Kaldast í Reykjavík (að tiltölu)?

Hægt er að setja tölur fram á ýmsa vegu. Við lítum nú aðeins á síðustu fimm júlímánuði - og aðeins fyrstu 17 daga þeirra, reiknum út meðaltal og berum saman við fyrstu 17 daga júlímánaðar 2013. Þá fæst eftirfarandi tafla:

Meðalhiti fyrstu 17 daga júlímánaðar 2013 og samanburður við sömu daga árin 2008 til 2012

	mh17	m2008 til 2012	vik	hæst	lægst		NAFN
1395	9,79	12,14	-2,35	16,1	1,8		Eyrarbakki
1475	9,63	12,52	-2,89	17,0	4,1		Reykjavík
1779	9,74	11,98	-2,24	17,2	3,0		Hvanneyri
2050	9,32	11,14	-1,82	15,4	4,2		Stykkishólmur
2738	8,62	10,27	-1,65	19,2	3,4		Bolungarvík
3433	9,95	10,87	-0,92	23,5	3,4		Sauðárkrókur flugvöllur
3471	9,89	10,85	-0,96	23,6	4,5		Akureyri - Krossanesbraut
4019	8,36			21,7	0,9		Upptyppingar
4060	11,29	10,51	0,78	26,0	3,7		Hallormsstaður
4193	9,45			17,8	5,6		Dalatangi
4271	10,95	10,14	0,81	26,1	4,3		Egilsstaðaflugvöllur
4300	8,92	10,29	-1,37	22,0	2,2		Mývatn
5544	9,84	10,37	-0,53	15,5	3,3		Höfn í Hornafirði
5872	9,58			18,2	3,5		Teigarhorn
5988	9,03	8,02	1,01	16,9	4,4		Vattarnes
6012	9,44			12,7	7,2		Surtsey
6015	9,60	11,74	-2,14	12,5	5,7		Vestmannaeyjabær
6017	8,80	11,06	-2,26	12,3	5,5		Stórhöfði
6272	10,64	11,80	-1,16	18,0	2,0		Kirkjubæjarklaustur - Stjórnarsandur
6420	9,61	12,46	-2,85	17,1	1,3		Árnes
6657	7,04	9,11	-2,07	17,9	-0,7		Veiðivatnahraun
6935	6,47	8,94	-2,47	16,1	0,1		Hveravellir
	9,24	10,64	-1,40	26,1	-0,2		Landið allt (byggðir)

Fyrsti dálkurinn er númer stöðvarinnar, síðan kemur meðalhiti fyrstu 17 daganna í ár, þar næst meðalhiti sömu daga á árunum 2008 til 2012. Þarnæst er mismunur þessara dálka (hitavik), hæsti hiti dagana 17 í ár og lægsti hiti sömu daga. Linan endar á nafni stöðvarinnar. Síðasta línan sýnir landsmeðaltal. Aukastafir eru tveir til þess að metingur sé sem auðveldastur.

Vikin eru mest (neikvæð) á Suðvesturlandi - og hæsta talan reyndar í Reykjavík, -2,89 stig. Ekki furða að mönnum bregði við - miðað við síðustur ár. Hiti er yfir meðaltalinu á Austurlandi það sem af er mánuði, hæsta mesta vikið þar er +1,01 stig, á Vattarnesi. Á Egilsstöðum og Hallormsstað er jákvæða vikið um 0,8 stig. Landsmeðalvik er -1,4 stig.

Að jafnaði voru fyrstu 17 dagar júlímánaðar á landinu öllu þessi ár um 0,3 stigum kaldari heldur en mánuðurinn í heild.

En - munum að júlímánuðir áranna 2008 til 2012 voru sérlega hlýir í langtímasamhengi og þá sérstaklega á landinu suðvestanverðu. Tímabilið er valið til þess að vikin í þessum landshluta sýnist sem mest.

Athugasemdir

[Pálmi Freyr Óskarsson, 18.7.2013 kl. 01:40]

Sæll Trausti.

Ég ætla minna þig á að sjálfvirki hitamælirinn á Stórhöfða fær stökum sinnum einkennilega "kulda og hitakast". Það að segja  að hann slær í 1,0°C eða 19,0°C. Og þarna á listanum fékk hann "kuldakast" eða 1,0°C.

[Trausti Jónsson, 18.7.2013 kl. 11:24]

Þakka þér fyrir Pálmi, ég hélt ég hefði verið búinn að laga þetta - en greinilega ekki.

[Hilmar Hafsteinsson (IP-tala skráð) 18.7.2013 kl. 22:34]

Svo er líka hægt að viðurkenna heiðarlega að júlímánuður 2013 hefur verið óvenju kaldur í Reykjavík, það sem af er - mun kaldari en aðrir júlímánuðir á þessari öld meintrar "óðahlýnunar" og einni gráðu kaldari en meðalhiti júlímánaðar í Rek. 1961 - 1990.

Er óðakólnun að skella á Íslendingum? . . .