Endurtekningar

Veðrið er sífellt að leika sama stefið aftur og aftur þennan mánuð - og reyndar er það ekki svo ólíkt stefinu sem gekk í janúar í fyrra. Hlýtt - en þó ekki svo hlýtt og köldu bregður lítt fyrir. Allar lægðir enda einhvern veginn í sömu gröf vestur af Bretlandseyjum eftir að hafa étið yfir sig af sælgæti og feitmeti. Kuldinn að norðan lætur ekki sjá sig.

w-blogg310114a 

Kortið sýnir spá evrópureiknimiðstöðvarinnar um sjávarmálsþrýsting, úrkomu og hita í 850 hPa kl. 18 á morgun, föstudag. Lægðin er um 937 hPa í miðju - ætli reiknimiðstöðin ýki ekki lítillega? Fárviðri er sunnan og vestan lægðarmiðjunnar - en mun vægari austanstrengur að ná til Íslands. Kunnuglegt - ekki satt? Sé að marka spár á lægðin að fara í hring og grynnast mikið en á síðan að þokast til norðurs - og þar með verður vindátt norðaustlægari meðan staðan jafnar sig.

En harla lítið er af köldu lofti fyrir norðan land - þannig að það verður áfram furðuhlýtt miðað við vindátt og árstíma. Jú, það eru fáeinar þrýstilínur á milli Grænlands, Íslands, Svalbarða og Noregs - en ekki margar - og þetta svæði er einkennilega hreint af jafnhitalínum. Við skulum til gamans stækka hluta kortsins þannig að þetta sjáist betur.

w-blogg310114b

Hin hlýja -5 stiga lína er rétt norðaustan við land - góð hláka er á láglendi sunnan við hana nema þar sem kalt loft getur legið í logni og björtu veðri. Síðan sér ekki til nokkurrar jafnhitalínu allt til Svalbarða. Þó er -10 stiga línan undan Norðlandsfylki í Noregi þar sem kalt loft úr austri virðist sleppa yfir hálendishrygginn á landamærunum við Svíþjóð.

Á þessum árstíma búumst við við að sjá fleiri jafnhitalínur, -10 og -15 ættu báðar að vera þarna og mjög oft -20 líka - jafnvel -25 nyrst á kortinu. En nú er ekkert.

Það verða þrengingar á milli -5 og -10 línanna sem valda næsta norðankasti á Grænlandssundi, sú síðarnefnda verður fljót inn á svæðið. En lengri tíma tekur að ná í -15 sem nær reyndar núna suður á Kaspíahaf (undirbýr olympíuleikana) og langt suður á Japanseyjar.

Ekki tókst Stórhöfða að verða algjörlega frostlaus í janúarmánuði að þessu sinni því lágmarkshitinn kl. 18 var -0,2 stig. Frostið stóð þá aðeins í nokkrar mínútur. Nú, um kl. 23, er hiti aftur fallinn niður fyrir frostmark. Frostlausa syrpan varð samtals 33 dagar, jafnlöng og lengsta miðvetrarfrostleysan sem áður er um vitað á sama stað (um þetta var fjallað í pistli sem varð að hverfa vegna lesendadeilna um páfadóm í loftslagsvísindum). En met hæsta lágmarks nokkurs janúarmánaðar á Stórhöfða stendur enn.

Vattarnes er enn, þegar þetta er skrifað, með hreint borð í mánuðinum og Hvalnes reyndar líka. Þar er lágmark ekki skráð á sama hátt og á Stórhöfða og í Vattarnesi þannig að við getum ekki alveg borið stöðvarnar saman þar sem lægsta talan á Hvalnesi er aðeins 0,1 stigi frá frostmarkinu. Seley stendur enn í 0,0 stigum.


« Síðasta færsla | Næsta færsla »

Athugasemdir

1 identicon

Sæll Trausti og þakkir fyrir áhugaverða umfjöllun.

Um leið og ég samhryggist innvígðum innilega með nýju frostlausu syrpuna sem ekki varð þætti mér vænt um að þú staðfestir að síðasta 33 daga frostlausa syrpa (miðvetrarfrostleysa) á Stórhöfða átti sér stað á kuldaskeiði. :)

Hilmar Hafsteinsson (IP-tala skráð) 31.1.2014 kl. 13:29

2 Smámynd: Pálmi Freyr Óskarsson

Enn gleymdu því ekki að janúar 2014 á Stórhöfða verður með þeim hlýjustu í janúarmánuði á Stórhöfða, Hilmar.

Pálmi Freyr Óskarsson, 31.1.2014 kl. 15:46

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Apríl 2024
S M Þ M F F L
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Nýjustu myndir

  • w-blogg120424c
  • w-blogg120424b
  • w-blogg120424a
  • w-blogg110424b
  • w-blogg110424b

Heimsóknir

Flettingar

  • Í dag (16.4.): 232
  • Sl. sólarhring: 260
  • Sl. viku: 2011
  • Frá upphafi: 2347745

Annað

  • Innlit í dag: 204
  • Innlit sl. viku: 1736
  • Gestir í dag: 196
  • IP-tölur í dag: 189

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband