Um frostleysu í janúar (og fleiri mánuðum)

Spurt hefur verið um hvort ekki sé óvenjulegt að íslensk veðurstöð sleppi í gegnum janúarmánuð án þess að hiti fari niður fyrir frostmark.

Því er til að svara að það er svo óvenjulegt að það hefur bara ekki komið fyrir hingað til. Sú stöð sem líklegust er til slíkra afreka er Surtsey. - En ekkert hefur frést þaðan um nokkra hríð og dýrt að gera út leiðangur til viðgerða.

Ólíklegt er að breyting verði á nú. Reyndar standa málin svo í dag (mánudaginn 20. janúar) að enn hefur ekki frosið á Stórhöfða - né í Vattarnesi og í Seley er lægsta lágmark mánaðarins til þessa 0,0 stig.

Veðurstöðin í Surtsey náði þeim athyglisverða árangri í fyrra (2013) að komast í gegnum febrúarmánuð án frosts - fyrst íslenskra veðurstöðva. - Enda hefur hún staðsetninguna í forgjöf.

Það hefur gerst tvisvar að veðurstöð hefur sloppið við frost í mars og þá á tveimur stöðvum hvoru sinni. Í mars 1929 mældist lægsti hiti mánaðarins 0,2 stig í Hólum í Hornafirði og 0,4 stig í Vík í Mýrdal. Í mars 1963 var lægsta lágmark á Stórhöfða 0,3 stig og 0,7 stig á Loftsölum í Mýrdal.

Engin stöð hefur sloppið án frosts í desember og það er reyndar furðusjaldan sem stöðvar sleppa alveg við frost í apríl og nóvember. Meira að segja er októberlistinn ekki mjög langur. En e.t.v. mætti segja frá því í smáatriðum síðar - drukkni hungurdiskar ekki áður í innrænu eða útrænu bulli (eða mannviti, kjósi menn það orð frekar).


« Síðasta færsla | Næsta færsla »

Athugasemdir

1 identicon

Fréttin sem sett var inn hér um daginn um mjög litla virkni sólar nú um stundir (en var fjarlægð vegna ótrúlegustu viðbragða við henni), og er upprunnin frá BBC, hefur svei mér vakið athygli!

Það er ekki aðeins Pressan sem segir frá þessu heldur einnig mbl.is, sem hleypur nú ekki eftir hverri vitleysunni sem er (enda engar hýenur eða sníkjudýr þar á bæ!).

Meria að segja Ómar Ragnarsson hefur stokkið á vagninn og jafnvel glaðst yfir fréttinni. Væntanleg kólnun gæti komið í veg fyrir brambolt þjóða á norðurslóðum og fyrirhugaða þjónustuhöfn í Finnafirði eða annars staðar á Norður- eða Austurlandi.

Já, það er margt skrítið í kýrhausnum.

Torfi Stefánsson (IP-tala skráð) 21.1.2014 kl. 07:50

2 identicon

Heill og sæll. Nú í dag er kaldasti dagur ársins að meðaltali á norðurhveli jarðar. Hefði þá ekki einhver guð átt að fæðast 22. janúar, fyrsta daginn sem er hlýrri en dagurinn á undan í marga mánuði? Það eru jú fjölmargir guðir fæddir 25. desember sem var fyrsti dagurinn sem tók að lengja fyrir fjögur til sjöþúsund árum. Skýrist þetta af því að menn áttu ekki hitamæla í fornöld?

Þorsteinn Styrmir Jónsson (IP-tala skráð) 21.1.2014 kl. 19:58

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Apríl 2024
S M Þ M F F L
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Nýjustu myndir

  • w-blogg230424
  • Slide10
  • Slide8
  • Slide6
  • Slide5

Heimsóknir

Flettingar

  • Í dag (24.4.): 263
  • Sl. sólarhring: 417
  • Sl. viku: 1579
  • Frá upphafi: 2350048

Annað

  • Innlit í dag: 234
  • Innlit sl. viku: 1437
  • Gestir í dag: 231
  • IP-tölur í dag: 223

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband