Meinlaust aprílveður

Þetta meinlausa veður í dag (laugardag) verður víst að flokkast undir kulda. Hámarkshiti á landinu rétt skreið yfir 5 stig og lægsta lágmarkið um -20 stig (á Brúarjökli). Á miðnætti var -14 stiga frost á Grímsstöðum á Fjöllum og frost á láglendi um nánast allt land. Dægursveifla var lítil um landið vestanvert í skýjuðu veðri og norðaustanlands dregur snjórinn úr dægursveiflunni þar sem hann liggur. En vindur er hægur og veðrið því meinlaust (að slepptri laumulegri hálku sem varast ber).

Spákort morgundagsins (sunnudags 7. apríl klukkan 18) er líka rólegt að sjá. Það er fengið úr hirlam-líkani því sem danska veðurstofan rekur.

Mikið háþrýstisvæði er í námunda við Ísland og norður í höf en kröftug en þó minnkandi lægð suður af Grænlandi. Enn er frekar svalt í Evrópu, snjókomu spáð í Skotlandi og Írum þykir kalt - írska veðurstofan varar við kulda í nótt. Þýska veðurstofan er einnig í kuldagír. Þegar nánar er að gáð sjáum við -5 stiga jafnhitalínuna (blá strikalina) þvælast yfir Bretlandi og suður á Þýskaland.

Við sitjum við -10 línuna, hún er rétt norðan við land á kortinu. Þetta breytist lítið á mánudaginn í námunda við okkur. Á þriðjudaginn færist kuldinn í aukana og vindur vex, en ekki er enn hægt að sjá hvort hægt verður að tala um hret. Orðið felur í sér eitthvað meira heldur en hita rétt undir meðallagi og hægan vind. Páskarnir eru liðnir þannig að ekki er hægt að tala um páskahret - ætli hrafnahret sé það næsta í langri röð vorhretanafna?

Spár í dag (laugardag) eru heldur vægari varðandi hretið heldur en var í gær (sjá næsta pistil á undan þessum) - vonandi heldur sú þróun áfram. En það munar samt um 4 til 5 stiga kólnun frá því sem var í dag og öllu meiri vind.

Athugasemdir

[Pálmi Freyr Óskarsson, 7.4.2013 kl. 01:45]

Ég bíð enn eftir að fá tölfræðina frá þér Trausti sem bað um daginn.

[Trausti Jónsson, 7.4.2013 kl. 02:06]

Ég er ekki í sambandi við gagnagrunn Veðurstofunnar nema í vinnunni - þannig að þú verður að bíða rólegur.

[Pálmi Freyr Óskarsson, 7.4.2013 kl. 02:18]

Allt í góðu. Ég bíð þá bara sallarólegur enn lengur.

[Þórhallur Pálsson, 7.4.2013 kl. 10:45]

Sæll Trausti!

Ég les pistla þína reglulega með mikilli ánægju.

Sem fullkominn amatör tók ég mig til og bjó til línurit yfir mánaðarmeðalhita á Egilsstöðum frá desember 2010 til mars nýliðins og bar saman við meðaltalstölurnar. Allt frngið úr tíðarfarsyfirlitum Veðurstofunnar. Þá kemur í ljós áberandi frávik sem endurtekur sig öll árin. Hlýinadakaflar síðvetrar með allt að 4 gráðu fráviki.

En sem Héraðsbúi hef ég ekki getað varist þeirri tilfinningu að það verði æ sjaldgæfara hér um slóöir að það komi veruleg hlýindi með suðlægum hér á sumrin. Þá ég við röð daga með hita um eða yfir 20 stiga hita. Sumrin hér einkennast æ meir af austan og norðaustanátt, skýjuðu veðri og fýlu, meðan Faxaflóabúar lofa árgæskuna æ meir. Síðustu tvö ár hafa ribsber ekki náð að þroskast að gagni á minni lóð. Raunar var 2011 árið þegar ekkert sumar kom. Hins vegar var haustið milt.

Það er eins og að lægðabrautirnar sitji fastar sunnan við land og beygi síðan hart í bak og upp Noregshaf.

Erum við að sjá í þessu hegðun sem á sér dýpri rætur ?

Kveðja, Þórhallur ( MA 72 )

[Trausti Jónsson, 9.4.2013 kl. 01:37]

Bestu þakkir fyrir athugasemdina Þórhallur. Sumur hafa verið heldur dauf eystra - enda hafa eins og þú segir austan- og norðaustanáttir verið ríkjandi. Ég á eftir að kíkja betur á hvaða sunnanáttardögum hefur fækkað eða hvort þeim hefur fækkað. Það má að vísu sjá umfjöllun um þessi mál í eldri pistlum hér á hungurdiskum. En Norður- og Austurland hefur þó átt góða daga. Hér er til gamans listi um hæsta hita ársins á landinu síðustu 10 ár. Egilsstaðaflugvöllur er tvisvar á toppnum og þessi landshluti á hæsta hitann í 7 árum af 10.

röð	ár	mán	dagur	klst	hámark		nafn
1	2003	7	18	15	27,1		Hallormsstaður
1	2004	8	11	15	29,2		Egilsstaðaflugvöllur
1	2005	7	23	18	25,9		Búrfell
1	2006	8	3	17	25,7		Ásbyrgi
1	2007	7	9	17	24,6		Hjarðarland
1	2008	7	30	16	29,7		Þingvellir
1	2009	6	29	15	26,3		Egilsstaðaflugvöllur
1	2010	9	4	15	24,9		Möðruvellir
1	2011	7	27	17	24,8		Húsavík
1	2012	8	9	15	28,0		Eskifjörður