Af háum lágmarkshita

Fyrir nokkrum dögum var hér á það minnst að enn hefði ekki frosið á Stórhöfða í Vestmannaeyjum og á Vattarnesi það sem af er mánuðinum. Það ástand stendur enn. Það er á móti líkum að frostleysan endist út mánuðinn.

Samt er eðlilegt að spurt sé um hæsta mánaðarlágmark janúarmánaðar. Á Stórhöfða er talan -1,2 stig og stendur frá árinu 1973 (sem varð reyndar heldur dapurt hvað hita snertir). Líkurnar á því að þetta met haldi eru meiri heldur en líkurnar á frostleysu - og vaxa eftir því sem nær dregur mánaðamótum.

En skyldu einhverjar aðrar stöðvar vera í methugleiðingum? Gerð var skyndikönnun á málinu og litið aftur til 1949 - við látum eldri athuganir bíða þar til nær dregur mánaðamótum (ef eitthvað heldur). Þegar gerður er listi yfir hæstu mánaðalágmörk janúar á núverandi mönnuðum stöðvum kemur í ljós að 12 stöðvar af 21 eru í methugleiðingum - tvær hafa jafnað fyrra met en sjö stöðvar hafa nú þegar sprungið í hlaupinu, þar á meðal Reykjavík. Ekki munar þó nema 0,1 stigi á metinu þar, -4,3, og þeim -4,4 stigum sem mældust þann 11. síðastliðinn.

Hér er listi yfir þær stöðvar sem enn eiga möguleika á meti - aftasti dálkurinn sýnir borð fyrir báru. Það er mest á Skjaldþingsstöðum og í Miðfjarðarnesi. Tölur eru í °C.

stöð		lágm2014	met	ár	mism
Skjaldþingsstaðir		-3,5	-9,3	1996	5,8
Miðfjarðarnes		-2,2	-7,2	2013	5,0
Sauðanesviti		-0,7	-4,2	2013	3,5
Mánárbakki		-3,2	-6,5	2001	3,3
Grímsstaðir		-8,0	-11,2	2001	3,2
Bláfeldur		-1,9	-4,3	2013	2,4
Hólar í Dýrafirði		-5,5	-7,5	2009	2,0
Ásgarður		-4,1	-6,0	2013	1,9
Dalatangi		-0,2	-2,0	1950	1,8
Höfn í Hornafirði		-1,8	-3,6	1974	1,8
Akureyri		-6,2	-7,8	1990	1,6
Keflavíkurflugvöllur		-2,7	-3,5	1973	0,8

Nokkuð kalt verður í nótt (aðfaranótt föstudags 24. janúar) og trúlegt er að einhverjar þessara stöðva heltist strax úr lestinni. En hver veit.

Við megum taka eftir því að janúar í fyrra (2013) á fjögur met í töflunni - og fjögur standa líka á þeim stöðvum sem örugglega ná ekki meti í ár.

Athugasemdir

[Torfi Stefánsson (IP-tala skráð) 24.1.2014 kl. 09:37]

Fróðlegt væri að fá einhverjar tölur um annað en hita (enda virðast metin ekki ætla að falla þar því spáð er köldu veðri út mánuðinn eftir hlýja hvellinn sem verður í dag).

Þegar þessi mánuður var hálfnaður var úrkoman lítið hér í Reykjavík (14,3 mm) eða aðeins um 40% af meðalúrkomu áranna 1961-90.

Hvernig er staðan nú (eftir rigninguna í dag er spáð þurru það sem eftir er mánaðarins)?

Í Noregi er talað um þurrasta janúarmánuð nokkru sinni - og að hæðin sem hefur blokkerað lægðarganginn yfir landið muni halda velli vel fram í næsta mánuð:

http://www.yr.no/nyheter/1.11487718

http://www.yr.no/nyheter/1.11490526