur - en bætt hefur verið við texta sem við skulum lesa saman. 

Yfir norðurskautinu er meðalhæðin 5430 metrar, meðalþykkt er 5360 metrar. Þykktartalan ein og sér gefur til kynna að meðalhiti júlímánaðar við skautið sé 6 stig. Það er auðvitað ekki rétt, meðalhitinn er nærri núlli. Öflug hitahvörf sitja yfir Norðuríshafinu - ekki veit ritstjórinn hversu hátt þau ná að meðaltali - en ísinn kælir loftið sem liggur neðst um 5 til 6 stig. - Íshafið er svo stórt umfangs að blöndun að ofan skiptir ekki mjög miklu máli á þessum árstíma - .

Suður til Íslands vex meðalþykktin úr 5360 metrum upp í 5460 - það munar 5 stigum. Júlíhiti hér á landi „ætti“ að vera um 11 stig. Hann er ekki fjarri því inni í sveitum, en lægri við sjóinn þar sem einhver kæling á sér stað. 

Ísland er um 25 breiddarstig frá norðurskautinu - við skulum fara jafnlangan veg til suðurs, til Asóreyja sem eru nærri 40. breiddarstigi. Þar er meðalþykkt júlímánaðar komin upp í 5660 metra - einfalda þykktarsambandið reiknar meðalhita 21 stig. Á eyjunum er það ekki fjarri raunverulegum meðalhita í júlí. 

Lítum líka á flatarhæðina. Hún er sem fyrr segir 5430 metrar yfir norðurskautinu, er 5540 metrar yfir Íslandi og 5870 metrar yfir Asóreyjum. Um 110 metra munur er því á Íslandi og norðurskauti, en 330 metra munur er frá Íslandi suður til Asórseyja. Háloftavestanáttin er miklu stríðari sunnan Íslands heldur en norðan. - Jafnhæðarlínurnar eru mun þéttari. Belti með tiltölulega þéttum jafnhæðarlínum liggur reyndar í kringum norðurhvel allt á um 40 til 50 gráðum norðurbreiddar. 

Þykktar- og hæðarmunur norðan Íslands er nánast hinn sami (munar aðeins 10 m), en hæðarmunurinn er um 130 metrum meiri en þykktarmunurinn suður til Asóreyja. - Norðan Íslands er meðalþrýstisviðið mjög flatt í júlí, en um 16 hPa munar á meðalþrýstingi á Íslandi og Asóreyjum. 

Það er alsiða að framtíðarsviðsmyndir sýni hitabreytingar - og svo er að skilja að átt sé við hitabreytingar í 2 m hæð. En öll veðurlíkön - bæði stór og smá eiga við allskonar illkynjaðan vanda að etja í hitaspám fyrir þá hæð. Spár um þykkt eða annan háloftahita ættu að ganga mun betur. - En samt eru slíkar spár nær aldrei sýndar í ritgerðum um framtíðarsviðsmyndir. 

Um leið og farið er að leggja yfirborðshlýnunarmynstur undir myndir eins og þá hér að ofan fara að birtast óþægilegar spurningar. Er verið að sýna röskun á sambandi þykktar og hita á einstökum stöðum (en það er mjög misjafnt í reynd)? Eða getum við gengið út frá því að fullt samræmi verði á milli hita- og þykktarbreytinga í framtíðinni? 

Hvað eiga menn við með 6 stiga hitahækkun á norðurslóðum en 2 stigum annars staðar (talin heldur hófleg sviðsmynd)? Er átt við að hitahvörfunum sé svipt af norðurskautinu? Er átt við að hiti í neðri hluta veðrahvolfs (sem þykktin mælir) hækki um 6 stig? - Eða kannski einhverja samsuðu?

Það skiptir máli fyrir alla hringrás á norðurhveli hvor valkostanna á við - (valkostir eru líka fleiri). Sex stiga hitahækkun á Íslandi er nánast ómöguleg að sumarlagi nema meðalþykktin aukist til samræmis, þá um 120 metra. 

Fari þykktarbreytingar að verða mjög ójafnar raskast bylgjumynstrið um leið - og vestanvindabeltið breytir um svip - jafnvel mjög mikið. 

Ekki er talið útilokað að vestanvindabeltið hafi nánast horfið stuttan tíma að sumarlagi á allra hlýjustu jarðsöguskeiðum fortíðarinnar - .

Hringlandi í spám

Þónokkur hringlandi er í spám reiknimiðstöðva þessa dagana. Þær eru þó sammála um að veður heldist meinlaust eða meinlítið - og að fremur hlýtt verði í veðri. Það sem gengur illa er að ná tökum á leiðum lægða tíl austurs í námunda við landið - og þar með úrkomu. Þær eiga ýmist að fara yfir það á einhvern hátt eða alveg fyrir sunnan. Syðri brautir halda úrkomu að mestu frá landinu.

Í gær (föstudag 15. júlí) var evrópureiknimiðstöðin með lægð fyrir vestan land - og rigningu (að vísu ekki mikla) um allt sunnan- og vestanvert landið á miðvikudaginn kemur, í dag er þessi sama lægð talsvert fyrir sunnan land - og úrkoma af hennar völdum lítil sem engin hér á landi. - Bandaríska veðurstofan er í dag með þessa sömu lægð á svipuðum slóðum og reiknimiðstöðin var í gær.

Reiknimiðstöðin spáir sáralítilli úrkomu suðvestanlands næstu tíu daga, en bandaríska veðurstofan vefiar 23 mm á sama tíma (sem að vísu er ekki mjög mikið). 

Lítum á kort sem sýnir spár reiknimiðstöðvarinnar í gær og dag - og muninn á þeim.

Heildregnu línurnar sýna sjávarmálsþrýsting kl.6 að morgni miðvikudags (20.júlí), strikalínurnar hins vegar spá frá í gær - og á við sama tíma. Litirnir sýna mismuninn. Hvíta L-ið sýnir staðsetingu lægðarinnar í gær - en það svarta stöðu lægðarinnar í spá dagsins í dag. 

Litirnir sýna mun á spánum. Þrýstingur í nýrri spánni er mun hærri við Vesturland en í þeirri fyrri - meir en 10 hPa hærri. 

Þetta gæti hafa snúist alveg við þegar hádegisspárunan sýnir sig undir kvöld - þessi hringlandi hefur nú verið viðloðandi um nokkra hríð og veldur því að hóflegt mark er tekið á spám þessa dagana.