Hlýr dagur

Mánudagurinn (10.júní) var hlýr á landinu, hlýjasti dagur ársins á um 40 prósentum allra veðurstöðva á landinu þar á meðal Skjaldþingsstöðum í Vopnafirði þar sem hitinn komst í 22,8 stig á sjálfvirku stöðinni [21,5 á þeirri mönnuðu]. Það er hæsti hiti sem mælst hefur á landinu það sem af er ári.

Í Reykjavík mældist einnig hæsti hiti ársins til þessa, 17,7 stig á sjálfvirku stöðina við Veðurstofuna. Á Reykjavíkurflugvelli fór hitinn í 18,2 stig, 18,1 á Geldinganesi og einnig 18,1 á Skrauthólum.

Í viðhenginu er listi um hæsta hita það sem af er ári á öllum sjálfvirkum stöðvum, raðað er frá hæsta hámarkshita til þess lægsta. Hiti hefur enn ekki farið upp fyrir 7,8 stig á Þverfjalli - vestra, komst hæst í þá tölu í gær, sunnudaginn 9. Listann geta áhugasamir límt inn í töflureikni og raðað honum þar að lyst.

Sé farið í saumana á listanum kemur í ljós að á honum eru nokkrar eftirlegukindur. Einkennilegust þeirra er talan frá Dalatanga, 15,7 stig. Svo hátt fór hitinn þar 1. mars en ekki hærra síðan. Engin stöð liggur eftir með hæsta hita ársins í apríl, en níu stöðvar eiga enn eftir að gera betur heldur en hámark maímánaðar.

Þar má t.d. sjá Grindavík, Bláfjöll, Stórhöfða, Surtsey og Skarðsfjöruvita - suðurströndin á greinilega eftir að bæta sig. Talan á Skálafelli frá 8. maí er einkennilega há en hefur ekki enn verið afskrifuð. Sama má segja um töluna af Seljalandsdal frá 9. maí - hún er mjög grunsamleg.

Ekki er gert ráð fyrir því að næstu dagar verði jafngæfir á hita og dagurinn í dag. Vel má þó vera að sumar veðurstöðvar geri samt enn betur í vikunni en þær hafa gert hingað til. Þykktin á alla vega að haldast yfir 5400 metrum út vikuna. Það gæti verið betra - en þar sem meðalþykkt í júní [1981 til 2011] er aðeins 5420 metrar megum við sæmilega við una.

Skrár tengdar þessari bloggfærslu:

• hæsti-hiti-2013-til-þessa

Athugasemdir

[Sigurður Þór Guðjónsson, 11.6.2013 kl. 00:51]

Það geisar nú ámáttlegur kvörtunarfaraldur á fasbók um það að ekki sé komið neitt sumar.

[Trausti Jónsson, 11.6.2013 kl. 01:10]

Ég sé lítið af slíkum faröldrum mín megin á feisbúkk - til allrar hamingju. En í loftinu liggja spurningar svipaðs eðlis - maður trúir vart eigin eyrum - og ekki nema 10. júní. Það eru þegar komnir nokkrir góðir sumardagar - gerðust vart fleiri allt sumarið þegar verst lét á árum áður.

[Hilmar Hafsteinsson (IP-tala skráð) 11.6.2013 kl. 01:32]

Ehm... "Það eru þegar komnir nokkrir góðir sumardagar - gerðust vart fleiri allt sumarið þegar verst lét á árum áður."(sic)

Ertu að lýsa dæmigerðum sumarmánuðum á 17., 18., 19. eða 20. öld Trausti? :)

[Pálmi Freyr Óskarsson, 11.6.2013 kl. 04:04]

Sumarið er allavega ekki komið hér í Vestmannaeyjum.

Spurning til þín Trausti.  Á mánaðaryfirlit hér frá Stórhöfða að vera svona framvegis á þessari síðu V.Í.? Þ.a.s. NA-að allt nema úrkomuna. Eða er þetta enn eitt tæknivandamálið hjá tölvu"köllunum"? Eða er þetta að finna kannski einhverstaðar á örðum stað.

Ef svarið er tæknivandmál hjá þér, þá hendi ég spurningunni til tölvudeildar.

[Ágúst H Bjarnason, 11.6.2013 kl. 08:29]

Hvað er gott sumar?

Þurrt, sólríkt og hlýtt?  Sóldýrkendur brenna og gróðurinn visnar.  Ekki er það gott.

Rakt og milt?  Sóldýrkendur sleppa við að brenna og gróðurinn dafnar vel.   Mun betra.

En, hafið þið tekið eftir hve svalur maímánuður var á heimsvísu...rétt yfir meðaltali síðustu 30 ára:
http://www.thegwpf.org/rss-satellite-data-close-30-year-average/
http://www.drroyspencer.com/2013/06/uah-global-temperature-update-for-may-2013-0-07-deg-c/
Er það ekki bara gott?

Það er óþarfi að kvarta yfir veðrinu.

[Sindri Karl Sigurðsson, 11.6.2013 kl. 15:36]

Já það er auðvellt að kvarta yfir veðrinu. Ekki kvarta ég þó svo að austan áttin sé mætt á Austfirðina. Hún varði nú ekki nema í 1/2 ár hérna hjá okkur í fyrra. Smá rok og rigning er nú ekkert nýtt í Reykjavík, reyndar man ég nú ekki eftir öðru á mínum uppeldisárum úr Garðabænum en hæfilega blautum sumrum með örfáum dögum yfir 15 stigum.

[Trausti Jónsson, 12.6.2013 kl. 01:35]

Pálmi. Þetta uppgjör fyrir Stórhöfða sem þú vísar til verður svona áfram. Vonandi sjá vefmenn sér fært að bæta hita og vindi við síðar - skýjahula er horfin veg allrar veraldar. Ágúst - ég horfi ekki á óþekkta tengla hér á blogginu - vonandi að aðrir njóti þeirra. Svo virðist sem dagur sé nú almennt talinn til sumars ef sólin skín og skjól er sunnan undir vegg - aðrir mælikvarðar eru löngu horfnir - hafi þeir þá einhvern tíma verið aðrir. Sindri - mér sýnist minni þitt úr Garðabænum vera nokkuð gott og raunsætt.

[Pálmi Freyr Óskarsson, 12.6.2013 kl. 02:17]

Mér datt svo sem í hug að skýjahulan verði NA-að hér eftir. Gott að heyra að vefmenn eigi eftir að bæta hinu við. Þá sé ég fram á að geta grúska ennþá mánaðarlega í þessum tölum.

[Hilmar Hafsteinsson (IP-tala skráð) 12.6.2013 kl. 09:11]

Hlýtungustefna Trausta Jónssonar er alþekkt svo og að hann telur sig ekki geta nýtt sér "villta" né "óþekkta" tengla. :)

Árið 1990 sögðu Sameinuðu þjóðirnar að hitastig myndi óhjákvæmilega hækka um 0,5°C á tímabilinu 1997 - 2013. Þessi yfirlýsing leiddi til Kyoto- samkomulagsins þar sem iðnveldi heims hétu því að draga úr losun CO2 og breskir skattborgarar (m.a.) voru neyddir til að greiða billjónir punda í grænan orkuiðnað.

Nú vil ég vinsamlegast biðja Trausta að svara því hvað hitastig jarðar (þú manst "óðahlýnunina" Trausti) hefur hækkað á þessu umrædda tímabili:

a) 1,25°C

b) 0,75°C

c) 0°C

[Axel V. Birgisson (IP-tala skráð) 12.6.2013 kl. 11:36]

Trausti, örlítið smásmugulegt kvart og kvein eins og venjulega en átti færslan hjá þér ekki að vera að "hæsti hiti ársins til þessa í Reykjavík mældist 18,2 stig á Reykjavíkurflugvelli" og tilgreina síðan hvað mældist á Bústaðaveginum og jafnvel á öðrum stöðvum? Ég hef aldrei almennilega skilið afhverju hæsti hiti í Reykjavík skv. Veðurstofunni sé ávallt miðaður við stöðina við Bústaðaveg þótt hiti í "Reykjavík" sé hugsanlega hærri annars staðar í borginni.

[Trausti Jónsson, 12.6.2013 kl. 23:29]

Hilmar. Ef þú sendir mér hitaröðina (ár fyrir ár) sem þú ert með í huga skal ég reikna leitnina út. En þarf sífellt að vera að taka fram að 16 ár eru allt of stuttur tími til leitnireikninga - það eru líka 30 ár. Út úr slíku getur komið alls konar glóruleysi eins og þið þeir kolsýringsofsóttu klifið stöðugt á (og réttilega). Axel. Stöðin á veðurstofutúninu heitir Reykjavík - en mætti mín vegna heita Reykjavík - Bústaðavegur 7 til 9 (Bústaðavegurinn er svo langur). Við vitum aldrei hver hæsti hiti í sveitarfélaginu Reykjavík hefur verið þann eða hinn daginn. Kannski 1100 stig í einhverjum glerofninum.

[Hilmar Hafsteinsson (IP-tala skráð) 12.6.2013 kl. 23:55]

Þakkir fyrir tilraun til svars Trausti, en rétta svarið er hins vegar c) liður, þ.e. 0°C, en það vissir þú nú væntanlega sjálfur. ;)

Grundvöllur Kyoto- bókunarinnar hefur m.ö.o. reynst vera rangur. Það sem meira er, grundvöllur kolefnistrúarbragðanna hefur líka sýnt sig að vera rangur, þ.e. meint áhrif aukningar CO2 í andrúmslofti á svonefnda "óðahlýnun".

Nú skyldi maður ætla að virðulegir vísindamenn á Veðurstofu Íslands væru vakandi og sofandi í þeirri viðleitni að vara Íslendinga við trú á veðurbábiljur, en því miður virðist þið hafa tekið, nokkuð samhljóma, undir kór kolefniskirkjunnar í seinni tíð.

Ekki hefur þessi samsöngur ykkar alltaf verið jafn afdráttarlaus. Ég má til með að minni þig á ágæta grein Borgþórs H. Jónssonar, "Kólnandi veðurfar"(!) í 1. tölublaði Veðurs, 21. árgangi 1978.

Þar hrekur þessi ágæti veðurfræðingur hindurvitni kolefniskirkjunnar og segir m.a: "Af því, sem nú hefur verið ritað, verður að telja, að kolsýringskenningin um hækkandi hitafar samfara vaxandi kolsýringsmagni andrúmsloftsins sé vafasöm, a.m.k. hvað viðvíkur Íslandi." ;)