Óvenju ...

Í kaldara lagi kannski en það er varla hægt að segja að það sé óvenjukalt - júníkuldaköstin oft miklu verri en þetta. Meðalhiti á landinu í dag var 5,5 stig, 1,1 stig sama dag 1997. Förum kannski í frekari upprifjun - ef núverandi kast endist eitthvað. En lítum samt á spá um hita í 850 hPa. Hún gildir kl. 9 í fyrramálið (fimmtudag 8. júní).

w-blogg080617a

Hiti er sýndur með litum, jafnhæðarlínur heildregnar og vindur sýndur með vindörvum. Blái flekkurinn er nokkuð fyrirferðarmikill - þar er frostið meira en -6 stig í 850 hPa (rúmlega 1300 metra hæð). Þetta gæti verið verra - og fer svo hægt (mjög hægt) hlýnandi. 

Eins og sjá má stefnir mjög hlýtt loft í áttina að Norðaustur-Grænlandi - tökum eftir því. 

w-blogg080617c

Hér kemur það óvenjulega. Kortið sýnir sjávarmálsþrýsting og úrkomu. Það gildir kl. 6 að morgni föstudags 9. júní. Neðri rauða örin bendir á djúpa lægð langt suður í hafi. Miðjuþrýstingur er hér 964 hPa - það er óvenjulegt í júní.

Efri rauða örin bendir á úrkomuklessu við Norðaustur-Grænland - þar er hlýja loftið áðurnefnda að rekast á fjöllin. Á þessum slóðum er venjulega mjög þurrt á þessum tíma árs og atburðurinn er óvenjulegur að sögn útvísa evrópureiknimiðstöðvarinnar. 

Tíu daga úrkomuspáin sýnir vel hversu óvenjulegt þetta er.

w-blogg080617d

Spáin gildir frá 7 til 17. júní. Litir sýna hlutfall tíudagaúrkomu af meðallagi. Örin bendir á úrkomuklessuna við Grænland - 25 falda meðalúrkomu - og hún á reyndar ekki að falla á tíu dögum heldur fylgir nær eingöngu þessu eina veðurkerfi sem sjá mátti á efri myndinni. - En munum að meðalúrkoma á þessu svæði er sáralítil í júní þannig að flestum hér á landi þætti ekki mikið til heildarmagnsins koma. - En þetta er athyglisvert ef rétt reynist. 

Hér á landi er úrkomu hins vegar spáð undir meðallagi næstu tíu daga - lægstu tölurnar eru við Breiðafjörð - dekksti brúni liturinn sýnir svæði þar sem úrkomu er spáð innan við 25 prósent af meðallagi. 


« Síðasta færsla | Næsta færsla »

Athugasemdir

1 identicon

nú hef ég ekki skoðað hitan á svæðinu en féll ekki þessi mikkla úrkoma við grænland sem snjór sem í sjálfu sér er gott, því þá hækkar jökullinn 

kristinn geir steindórsson briem (IP-tala skráð) 8.6.2017 kl. 07:22

2 identicon

5,5 stiga meðalhiti á sólarhring þykir nú frekar kalt jafnvel þó að megi finna mun kaldari daga í júní á kuldatímabilinu í lok siðustu aldar (lengi má böl mæta með að benda á annað verra)! Ef borið er saman við meðalhitann á landinu í maí (7,4 stig) þá er þessi sólarhringur tæpum tveim gráðum kaldari!!
Fróðlegt væri að sjá hvort svona kalt hafi verið á yfirstandandi "hlýskeiði" á þessari öld en reyndar voru einnig kaldir júnímánuðir á öldinni svo sem árið 2001 (8,8 stig í borginni). Alls fimm júnímánuðir undir 10 stigum í Rvík!

Og þessari kuldatíð er spáð áfram næstu vikuna á mestöllu landinu.

Já, hnattræna hlýnunin virðist eiga mjög erfitt uppdráttar - eða amk ganga mjög hægt fyrir sig. 

Torfi Stefánsson (IP-tala skráð) 8.6.2017 kl. 08:32

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • w-blogg200324b
  • w-blogg200324a
  • Slide10
  • Slide9
  • Slide8

Heimsóknir

Flettingar

  • Í dag (29.3.): 7
  • Sl. sólarhring: 58
  • Sl. viku: 405
  • Frá upphafi: 2343318

Annað

  • Innlit í dag: 6
  • Innlit sl. viku: 366
  • Gestir í dag: 5
  • IP-tölur í dag: 5

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband