Hlýindakeiðin tvö - skrap

Hungurdiskar hafa að undanförnu fjallað um mismun veðurs áratuganna hlýju, 1931 til 1940 og 2001 til 2010. Fyrst var gerður samanburður á meðalhita á Íslandi á skeiðunum tveimur, annar pistillinn fjallaði aðallega um hitafar á Íslandi borið saman við nágrannalönd og heiminn allan, sá þriðji um snjólag og úrkomu og fjórði um vindáttatíðni og þrýstibratta. Líklegt er að þetta verði síðasti pistillinn í samanburðarsyrpunni - þótt enn fleira mætti tína til.

Munur á ársmeðalloftþrýstingi tímabilanna tveggja er sáralítill. Sama má segja um breytileika hans - munur tímabilanna er enginn. Þrýstingur á sumrin er örlitið hærri á síðara tímabilinu en því fyrra - en ívið lægri á vetrum - varla þó marktækt.

Í ritgerðum um hitabylgjur og kuldaköst (fáanlegar á vef Veðurstofunnar) eru skilgreindar hitabylgju- og kuldakastavísitölur - ekki einhlítar. Þar geta þeir fróðleiksþyrstustu sótt skilgreiningarnar. Munur er á vísitölum tímabilanna - sjá töfluna að neðan.

stiki	m6190	m0110	m3140	mism-hlýskeiða
kuldakastavísitala	287,2	211,1	170,4	40,7
hitabylgjuvísitala	65,1	104,2	122,4	-18,2

Tímabilið 1961 til 1990 er sett inn til samanburðar - flestir vita að það var talsvert kaldara heldur en hlýindaskeiðin. Því hærri sem kuldakastavísitalan er því fleiri eru kuldaköstin. Meðalvísitala áranna  1961 til 1990 er mun hærri heldur en gerðist í hlýindunum - og árin 2001 til 2010 eru hærri heldur en 1931 til 1940. Hitabylgjuvístala áranna 1961 til 1990 er miklu lægri heldur en vísitölur hlýskeiðanna. Gamli tíminn hefur vinninginn yfir þeim nýja - hitabylgjur virðast hafa verið fleiri þá heldur en núna eftir aldamótin. Auðvitað getur verið að þetta sé bara suð í stöðvakerfinu - en þetta eru tölurnar hráar á borðinu.

Síðan koma sólskinsstundirnar í Reykjavík og á Akureyri:

stiki	m6190	m0110	m3140	mism-hlýskeiða
Sólskinsstundafjöldi - Reykjavík	1268,5	1454,0	1265,1	188,9
Sólskinsstundafjöldi - Akureyri	1045,0	1038,0	989,5	48,5

Sólskinsstundirnar eru miklu fleiri í Reykjavík á tímabilinu 2001 til 2010 heldur en 1931 til 1940 - munar nærri heilum venjulegum sumarmánuði. Sólskinsstundir á fyrra hlýindaskeiðinu eru þar nákvæmlega jafnmargar og á kalda skeiðinu 1961 til 1990. Á Akureyri er tímabilið 1931 til 1940 líka sólskinsrýrara heldur en 2001 til 2010 - sem er þar jafngilt meðaltali áranna 1961 til 1990.

Að lokum er það hafísinn. Hér er notuð vísitala ritstjóra hungurdiska sem hefur þann kost umfram aðrar ísvísitölur að hún nær allt fram á síðustu ár - en hefur marga ónefnda ókosti.

stiki	m6190	m0110	m3140	mism-hlýskeiða
ísvísitala (mánuðir á ári)	2,7	0,9	1,4	-0,5

Hér er mikill munur á 1961 til 1990 annars vegar og hlýskeiðunum hins vegar. Munurinn á hlýskeiðunum tveimur (hálfur mánuður) er trúlega marktækur. Síðasti áratugur hefur verið einn sá íslausasti sem um getur. Reyndar var áratugurinn 1951 til 1960 enn ísrýrari, með meðalvísitöluna 0,4 mánuði. - En það er önnur saga.

Hitabylgjur og hlýir dagar (ritgerð 2003)

Kuldaköst og kaldir dagar (ritgerð 2003)

Athugasemdir

[Ágúst H Bjarnason, 15.11.2012 kl. 07:34]

Sæll Trausti.

 Ég þykist vita að þú þekkir til þessarar vefsíðu, Not a Lot of People Know That, enda hefur höfundurinn Paul Homewood oft vitnað til þín.  Undanfarið ár eða svo hefur Ísland oft komið við sögu hjá honum, og þá oftast hlýskeiðin tvö sem þú ert að fjalla um.   Ég reyndi að skrapa saman krækjum á þessi skrif og vona að þær virki.

Nýjustu skrifin eru efst og þau elstu neðst.

GISS Double Up On Reykjavik Temperatures

GHCN Temperature Adjustments In Iceland–A Closer Look At Stykkisholmur–Part II

LIA In Iceland Coldest Period For 8000 Years

GHCN Temperature Adjustments In Iceland–A Closer Look At Stykkisholmur–Part I

GHCN’s Arctic Adjustments

GISS Adjustments In Iceland

GHCN Adjustments In Iceland

Who Needs Thermometers When You Have Algorithms?

Reykjavik Temperature Adjustments

Reykjavik Temperature Adjustments

GHCN Temperature Adjustments Affect 40% Of The Arctic

Why Do GHCN Adjust Temperatures?

Iceland Adjustments Spread To Norway And Russia

Iceland Temperature Adjustments–GHCN Still Have Not Started Investigating

GHCN Adjustments In Iceland–Still No Explanation From NOAA

Iceland’s “Sea Ice Years” Disappear In GHCN Adjustments

Iceland Met Office Temperatures for Reykjavik

How GISS Has Totally Corrupted Reykjavik’s Temperatures

GISS Make The Past Colder In Reykjavik

OAA Don’t Believe The Iceland Met Office

The Icelandic Saga Continues

Hansen Warming Things Up In Reykjavik

GISS Making Up Fictitious Temperatures In Iceland

 

Með góðri kveðju,

[Ólafur Gylfason (IP-tala skráð) 15.11.2012 kl. 14:21]

Sæll Trausti,

Ég vona að þú fyrirgefir mér en hvað þýðir orðið hungurdiskar?

kær kveðja,

Ólafur

[Trausti Jónsson, 16.11.2012 kl. 00:50]

Þakka þér fyrir Ágúst. Ég hef verið í póstsamskiptum við Paul og sent honum gögn sem hann hefur að eitthvað notað. Ég hef verið að segja honum að ég hafi ekkert sérstakar áhyggjur af endurskoðunardútli þeirra umsjónarmanna GHCN hitasafnsins. Þeir eru að fara yfir hitaraðirnar með einhverjum „nýjum“ hugbúnaði sem trúir ekki á mikinn breytileika í rúmi. Flestir sem vinna við samræmingu mæliraða lenda út í feni á einhverju stigi - þar á meðal ég. 

Ólafur. Hungurdiskar er annað nafn yfir íslummur. Lummuís er ákveðið stig hafísmyndunar. Jón Eyþórsson veðurfræðingur tók þetta orð traustataki þegar hann vantaði orð í myndartexta í bók eftir Nansen sem hann þýddi. Það kemur fyrir í kvæði Matthíasar Jochumssonar Hafísinn - en Matthías hefur ekki endilega haft þessa ákveðnu tegund hafíss í huga. Orðið hentar vel í nafn á bloggi vegna þess hversu sjaldséð það er - og er þar að auki ekki með neinum broddstöfum. Auðvelt er því að finna það með leitarvélum án þess að fá yfir sig skriðu óskyldra hluta. En hungurdiskapistlarnir eru orðnir það margir að sennilega er rétt að fara að huga að nýju nafni.