Enn sama

Á morgun (þriðjudaginn 11. febrúar) fer enn ein uppgjafalægðin til norðurs fyrir vestan Skotland og síðan til norðvesturs og vesturs fyrir sunnan land á miðvikudag og fimmtudag. Um leið herðir heldur á vindi, sérstaklega um landið norðvestanvert. Kalda loftið við Norðaustur-Grænland heldur á móti hlýrra lofti úr austri og suðaustri. En þetta er samt enginn kuldi.

Við lítum á 925 hPa-spákort evrópureiknimiðstöðvarinnar sem gildir kl. 12 á hádegi á miðvikudag.

 

Jafnhæðarlinur eru heildregnar á 20 metra bili. Það er 380 metra línan sem liggur næst Reykjavík. Í þeirri hæð er þrýstingur 925 hPa. Litir sýna hita í fletinum - kvarðinn til hægri batnar mjög sé myndin stækkuð. Frostlaust er í 925 hPa yfir Suðvesturlandi.

Hefðbundnar vindörvar sýna vindstefnu og vindhraða. Mikill strengur er á milli Vestfjarða og Grænlands og nær inn á Vestfirði og að því er virðist suður á Breiðafjörð og austur með Norðurlandi. Annars er vindur skaplegur.

Við tökum ekki mark á hita yfir Grænlandi sjálfu, en rétt norðan við Scoresbysund er kalt loft, frostið þar er meira en -12 stig. Það telst reyndar ekki kalt á þessum árstíma og enn er langt í mjög kalt loft. En hitabrattinn í Grænlandssundi er drjúgur og býr til mikinn vind.

Hugsanlegt er að norðaustanáttin gangi niður á aðfaranótt laugardags eða á laugardaginn og þá gæti hiti dottið niður um hríð. Annars er það eins og alltaf er: Þar sem léttir til og lægir kólnar hratt inn til landsins sé blöndun að ofan hæg eða lítil.

Þess má geta að hiti hefur það sem af er mánuðinum verið 2,6 stigum ofan við meðallag síðustu tíu ára í Reykjavík, en 3,1 ofan við á Akureyri. Vikin eru aðeins minni við Breiðafjörð og á Vestfjörðum.

Þriðjudagurinn 10. var fyrsti dagur mánaðarins með landsmeðalhita í byggð undir frostmarki. Ekki hefur enn frosið í Vattarnesi það sem af er ári.

Athugasemdir

[Torfi Kristján Stefánsson, 11.2.2014 kl. 11:47]

Trausti er allur í metingnum að venju og bendir hér glaður á að hiti það sem af er mánuðinum hefur verið 2,6 stigum ofan við meðallag síðustu tíu ára í Reykjavík og að dagurinn í gær, 10. febrúar, hafi verið fyrsti dagur mánaðarins með landsmeðalhita í byggð undir frostmarki.

Í fyrra upplýsti hann okkur um að fyrstu sex vikur ársins það árið hafi verið fimmta hlýjasta byrjun ársins síðan mælingar hófust og meðaltalshiti hafi verið 1,9 gráður.

Þessi hiti svo entist út allan febrúarmánuð sem reyndist vera í 2.-4. sæti þeirra hlýjustu. Í Reykjavík var meðalhitinn 3,9 stig sem setti hann í 3. sætið.

Tveir fyrstu mánuðirnir í fyrra voru þannig metmánuðir.

Aðeins byrjun árs 1964 var hlýrra (sem sé síðasta árið fyrir litlu ísöldina 1965-1995).

Við getum sem sé látið okkur hlakka til restinnar af árinu. Lesendur hér sunnanlands muna eflaust hvernig það var ...

Reyndar er frostatíð framundan þannig að þetta jan.-feb. met verður ekki slegið í ár, ef guð og allir góðir vættir lofa.

[Hilmar Hafsteinsson (IP-tala skráð) 11.2.2014 kl. 12:37]

Trausti er enn við sama heygarðshornið. Túlkun hans á hitamælafræðum er venju fremur traust, smbr. umsögn hans um nýliðið ár:

"Meðalhitinn í ár (2013) er 3,9 stig og er það 0,7 stigum ofan við meðaltalið 1961 til 1990. Þetta er átjánda árið í röð sem er ofan við þetta meðaltal. Ef trúa má reikningunum er það þó næstkaldast það sem af er 21. öldinni (ómarktækt hlýrra en árið 2005)." (http://trj.blog.is/blog/trj/entry/1341548/)

Þetta lesist með vísindagleraugum: Árið 2013 er kaldasta árið á öldinni!

[Höskuldur Búi Jónsson, 11.2.2014 kl. 14:14]

Torfi og Hilmar: Þið eruð frekar vissir um kólnun er það ekki? Hvernig væri að þið mynduð nú henda niður einhverri tölu á blað varðandi hvernig þið teljið að hnattrænn hiti muni verða á þessu ári - sjá 2013 – enn eitt hlýtt ár og hnatthitaspámeistari ársins - lesið til enda og endilega komið með spá. Miðað við fullyrðingar ykkar þá verðið þið ekki í vandræðum með að koma með spádóm

[Torfi Kristján Stefánsson, 11.2.2014 kl. 16:29]

Hér er ekkert verið að fjalla um hnattræna hlýnun eða kólnun, heldur einfaldlega um hitafar hér á landi í janúar og það sem af er febrúar!

Þarftu endilega að vera að lesa þitt eigið áhugamál inn í allt sem skrifað er hér? Skárri er það nú þráhyggjan!

[Höskuldur Búi Jónsson, 11.2.2014 kl. 16:36]

Afsakaðu Torfi, ekki ætla ég að draga það í efa að þú hafir átt við staðbundinn hita í þessu tilfelli, biðst velvirðingar.

[Höskuldur Búi Jónsson, 11.2.2014 kl. 16:42]

... boðið stendur samt ef þú hefur áhuga.

[Hólmsteinn Jónasson (IP-tala skráð) 11.2.2014 kl. 22:07]

Eru einhver líkindi við Oct -feb 1929/30, 1961/61 og 2000/01 ?

[Trausti Jónsson, 12.2.2014 kl. 01:39]

Hólmsteinn. Það má kannski tala um líkindi 1929 til 1930 - en þó var annað bragð af þeim vetri - miklu meiri snjór og verri veður heldur en nú. Síðasttaldi veturinn var líka öðruvísi en nú nema hvað þá var mjög þurrt um landið vestanvert eins og nú. Hvort þú átt við 1960 til 1961 eða 1961 til 1962 veit ég ekki. En ég sé ekki líkindi í heild. - Veðrið endurtekur sig nærri því aldrei.