Daufur 17. júní ?

Varla er hægt að segja að veðurspá fyrir þjóðhátíðardaginn sé vond - kannski veðrið komist nálægt því að vera svosem ekki neitt. Hafátt er sjaldan hlý um hásumar sé jafnframt skýjað. Svo eru líkur á síðdegisskúrum inn til landsins. Íbúar Norður- og Austurlands eru að sögn heldur betur settir - e.t.v. nægir suðvestanáttin þar til að halda þokuloftinu úti á sjó - fari svo verður hiti þar meiri en 15 stig þar sem best lætur. En lesendur eru hvattir til þess að lesa textaspár á vef Veðurstofunnar - á þeim bæ er fylgst mun betur með heldur en hér á hungurdiskum.

En við lítum samt á hefðbundið spákort sem gildir kl. 15 síðdegis þann 17. júní.

w-blogg160613

Þarna má sjá að sunnanátt er spáð yfir landinu í heild - von til þess að hún verði hafgolubani nyrðra. Sjá má lægð á suðvestanverðu Grænlandshafi, sú hreyfist austur og þess vegna fylgja henni engin hlýindi. Þau virðast ekki heldur eiga að fylgja lægðinni þar á eftir (yfir Austur-Kanada á kortinu) því hún á að fara svipaða leið og sú fyrri síðar í vikunni.

Hlýtt loft er víðs fjarri. Það má þó sjá yfir Alpalöndum á kortinu - hiti í 850 hPa er þar yfir 20 stig. Svo virðist sem mjög snörp hitabylgja sé í pípunum þar um kring því þykkt er spáð upp undir 5760 metra um og fyrir. En hún stendur e.t.v. ekki nægilega lengi við til að met fari að falla.


« Síðasta færsla | Næsta færsla »

Athugasemdir

1 identicon

"Hlýtt loft er víðs fjarri" og það á sjálfan þjóðhátíðardag Íslendinga, 17. júní. Nánast sumarsólstöður og sólin hæst á lofti.

Þetta fer á minna á kalárin miklu Trausti! ;)

Hilmar Hafsteinsson (IP-tala skráð) 16.6.2013 kl. 02:45

2 identicon

Sælir. Það er greinilega erfitt að spá um veður á Íslandi. Í dag, 16. júní spáði Veðurstofan sólríku veðri í Reykjavík, í raun á öllu Faxaflóasvæðinu. Nú er klukkan 12 og þétt skýjahula yfir öllu og þokuslæðingur á víð og dreif :)

Hermundur Sigurdsson (IP-tala skráð) 16.6.2013 kl. 11:25

3 identicon

Sæll Hermundur. Ég var staddur í dal einum á Faxaflóasvæðinu í gær 16 júní. Þar skein sólin linnulítið allan daginn. Eflaust átti annað við með ströndum.

Óðinn (IP-tala skráð) 16.6.2013 kl. 17:23

4 identicon

Afsakið. Ég fór dag fram úr mér.

Óðinn (IP-tala skráð) 16.6.2013 kl. 17:25

5 Smámynd: Emil Hannes Valgeirsson

Sjálfvirku spárnar ráða greinilega ekki við þetta þokuloft hér á Faxaflóanum, enda hvetur Trausti menn til að lesa manngerðu textaspárnar. Á spásíðu veður.is er líka sagt að textaspáin gildi ef munur er á textaspá og sjálfvirkum spám! (já, með upphrópunarmerki)

Sjálfvirku norsku spárnar á yr.no sem margir vitna í spáðu einnig sól eða hálfsól í Reykjavík í dag.

Hinsvegar má velta fyrir sér hvort ekki sé réttara að myndgera manngerðu spána á spásíðunum og hafa þær meira áberandi frekar en sjálfvirku.

P.s. Er hlýtt loft ekki meira og minna aðflutt fyrirbæri á hér Íslandi og aðstreymi þess háð ýmsum duttlungum, hvort sem það er þjóðhátíðardagur eða einhver annar dagur ársins?

Emil Hannes Valgeirsson, 16.6.2013 kl. 18:30

6 identicon

Ef marka má langtímaveðurspá (http://weatherspark.com) þá er ljóst að það sem eftir lifir júní 2013 verður svalt, blautt og sólarlítið, bæði í Reykjavík og á Akureyri.

Hámarkshiti á Akureyri verður á bilinu 8 - 15°C en lágmarkshiti 5 - 9°C. Hámarkshiti í Reykjavík verður á bilinu 10 - 13°C og lágmarkshiti 6 - 8°C.

Ef fram heldur sem horfir stefnir í týnda sumarið 2013 á Íslandi. Þá er gott fyrir heimilisveðurfræðinga (uppáhaldið hans Trausta) að geta kennt varanlegum skorti á "aðfluttu fyrirbæri" um ósköpin. :)

Hilmar Hafsteinsson (IP-tala skráð) 16.6.2013 kl. 22:28

7 Smámynd: Emil Hannes Valgeirsson

Innflutningshöft á hlýju lofti frá Evrópusambandinu eru allavega ekki vænleg til árangurs að sumarlagi.

Emil Hannes Valgeirsson, 17.6.2013 kl. 00:19

8 Smámynd: Trausti Jónsson

Emil. Ekki kann ég að myndgera textaspár öðru vísi en gert er með veðurkortum - myndgerð textaspá - er það ekki hálfgerð þversögn? Hlýtt loft er langoftast aðflutt. Það er helst rétt í kringum sólstöðurnar sem sólin getur hjálpað til með heimagerðan hita - ef hún fær til þess algjöran frið - hann fæst sjaldan.

Trausti Jónsson, 17.6.2013 kl. 01:41

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Apríl 2024
S M Þ M F F L
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Nýjustu myndir

  • w-blogg230424
  • Slide10
  • Slide8
  • Slide6
  • Slide5

Heimsóknir

Flettingar

  • Í dag (24.4.): 265
  • Sl. sólarhring: 417
  • Sl. viku: 1581
  • Frá upphafi: 2350050

Annað

  • Innlit í dag: 236
  • Innlit sl. viku: 1439
  • Gestir í dag: 233
  • IP-tölur í dag: 225

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband