Djúp lægð suður í hafi

Foráttulægð er nú að ná sér á strik suður í hafi, gert er ráð fyrir því að í kvöld fari miðjuþrýstingur niður í 935 hPa og vindhraði í fárviðri á allstóru svæði. Þó lægðin stefni síðan í átt til okkar verður samt talsvert af henni dregið þegar vindur og úrkoma ná hingað til lands síðdegis á morgun. - Samt ástæða til að gefa vindi og úrkomu gaum.

Kortið sýnir sjávarmálsþrýstispá evrópureiknimiðstöðvarinnar (heildregnar línur) og vind í 100 metra hæð (litir). Hún gildir kl. 21 í kvöld, sunnudag 5. febrúar. Vindur í 100 metra hæð er talsvert meiri en niður við sjávarmál - og oftast mun meiri en yfir landi, en aftur á móti vísar hann oft vel á raunstyrk í slæmum vindstrengjum í fjöllóttu landi. 

Það verður talsvert um að vera í veðri á okkar slóðum næstu vikuna - átök milli mikillar fyrirstöðuhæðar í austri og kaldra lægða í vestri. - Vonandi fer þó fátt úrskeiðis. 

Athugasemdir

[Helga Kristjánsdóttir, 5.2.2017 kl. 23:06]

Eins og það er nú gott að ganga á snjólausum gangstígum,sækir að manni hjátrú sem er nú bara heimatilbúin. Skildi konungurinn skinja vanþakklætið yfir mildi hans og minna mann á að hann ræður ríkjum um þessar mundir.