Sjávarhiti við Norðurland (í gegnum tíðina)

Það er ekkert sérlega auðvelt að mæla sjávarhita við strendur landsins á áreiðanlegan hátt. Það hefur samt verið reynt - en eyður eru margar og óþægilegar í gagnaröðunum. Einna skást langra raða er talin gagnaröð sem fyrir 10 árum var soðin saman úr mælingum á norðlenskum veðurstöðvum og var fjallað um í grein í tímaritinu Journal of Climate (sjá tilvísun neðst í pistlinum). Fleira má lesa um sjávarhitamælingar gerðar við ströndina hér á landi í ritgerð ritstjóra hungurdiska frá árinu 2003. Sú er aðgengileg á vef Veðurstofunnar - og var gerð hennar ritstjóranum umtalsverð heilsubót. 

En mælingar hafa haldið áfram í Grímsey og við skulum nú líta á nýja mynd sem byggir á gögnum fengnum úr greininni áðurnefndu - og nýrri mælingum.

Lárétti ásinn sýnir tímabil mælinganna - síðasta árið er 2015. Lóðrétti ásinn sýnir ársmeðalsjávarhita (þrep) ásamt 10- og 30-ára keðjum. Við könnumst við flesta meginviðburði - tíminn fyrir 1920 er gríðarlega breytilegur - að nokkru má ráða hafísmagn á hitanum. 

Hlýindin á árunum 1925 til 1964 er kannski tvískipt. Mestu hlýindin eru á árunum frá 1927 til 1941, en síðan slaknar aðeins á. Hlýtt er þó fram til 1964, en þá kólnaði mjög snögglega. Kuldinn varð þó aldrei eins mikill og mest varð á kalda tímanum fyrir 1920. 

Árið 1995 var síðasta kalda árið í sjónum og eftir það fór hlýnandi, hlýjast varð 2003 og 2004. Ekkert lát er að sjá á hlýindunum - en þó er varla hægt að reikna með að þau haldist endalaust. Gríðarlegur hávaði er nú á norðurslóðum, það gnístir í íshafinu og illmögulegt að segja fyrir um hvaða skilaboð munu berast þaðan á næstu árum. 

Hlýindin sem fyrtu 4 ár mælinganna sýna (1875 til 1878, lengst til vinstri á myndinni) vekja auðvitað nokkra athygli - síðan er eyða - sjávarhitamælirinn brotnaði og langan tíma tók að fá nýjan frá Danmörku. Kalt var í sjó við Austurland þessi ár og freistandi að telja gamla mælinn í Grímsey einfaldlega vitlausan. En að henda mælingum bara af því að þær falla ekki inn í eitthvað sem búið er að ákveða er varla gott. 

Við lítum e.t.v. á fleiri sjávarhitalínurit síðar.

Greinin sem vísað er í:

Hanna, E., Jónsson T., Ólafsson, J. and Valdimarsson (2006): H. Icelandic coastal sea-surface temperature records constructed: putting the pulse on air-sea-climate interactions in the northern North Atlantic. Part I: Comparison with HadISST1 open ocean surface temperatures and preliminary analysis of long-term patterns and anomalies of SSTs around Iceland , J. Climate 19, pp. 5652–5666

Athugasemdir

[Hilmar Hafsteinsson (IP-tala skráð) 24.7.2016 kl. 08:14]

Bestu þakkir fyrir áhugavert blogg Trausti.

"Hlýindin sem fyrstu 4 ár mælinganna sýna (1875 til 1878, lengst til vinstri á myndinni) vekja auðvitað nokkra athygli."

Er ca. 60 ára sveifla AMO ekki viðurkennd innan fræðanna?

Læt fylgja með krækju á línurit yfir AMO 1880 - 2010 og tengsl við sólvirkni:

http://www.vukcevic.talktalk.net/GSC.gif

[Trausti Jónsson, 24.7.2016 kl. 13:22]

Það er engin sérstök sveiflutíðni almennt viðurkennd að mér vitandi. Algjörlega ómögulegt er að meta tíðni hitasveiflna út frá einni sveiflu (upp-niður-upp) sem ekki á sér niðurneglda ástæðu - . Þetta þýðir auðvitað ekki að sveiflur séu ekki til - en sú sem virðist sjást þarna er t.d. um 80 ár milli botna og toppa - við sjáum þó aðeins hluta þeirrar uppsveiflu sem nú er í gangi - hún gæti varað lengur - í áratugi - nú eða þá að hitinn gæti hrapað niður strax „á morgun“. Menn hafa þóst finna reglubundnar sveiflur í sólvirkni (lengri en þær sem tengjast hinni venjubundnu sólblettasveiflu) - um 80 ár hefur reyndar verið einna vinsælasta talan - en fjölmargar aðrar hafa sést - allt eftir því hver greinir og hvað er greint.

[Hilmar Hafsteinsson (IP-tala skráð) 24.7.2016 kl. 16:30]

Bestu þakkir fyrir svarið Trausti.

Eitthvað virðast loftslagsvísindin vera að rumska til meðvitundar um 40 - 80 ára AMO - sveiflur:

https://eos.org/research-spotlights/what-causes-long-term-north-atlantic-surface-temperature-cycles

https://climatedataguide.ucar.edu/climate-data/atlantic-multi-decadal-oscillation-amo

http://theconversation.com/the-atlantic-is-entering-a-cool-phase-that-will-change-the-worlds-weather-42497

https://www.researchgate.net/publication/222661107_The_regime_shift_of_the_1920s_and_1930s_in_the_North_Atlantic

en náttúrulega eru náttúrulegar sveiflur í náttúrunni ekki jafn spennandi og tölvulíkön.