Botninn sleiktur

Eins og getið var um á þessum vettvangi fyrir nokkrum dögum var dægurlágmarksmet fyrir byggðir landsins slegið aðfaranótt þess 1. ágúst. Aðfaranótt þess 5. var landslágmarksmet þess dags jafnað þegar hiti á sjálfvirku stöðinni á Grímsstöðum fór niður í -1,6 stig. Þetta síðara met lá reyndar vel við höggi því það er ívið hærra heldur en met þeirra daga sem næst liggja.

Síðastliðna nótt (aðfaranótt þriðjudags þ.6.) fór lágmarkshitinn býsna neðarlega í Reykjavík, mældist 4,2 stig á mönnuðu stöðinni. Það er óvenjulágt lágmark í Reykjavík í fyrri hluta ágústmánaðar og mun t.d. vera það lægsta á þessum ákveðna degi í meir en 60 ár og ekki langt frá dægurmeti mannaðra en það er 3,8 stig - frá flatneskjusumrinu 1921. Ágúst það ár á líka dægurlágmarksmet í Reykjavík þann 8. og þann 10. auk þess 6.

Á sjálfvirku stöðinni á Veðurstofutúni fór lágmarkshitinn reyndar niður í 3,9 stig - nærri því niður í metið, sama lágmark mældist á hinni sjálfvirku stöðinni á Túninu. Á sjálfvirku stöðinni á flugvellinum fór lágmarkshitinn niður í 2,2 stig.

Óvenjuþurrt var í Reykjavík nóttina köldu og daggarmark undir -2°C, frost var við jörð sums staðar í borginni. Þegar þetta er skrifað rétt eftir miðnætti á þriðjudagskvöldi er hitinn á veðurstofutúni kominn niður í 7,5 stig - það sama og var sólarhring áður - og enn er léttskýjað. Daggarmark er hins vegar um +5 stig - það dregur úr líkum á því að jafnkalt verði í nótt og þá fyrri - nema að nýtt og þurrara loft streymi niður úr heiðalöndunum umhverfis borgina.

Athugasemdir

[Hilmar Hafsteinsson (IP-tala skráð) 7.8.2013 kl. 09:13]

Dægurlágmarksmet slegin, jöfnuð og sleikt á síðsumri 2013 - hver er skýringin? Er að kólna á Íslandi?

[Hermundur Sigurdsson (IP-tala skráð) 7.8.2013 kl. 16:37]

Sælir Trausti.Hver var meðalhitinn í Reykjavík í siðastliðnum júli samborið við 1960-1990 og 1995-2012. Erum við að sjá nýtt kuldamet?

[Hilmar Hafsteinsson (IP-tala skráð) 7.8.2013 kl. 19:44]

Samkvæmt frétt mbl. í dag, 7. ágúst, hefur talsvert borið á hafís norðan við landið síðustu daga, þar á meðal er myndarlegur borgarísjaki sem marar úti fyrir Hornbjargi. Mun meira er af ísjökum á hafíssvæðinu í sumar en síðustu ár og eru sjófarendum bent á að sýna sérstaka aðgát. Er hugsanlega að kólna á Íslandi?

[Emil Hannes Valgeirsson, 7.8.2013 kl. 20:50]

Samkvæmt mínum hafísrannsóknum er óvenjulítill hafís austur af Grænlandi. Borgarís kemur hinsvegar af Grænlandsjökli.

[Trausti Jónsson, 8.8.2013 kl. 01:29]

Hilmar. Í meðalári eru 2 til 3 dægurhitamet hvors kyns um sig slegin í Reykjavík - þau eru hins vegar óvenjulegri heldur en landsdægurmetin. Hermundur, meðalhiti í júlí var 0,3 stigum ofan meðallagsins 1961 til 1990 hér í Reykjavík, en 0,8 stigum undir meðaltali áranna 1995 til 2012. Kuldamet eru víðs fjarri hvað hita í júlí áhrærir, hitinn nú er t.d. 2,4 stigum hærri heldur en var í júlí 1983. Fleira um júlímánuð 2013 má lesa í yfirliti Veðurstofunnar. Hilmar, eins og Emil bendir á er hafís með minnsta móti í Grænlandssundi þetta sumarið, en borgarísjakar eru að sögn kunnugra heldur fleiri en í meðalári. Hiti einstakra ára hefur engin áhrif á borgaríssframleiðslu við Norðausturgrænland - hins vegar er talið líklegt að hverfi hafís að mestu úr Austurgrænlandsstraumnum muni borgarís um síðir aukast á svæðinu þar sem talsvert af honum er nú lokað inni í fjörðum norðan við u.þ.b. 75 gráður norður. Hann verður nú að bráðna þar (að neðan) - en hverfi hafís (strangt tekið samfrosinn strandís) af þeim slóðum geti losnað um borgarísinn. Ég hef enn ekki séð neinar spár um slíkt hafísleysi árið um kring næstu áratugina.

[Hilmar Hafsteinsson (IP-tala skráð) 8.8.2013 kl. 12:27]

Trausti. Má skilja svar þitt sem svo að árið 2013 flokkist undir "meðalár" hjá Veðurstofu Íslands? Ef svo er hvaða meðaltal er þá viðmiðunin? 1995 - 2012 eða 1961 - 1990 - eða eitthvað allt annað? Vek vinsamlegast athygli þína á því að það sem af er ágúst 2013 er meðalhiti í Reykjavík 0,4°C lægri en meðalhiti ágústmánaða kuldaskeiðið 1961 - 1990. Telst það ekki vísbending um kólnun?