Hlýtt Norður-Atlantshaf í ágúst

Uppgjör evrópureiknimiðstöðvarinnar fyrir ágústmánuð 2016 sýnir að yfirborðssjávarhiti var hár í N-Atlantshafi. Lítið fer fyrir kalda blettinum sem hefur verið áberandi síðustu tvö árin rúm. 

Litirnir sýna vikin - gulir og brúnir hita yfir meðallagi, en bláir hita undir því. Rétt er að leggja áherslu á að kortið sýnir einungis yfirborðshita og líklegt er að kalda skellan áðurnefnda leynist enn undir yfirborðinu og muni birtast aftur þegar hauststormar hafa hrært upp milli yfirborðs og þess sem neðar liggur. 

En er á meðan er. Taka ber vikum á hafísslóðum með varúð - sjávarhitameðaltöl eru þar illa skilgreind. - Hafísinn í Norðuríshafi er illa farinn eftir sumarið og útbreiðslan kvu vera komin niður í um 4 milljónir ferkílómetra. Það er ekki alveg jafnlítið og var síðsumars 2012 en meira los virðist á ísnum nú en áður. Spurning hvaða áhrif það hefur á haustútflutninginn í gegnum Framsund á milli Norður-Grænlands og Svalbarða - hann skiptir okkur máli. 

Bjarni Thorarensen þjóðskáld og amtmaður á Möðruvöllum vissi auðvitað ekkert um tilveru Framsundsins - en hann átti samt nafn yfir það í bréfi 7. október 1840. Hafísinn 1840 leit ekki eins út og venjulega - var þykkari - og segir Bjarni vegna þess: „Hann er því langt að kominn kannské frá sjálfum Nástrandar Dyrum, og ekki ólíklegt að það sé losnað sem losnað getur.“ - Er „Nástrandardyr“ ekki bara ágætt nafn á ruslarennu Norðuríshafs - Framsundið?

Einkunn sumarsins 2016 í Reykjavík

Ritstjóri hungurdiska hefur nú reiknað sumareinkunn Reykjavíkur á sama hátt og undanfarin ár. Leggja verður áherslu á að hér er um leik að ræða en ekki endanlegan dóm, enda smekkur misjafn. Aðferðinni er lauslega lýst í viðhengi, þar er einnig listi um einkunn einstakra mánaða og ára.

Sumarið 2016 kemur mjög vel út í Reykjavík - eins og sjá má á línuritinu.

Lárétti ásinn sýnir tíma - sá lóðrétti sumareinkunn. Hæsta mögulega einkunn er 48, en sú lægsta núll. Sumarið 2009 fær hæstu einkunnina, 41, en sumrin 1928 og 1931 fylgja fast á eftir. Öll sumur áranna 2007 til 2012 eru með meira en 35 í einkunn. Þetta tímabil er einstakt. Sumarið 1983 er á botninum.

Mikil umskipti urðu 2013. Þá kom hraklegasta sumar í Reykjavík í 20 ár. Sumarið 2014 þótti einnig fá heldur laka einkunn - þó náði hún meðallagi áranna 1961 til 1990 (20).

En sumarið í sumar er með 33 í einkunn - hefði talist með bestu sumrum á kalda skeiðinu 1965 til 1995 - og í góðum hóp á hlýskeiði fyrr á öldinni - en jafnast ekki alveg á við öndvegissumrin 2007 til 2012.

Rauði ferillinn sýnir 10-ára meðaltöl og tímabilaskiptingin kemur vel fram.

Nördin huga að viðhenginu.

Skrár tengdar þessari bloggfærslu:

• sumareinkunn í Reykjavík 1923 til 2016

Sumardagafjöldi 2016

Ritstjórinn telur nú sumardaga ársins 2016 í Reykjavík og á Akureyri - rétt eins og gert hefur verið áður. Þeir sem vilja forvitnast um skilgreiningar verða að leita í gömlum pistlum - en hér eru niðurstöður - og samanburður - á myndum.

Fyrst Reykjavík.

Sumardagarnir 2016 reynast vera 35 í Reykjavík - það er hátt í þrefalt meðaltal áranna 1961 til 1990 (grá strikalína sem nær þvert yfir línuritið), og einum degi fleira en meðalsumardagafjöldi á þessari öld (2001 til 2015). Þetta verður að teljast mjög viðunandi - alla vega langt yfir almennri flatneskju kalda tímabilsins sem miðaldra og eldri lesendur muna svo vel. - En auðvitað líka nokkru færri en í mestu öndvegissumrum árabilsins 2003 til 2012.

Fyrsti sumardagurinn (í þessum skilningi) kom strax 3. júní. Þeir urðu þó ekki nema fimm í júní. Júlísumardagarnir voru 17 - og í ágúst voru þeir 13. Sumardagalíkur eru ekki miklar í Reykjavík í september - en koma þó stöku sinnum - ef - þá gjarnan fleiri en einn.

Á Akureyri eru sumardagarnir líka mjög nærri meðaltali aldarinnar, tveimur færri reyndar en það meðaltal segir til um.

Sumardagarnir á Akureyri teljast 43 fram til þessa í ár. Meðaltalið 1961 til 1990 er 35, en meðaltal þessarar aldar 45. Sumarið í fyrra (2015) leit sérlega illa út þegar ritstjóri hungurdiska birti talninguna þá í byrjun september, en september halaði sumarið af botninum - úr neðsta sæti upp í það þriðja neðsta eins og sjá má á þessari mynd.

Sumardagarnir urðu 5 í maí í ár á Akureyri, júní var bestur og skilaði 17 dögum, júlí 10 og ágúst 13. Hugsanlega verður lokatalan hærri því að meðaltali koma 5 sumardagar á Akureyri eftir 1. september. - Annars er aldrei á vísan að róa, það hefur gerst 6 sinnum að enginn sumardagur hefur skilað sér í september á Akureyri.

Lesendur ættu að hafa í huga að sumrinu er formlega ekki lokið og eru að venju beðnir um að taka talninguna ekki alvarlega - hún er leikur.

Ritstjórinn mun á næstunni líka reikna sumarvísitölur ársins 2016 rétt eins og síðustu ár. Hvað skyldi koma út úr þeim reikningum?

Tengill á pistil þar sem finna má sumardagaskilgreininguna.