Nokkar tölur úr illviðrinu

Illviðrið nær býsna hátt á metingslistum - stormhlutfall dagsins í byggð var 69 prósent - sama og í illviðrinu 14. mars s.l. Meðalvindhraði sólarhringsins (í byggð) var meiri í mars, en hitti þá betur í daginn en nú, hæsta klukkustundarlandsmeðaltal landsins var nánast hið sama í veðrunum tveimur. Annars eru þetta eðlisólík veður.

Frést hefur af ársmetum 10-mínútna vindhraða á 15 stöðvum (vegagerðastöðvar taldar með) sem athugað hafa í 5 ár eða meira. Fara þarf yfir mælingar á ýmsum stöðvum - og rýna í hugsanlegar villur. Mesta hviða dagsins (séu mælingar réttar) mældist á Hallormsstaðahálsi 72,6 m/s og þar var einnig mestur 10-mínútna vindur 50,9 m/s - en þetta eru óstaðfestar tölur - höfum það í huga. Fárviðri (>32,6 m/s) mældist á 33 stöðvum - flestar þeirra á fjöllum og hálendi - en á láglendi í Æðey, á Fagurhólsmýri, Þyrli í Hvalfirði, við Markarfljót og á Kjalarnesi - við freistumst líka til að telja Hólmsheiði í Reykjavík til byggðastöðva. Nokkrar stöðvar duttu út - annað hvort vegna bilunar í mælum rafmagns- eða fjarskiptatruflana - það kemur í ljós.

En veðrið er ekki alveg búið þegar þetta er skrifað. 

En þökkum vakt Veðurstofunnar fyrir góðar og snarpar spár - takk krakkar. 

Athugasemdir

[Þorbjörn Rúnarsson (IP-tala skráð) 8.12.2015 kl. 08:19]

Eru einhvers staðar upplýsingar um mesta loftþrýstifall á sólarhring á Íslandi? Sýnist þrýstingurinn t.d. í Reykjavík hafa fallið um ca 55 hPa frá fimm að morgni gærdags til fimm í morgun.

[Trausti Jónsson, 8.12.2015 kl. 10:38]

Mér er kunnugt um nokkur tilvik 60 hPa þrýstifalls á sólarhring hér á landi - en það er mjög óvenjulegt þannig að þetta nú er með því meira sem sést.