Óvenjuskýr ísmynd

Í dag sást vel til íssins í Grænlandssundi á myndum utan úr geimnum. Aðeins fáeinar háskýjaslæður voru þar á sveimi - en annars var skyggni sérlega gott. Myndin hér að neðan er klippt úr stærri og betri mynd á vef Veðurstofunnar - en skýrist nokkuð hér sé hún stækkuð (MODIS sunnudag 12. júní 2016, kl. 13:59).

Heldur er ísbreiðan gisin - en sérstaka athygli vekja ísrastir sem slitnað hafa langt austur úr henni og eru nú djúpt undan Húnaflóa - hafa greinilega lent út úr meginstraumnum sem liggur til suðvesturs um Grænlandssund og inn í straum sem liggur í öfuga átt. 

Þetta er reyndar furðulíkt því sem spáð var fyrir viku síðan að yrði í dag (sunnudag 12. júní) - en ritstjórinn hefur ekki séð nýrri spár. Sjávarhiti á þessum slóðum er almennt 6 til 8 stig, en ísinn ver sig (með því að fórna hluta af sér í bráðnun) og kælir í kring - en slík vörn er grunn og brestur um leið og vindur getur blandað kalda laginu saman við það sem undir er. - Að sögn eru rastirnar nú á hægri leið aftur til suðurs eða suðvesturs. 

Það er vonandi að þarna séu ekki líka sársvangir ísbirnir á ferð eins og um árið þegar svipuð staða kom upp. - En algengt er þetta.  

Athugasemdir

[Emil Hannes Valgeirsson, 13.6.2016 kl. 11:13]

Á sama tíma er mjög lítið um ís við austurströnd Grænlands til suðurs við þessa ísbreiðu. Flæði hafíssins suður eftir Grænlands hefur því eitthvað truflast. Væntanlega vegna sunnan og vestlægra vinda á Grænlandssundi fyrr í vor - eða vegna skorts á norðaustanátt.