Ójafnvægi

Við fylgjum enn lægðaganginum og lítum í dag á stöðuna á norðurhveli. Á venjulegum degi er kaldasta loftið yfirleitt ekki fjarri þeim stað þar sem veðrahvörfin eru lægst. Það er ekki þannig á kortinu hér að neðan. Það gildir um hádegi laugardaginn 14. desember.

 

Kortið batnar við stækkun. Heildregnar línur sýna hæð 500 hPa flatarins - þær eru mjög góðir fulltrúar fyrir hæð veðrahvarfanna. Litafletir sýna þykktina en hún segir til um hita í neðri hluta veðrahvolfs. Við sjáum að við norðurskautið má allt heita með felldu, þar liggur mjög lág þykkt undir lágum veðrahvörfum. En lægðin sem er með miðju við Suður-Grænland er langt frá köldustu svæðunum yfir Kanada (fjólubláir blettir).

Allt kalda loftið virðist streyma til austurs út á Atlantshafið - fyrir sunnan meginlægðina. Þar er tekist á um hæð veðrahvarfanna - hafið hitar loftið og belgir veðrahvolfið út - en ískalt loft berst sífellt úr vestri og dregur þau niður. Í suðurjaðri kalda loftsins er gríðarlegur vindstrengur. Þar myndast smábylgjur og sé rýnt í kortið má sjá að jafnhæðar- og jafnþykktarlínur falla ekki saman.

Á kortið hafa verið settar inn þrjár örvar sem sýna misgengi af þessu tagi. Bylgja í þykktarmynstrinu gengur inn til móts við lægri hæð þrýstiflatarins. Þar undir eru lægðir við sjávarmál. Áður en tölvuspár komu til sögunnar sáust þessar bylgjur oft vel - en mjög erfitt var að spá fyrir um þróun þeirra. Það er á mörkunum að það takist með fullkomnustu reiknilíkönum okkar daga.

Evrópureiknimiðstöðin sendir bylgjurnar tvær á Atlantshafi til norðausturs fyrir suðaustan land - sem fárviðrislægðir - sú fyrri fer hjá á laugardagskvöld - en sú síðari sólarhring síðar. Rétt er að fylgjast vel með þessum lægðum. Þriðja bylgjan er á kortinu vestur við Mississippi og rennur til austurs. Hún á eftir að mæta kalda loftinu, Atlandshafinu og hlýju lofti að sunnan á leið sinni til okkar. Lægð hennar er ekki orðin til þegar þetta er skrifað - skyldi reiknimiðstöðin hitta á rétt svar? Hún stingur nú upp á þriðjudagskvöldi sem komutíma lægðarinnar til Íslands.

Athugasemdir

[Hilmar Hafsteinsson (IP-tala skráð) 14.12.2013 kl. 08:26]

1. Yfir 2000 kuldamet féllu í USA í vikunni.

2. Fyrsta snjókoma í Kaíró í Egyptalandi í 112 ár!

3. Mesta snjókoma í Jerúsalem í 60 ár!

[Emil Hannes Valgeirsson, 14.12.2013 kl. 11:33]

Takk fyrir að halda okkur upplýstum Trausti - og Hilmar líka.
Svo má bæta við að samkvæmt nýútgefnum tölum frá NASA-GISS var síðastliðinn nóvember sá hlýjasti á jörðinni frá upphafi mælinga. Munar þar mestu um víðfeðm vetrarhlýindi í gjörvallri Síberíu.

http://data.giss.nasa.gov/gistemp/tabledata_v3/GLB.Ts+dSST.txt

[Sveinn Atli Gunnarsson, 14.12.2013 kl. 16:10]

Já Emil - það er alltaf gott að skoða heiminn allan þegar hnattrænn hiti er skoðaður og nóvember hefur verið mjög hlýr samkvæmt NASA-GISS, hvað sem líður kuldametum í BNA og snjókomu við Miðjarðarhafið. Reyndar má hugsa sér að þessir öfgar í veðri í BNA og við Miðjarðarhaf geti verið afsprengi breytinga í loftslagi (það er allavega ekki hægt að útiloka það).

[Hilmar Hafsteinsson (IP-tala skráð) 14.12.2013 kl. 16:14]

Það snjóar greinilega ekkert hjá Nössurunum og Gissurunum Emil og Svatla þessa stundina :)

[Emil Hannes Valgeirsson, 14.12.2013 kl. 16:51]

Jú, eitthvað snjóar. Nenni þó ekki í snjókast.

[Sveinn Atli Gunnarsson, 14.12.2013 kl. 19:30]

Tja, hér snjóaði í dag - en merkilegra er þó að þeir sem ekki hafa rökin á takteinum telja að það sé nóg kalla fólk nöfnum til að leggja fram sína hlið mála - jæja, svo sem ekki í fyrsta skipti sem slíkt sést frá ákveðnum aðila.

[Hilmar Hafsteinsson (IP-tala skráð) 14.12.2013 kl. 20:33]

Félagi Svatli alltaf í jólaskapi :) Er erfitt að höndla stöðuga snjókomu fram að jólum í höfuðborginni? Það er svo alltaf jafn kómískt þegar leigupenni soravefsins skepticalscience.com telur sig umkominn að brígsla öðrum um rökleysu:

> http://dailycaller.com/2013/12/05/report-scientists-predict-a-century-of-global-cooling/

[Sindri Karl Sigurðsson, 15.12.2013 kl. 00:23]

Ekki dettur mér í hug að detta í ykkar kviksyndi og pappakassahernað, elsku vinir. Mig langar aftur á móti að hrósa Trausta enn og aftur fyrir að reyna að kenna mér meira í veðurfræði en það sem stendur í "veðurfræðiskruddunni" hans. Það er greinilega alltaf hægt að rífast um veðrið, það er örugglega ekki eins frá mínum hóli og einhverjum öðrum. Ég hef mínar skoðanir á því sem menn rífast um í dag, ber þær á torg þegar það á við, en helst ekki á blogginu hans Trausta. Held að þar sé best að lesa og læra...

Gleðileg jól Trausti og þakka fyrir góða upprifjun á veðurfræðinni, það hefði nú verið gaman að hafa þessar upplýsingar allar saman, fyrir 20 árum eða svo, þegar maður var að kynna sér þessi fræði.

kv.