Enn af áramótaveðri (froðan rennur)

Enn er hugað að áramótum. Við lítum snöggt (þeir sem vilja geta auðvitað starað úr sér augun) á spá evrópureiknimiðstöðvarinnar um sjávarmálsþrýsting og fleira á miðnætti á gamlárskvöld.

w-blogg301214a

Hér má sjá mjög opna stöðu. Risastór lægðarmiðja þekur mestallt Norður-Atlantshaf. Ískalt heimskautaloft streymir úr vestri út yfir hafið og mætir þar öllu hlýrra lofti úr suðri. Við Ísland er þó einhver óljós hroði - ekki vindur að ráði en töluverð úrkoma - og -5 stiga jafnhitalína í 850 hPa(strikalínur) liggur þvert yfir landið frá suðri til norðurs (á leið til austurs). 

Þetta er einmitt sá hiti sem veðurfræðingum þykir þægilegt að nota til að greina að snjó og regn - (en raunveruleikinn sinnir þægindum einhverrar fræðistéttar ekki neitt - alla vega ekki til lengdar). 

Sé úrkomusvæðið í kringum -5 stiga jafnhitalínuna á hraðri hreyfingu - utan af sjó - má e.t.v frekar giska á rigningu, sé úrkoman áköf hallast líkur að snjókomu. Sé hún klakkakennd - þannig að bjart sé á milli hryðja - er jafnvel möguleiki á frostrigningu - en það vilja menn síst af öllu. Að vanda látum við Veðurstofuna um að höndla raunveruleikann - en hungurdiskar reika sem fyrr um í draumaveröld reiknilíkana (tilbiðja þau samt ekki - munið það). 

Það er mesta furða hvað evrópureiknimiðstöðin er róleg yfir því sem fylgir á eftir - en skýtur að vísu nokkrum föstum skotum í átt til Bretlandseyja næstu daga á eftir - ameríkureikningar eru órólegri hvað okkur varðar. Sannleikurinn er hins vegar sá að vissara er að fylgjast vel með stöðunni - og vona jafnframt að nýtt ár færi okkur blíður á blíður ofan - og frið frá ófærð, skafrenningi og hálku (nema í skíðalöndum og á jöklum - þar má snjóa sem lystir). 


« Síðasta færsla | Næsta færsla »

Athugasemdir

1 identicon

Mér sýnist nú nýja árið færa okkur frost á frost ofan með stillum og fallegu veðri. Spárnar virðast sammála um það nema einn og einn veðurfræðingurinn sem lifir í von um endalaus hlýindamet.

Ekki græt ég umhleypingana þótt sumir virðast gera það.

Torfi Stefánsson (IP-tala skráð) 30.12.2014 kl. 10:32

2 Smámynd: Trausti Jónsson

Reiknimiðstöðvar eru nú mjög ósammála og reikandi um veður hér á landi fyrstu viku janúarmánaðar.

Trausti Jónsson, 30.12.2014 kl. 13:13

3 identicon

Sé að danska veðurstofan (DMI) er að spá vindasömum en hlýum janúar þar í landi.  Vindurinn á að koma úr s/v með talsverðri vætu en hlýju lofti.

Þetta passar mjög við langtímaspá fyrir Ísland, en hér á að koma kalt heimskautaloft úr n/v í janúar og þetta heimskautaloft þrýstir hlýju lofti frá Íslandi inn yfir Bretlandseyjar og þaðan austurúr inn yfir Danmörku og sunnanverða Skandinavíu.

Við munum því eiga von á köldum, rysjóttum og snjóþungum janúar á meðan íbúar norðanverðar Evrópu fá vorblíðu eins og hún gerist best á Íslandi.

Ö. Jónasson (IP-tala skráð) 30.12.2014 kl. 13:57

4 Smámynd: Trausti Jónsson

Evrópureiknimiðstöðin (sú spá sem danir nota) gerir ráð fyrir vestanátt og hlýju í V-Evrópu en þrálátum austan- og norðaustanáttum hérlendis - svipað og var í janúar og febrúar í fyrra. Í slíku veðurlagi er hitafar mjög óráðið - í fyrra var mjög hlýtt hér - . Að þessu sinni gerir mánaðarspá reiknimiðstöðvarinnar ráð fyrir hita um eða yfir meðallagi fyrstu vikuna, í annarri viku verði hiti 1 til 3 stigum undir meðallagi, í þriðju viku í eða rétt undir meðallagi og í fjórðu viku í meðallagi - yfir því fyrir norðan land - en undir fyrir sunnan. En austanáttarspáin er mjög eindregin. - En þessar spár eru ekki sérlega áreiðanlegar.

Trausti Jónsson, 30.12.2014 kl. 15:32

5 identicon

var að skoða atlanshafsspána næstu daga það virðist ekki þurfa mikið til að veðrið her breitist. þó vill ég heldur staðfiðrið það eru víst litlar líkur á því 

kristinn geir steindórsson briem (IP-tala skráð) 30.12.2014 kl. 16:50

6 identicon

Norska spáin gerir ráð fyrir eindregnu frosti svo langt sem hennar spá nær, eða fram til 8. janúar, alveg niður í 10 stiga frost. Áttin verði aðallega norðlæg og norð-austlæg en ekki austlæg.
Einnig gerði hún, fyrir nokkrum dögum, ráð fyrir köldum vetri (jan-mar).
Þetta er því spá um allt annað veður en var í byrjun þessa árs.

Torfi Stefánsson (IP-tala skráð) 30.12.2014 kl. 17:39

7 Smámynd: Trausti Jónsson

Norska spáin er beint afrit af spá evrópureiknimiðstöðvarinnar þegar kemur fram yfir tvo sólarhringa. Hún er mjög flöktandi þessa dagana - síðari hluti tímabilsins var frekar rólegur i morgun - aftur á móti illa brjáluð síðdegis - en hiti í báðum tilvikum nærri meðallagi (1981 til 2010) næstu 10 daga í heild. Amerísku spárnar vægast sagt út og suður - m.a. er í nýjustu runu boðið upp á 917 hPa lægð við Vesturland. Hún verður væntanlega horfin í þeirri næstu - eftir 6 klst. Það er ólíklegt að janúar og febrúar í ár bjóði upp á einhverja endurtekningu þess óvenjulega í fyrra - en það var líka sagt um áramót 1989-1990 - þegar staðan var ámóta ólíkleg.

Trausti Jónsson, 30.12.2014 kl. 23:46

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Nóv. 2019
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Nýjustu myndir

  • w-blogg111119c
  • w-blogg111119b
  • w-blogg111119a
  • w-blogg04119a
  • w-blogg031119a

Heimsóknir

Flettingar

  • Í dag (13.11.): 132
  • Sl. sólarhring: 178
  • Sl. viku: 1551
  • Frá upphafi: 1850156

Annað

  • Innlit í dag: 115
  • Innlit sl. viku: 1337
  • Gestir í dag: 101
  • IP-tölur í dag: 93

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband