Opin staða í nokkra daga

Lægðasvæðið djúpa suður í hafi (sérlega djúpt miðað við árstíma) sendir nú úrkomukerfi í átt til landsins. Þegar þetta er skrifað (seint á laugardagskvöldi) eru lægðarmiðjurnar orðnar tvær og eiga að snúast í kringum hvora aðra næstu daga jafnframt því að hreyfast til norðausturs fyrir suðaustan land. Norðanáttin heldur því áfram - verður þó eitthvað austlægari meðan kerfið er sunnan við land.

Það er þónokkur ruðningur í þessu og ekki ljóst hvað úr verður síðar í vikunni. Við lítum á norðurhvelskort sem sýnir hæð 500 hPa flatarins (heildregnar línur) og þykktina (litafletir) eins og evrópureiknimiðstöðin ætlar hana verða um hádegi á mánudag (15. apríl).

Ísland er rétt neðan við miðja mynd en hún sýnir norðurhvel jarðar suður fyrir 30. breiddarbaug. Við sjáum gríðarbreitt lægðardrag ná vestan frá Kanada alveg til Evrópu. Sú breyting hefur orðið frá stöðunni að undanförnu er að heimskautaröstin sveigir nú til norðausturs um Bretlandseyjar og Skandinavíu. Mikill kuldapollur er við norðurskautið - en hefur grynnst áberandi mikið á undanförnum vikum. Rétt grillir nú í fjólubláa, kaldasta litinn - en hann mun næstu vikurnar koma og fara á víxl.

Lítill vindur er í háloftunum yfir Íslandi (jafnhæðarlínur mjög gisnar) en vanir kortalesendur sjá greinilega að þykktarbratti er töluverður (litir eru þéttir - það sést betur sé kortið stækkað) á þeim slóðum. Þykktarbratti án vinds í háloftum táknar að vindur er því meiri í neðstu lögum - hér úr norðaustri. Norðaustanáttin heldur því áfram.

Loftþrýstingur hefur verið óvenjuhár á annan mánuð - þessa vikuna verður hann hins vegar lágur. Einhver tilbreyting í því? Loftþrýstifallið er reyndar hluti af talsverðu losi á heildarhringrásinni og meðan breytingin gengur yfir er staðan opnari heldur en verið hefur. Um mánaðamótin mars-apríl í fyrra hrökk hringrásin milli gíra, eftir 14 mánaða sunnanátt skipti yfir í norður og austur. Skyldi breyting verða nú?

 

Athugasemdir

[Óskar J. Sigurðsson (IP-tala skráð) 14.4.2013 kl. 22:14]

Sæll Trausti.  Getur þú sagt mér hvað olli því að hiti steig um nokkur stig í örskotsstund í hægviðri á tveimur sjálfvirkum veðurstöðvum í gær 13. apríl? Þetta var í Grímsey í 5,6 stig milli kl 14 og 15 og á Mánárbakka í 4,3 stig milli kl 13 og 14 og aftur milli 16 og 17 þá í 6,2 stig. Hvor tveggja mesti hiti dagsins á landinu. Á mannaðri stöð á Mánárbakka mældist hámark dagsins aðeins 2,6 stig.        Kv.   Óskar.

[Dr. HAARP (IP-tala skráð) 14.4.2013 kl. 22:37]

http://www.wanttoknow.info/war/haarp_weather_modification_electromagnetic_warfare_weapons

[Trausti Jónsson, 15.4.2013 kl. 01:19]

Þakka ábendinguna Óskar. Ég þarf að líta betur á aðstæður fyrir norðan til að átta mig betur á þessum hámörkum. Ég sé þó strax að þetta gerðist víðar heldur en á stöðvunum tveimur sem þú nefnir. t.d. í Ólafsfirði og Siglufirði. Hæsti hiti sem mældist í þessari „hitabylgju“ var í Hafnarfjalli við Siglufjörð - þar fór hitinn í 7,4 stig. Mæliaðstæður við stöðvarnar í snjóflóðavarnarvirkjunum eru þó ekki sambærillegar við aðrar stöðvar - og ekki víst að hitinn hefði farið svona hátt við staðalaðstæður. Standi svona hitasveiflur yfir í mjög skamman tíma er ekki víst að þær komi fram á venjulegum hámarksmæli í skýli - loftskipti eru hægari í skýlunum heldur en í hólkunum á sjálfvirku stöðvunum.

[Sigurður Þór Guðjónsson, 15.4.2013 kl. 01:44]

Var einmitt að pæla líka í þessum undarlegu hámörkum.

[Sigurður Þór Guðjónsson, 16.4.2013 kl. 13:24]

Það hafa reyndar verið undarlegar mælingar á sveimi undanfarið. Á Bláfeldi var hámark þ. 9. á kvikasilfrinu talið 9,2, en var um 3 stig á sjálfvirka mælinum. man það ekki nákvmlega. Hvergi annars staðar mældist meira en 7 stig og það var á suðurlandi. Í morgun var úrkoman talin 35,0 mm á Lambavatn, sem manni finnst undarlegt,  og talsvert hefur verið um 99,9 mm eða einhverjar svoleiðis úrkomumælingar hér og hvar og ýmsar aðrar úrkomumælingar sem manni finnst stinga í stúf.