Snjókomudagafjöldi - í 165 ár (eða þar um bil)

Við lítum nú til gamans á árlegan fjölda snjókomudaga í Stykkishólmi frá upphafi athugana þar haustið 1845. Hugsanlegt er að snjókomudagur hafi ekki verið skilgreindur á nákvæmlega sama hátt allt tímabilið. Þó er ljóst að engin krafa hefur verið gerð um að snjóinn festi til að dagur komist á blað sem snjókomudagur. Sömuleiðis getur verið talsverður munur á snjókomudagafjölda eftir því hversu vel athugunarmaðurinn fylgist með veðri sólarhringsins. Auðvelt er t.d. að missa af lítilsháttar snjókomu að nóttu. Snjókomudagafjöldaraðir (já) frá einni veðurstöð verða því að teljast heldur óáreiðanlegar.

Röðin frá Stykkishólmi og sýnd er á myndinni hér að neðan er þess vegna ekki sérlega áreiðanleg - en sýnir samt í heild eindregna drætti sem gætu vel verið réttir.

Lóðrétti ásinn sýnir fjölda snjókomudaga á ári hverju en sá lárétti árin frá 1846 til 2011 (árið í ár er ekki búið). Hlýindaskeiðið svonefnda um og fyrir miðja 20. öld sker sig úr hvað fátækt snjókomudaga varðar. Mikil og skyndileg aukning varð hins vegar um 1980 og á mörkunum að ástandið hafi „jafnað sig“ síðan. Fyrstu 25 ár línuritsins skera sig einnig úr - en þá í miklum fjölda snjókomudaga. Hámarksárið er 1854 - á síðari tímum er 1983 með flesta snjókomudagana í Stykkishólmi. Árið 1941 var bæði hlýtt og þurrt - snjókomudagarnir voru þá sérlega fáir. Einnig voru mjög fáir snjókomudagar árið 1960.

Við skulum vara okkur á því að draga miklar ályktanir af línuritinu varðandi langtímabreytingar á veðurfari. Stöðin er hér einmana og athugunarmenn fjölmargir á tímabilinu. En myndin er skemmtileg engu að síður.

Athugasemdir

[Hilmar Hafsteinsson (IP-tala skráð) 14.11.2012 kl. 17:32]

Þakkir fyrir samantektina Trausti. Bendi í þessu sambandi á frétt í mbl. frá 8. nóv. sl.:

"Októbermánuður telst fremur hagstæður og hægviðrasamur. Lítill snjór var á láglendi. Hiti var nærri meðalagi um landið vestanvert, en annars lítillega undir því, mest rúmt eitt stig á Austurlandi.

Þetta kemur fram í yfirliti frá Veðurstofunni um veður í október. Í heild var meðalhiti mánaðarins í meðallagi, rétt undir því þó um landið norðaustan- og austanvert. Meðalhiti í Reykjavík var 4,4 stig og er það í meðallagi áranna 1961 til 1990. Á Akureyri var meðalhitinn 2,0 stig og er það 0,9 stigum undir meðallagi. Á Egilsstöðum var hiti 1,2 stigum undir meðallagi og 0,3 á Hveravöllum."

Er ekki örugglega að kólna á Íslandi Trausti?

[Höskuldur Búi Jónsson, 14.11.2012 kl. 23:12]

Hilmar farðu nú að hætta þessu, ef þú vilt vera umræðuhæfur þá þarftu að þekkja muninn á veðri og loftslagi.

[Trausti Jónsson, 15.11.2012 kl. 00:14]

Til allrar hamingju sveiflast pendúllinn ennþá. En nú stefnir þó í 17. hlýja árið í röð hér á landi. - En spilliár mun koma fyrr eða síðar hvað sem almennri hlýnum líður - sé enn eitthvað vit í veðurfarinu. Við bíðum spennt eftir því.

[Hilmar Hafsteinsson (IP-tala skráð) 15.11.2012 kl. 14:24]

Flokkast eðlileg kuldaskeið undir "spilliár" í handbókum heimsendaspámanna Trausti minn? Hvað kallið þið þá ísaldirnar?

[Trausti Jónsson, 16.11.2012 kl. 00:32]

Hilmar. Spilliár hefur ekkert með hita eða kulda að gera - forskeytið spilli- táknar hér að einhverri óslitinni röð sé spillt. Hlýtt ár sem kemur ofan í röð mikilla og langvinnra kulda væri líka spilliár. Þegar knattspyrnufélag hefur unnið 12 leiki í röð bíða menn spenntir eftir spillileiknum - og verða því spenntari eftir því sem röðin lengist - verður met slegið?