Þá féll það (marshitametið)

Gögn eru ekki sótt í sjálfvirka stöð Veðurstofunnar í Kvískerjum í Öræfum nema tvisvar á sólarhring, kl. 12 og 24. Biðin eftir nýjum gögnum var óvenjuspennandi í dag enda lofaði stöð Vegagerðarinnar á sömu slóðum mjög góðu. Þar mældist hámarkshiti dagsins 19,6 stig um kl. 17.

Skráningu á vegagerðarstöðvunum er þannig háttað að ívið minni líkur eru þar á ofurhámörkum heldur en á stöðvum Veðurstofunnar og annarra sem fylgja sömu háttum. Á móti kemur að vegagerðarstöðvarnar eru settar upp á stöðum þar sem vænta má hvassra vinda. Sú staðreynd eykur líkur á að hár hiti mælist.

Ákveðnar líkur voru því á að hámarkshiti á Kvískerjastöð Veðurstofunnar yrði meiri heldur en á vegagerðarstöðinni. En það var langt í frá gefið.

En þannig fór að hámarkshitinn varð 0,9 stigum hærri á veðurstofustöðinni, 20,5°C á móti 19,6. Glæsilegt marsmet, 1,7 stigum ofan við  gamla metið sem sett var á Eskifirði 28. mars árið 2000.

Samkvæmt greiningu/spá evrópureiknimiðstöðvarinnar var þykktin á þessum slóðum í 5520 metrum -svipað og mest er vitað um í mars. Mættishiti í 850 hPa fór í dag (í sömu greiningu/spá) hæst í um 24 stig.

Hafa nú landshámörk í mars fallið hér á landi, í Skotlandi og í Noregi. En Kvískerjastöðvarnar hafa ekki verið þar mjög lengi - og alveg hugsanlegt að hiti hafi á undanförnum áratugum farið jafnhátt og nú á þessum slóðum. En glæsilegt engu að síður.

En rétt er samt að taka fram að það tekur einhvern tíma að kanna metið - t.d. hvort hliðrun sé í mælinum. Vegagerðarmælingin bendir þó til þess að svo sé ekki.

Athugasemdir

[Einar Sveinbjörnsson, 30.3.2012 kl. 07:02]

Flott er metið!

Sjálfur var ég að búa mig undir skýringar vegna hitans á Vegagerðarstöðinni. Þar eru hitamælingar ekki við staðalaðstæður, eins og það er kallað. Stöðin stendur á malar- eða sandbing og ekki vel gróið í kring. Á að eiga mynd, en finn hana ekki í fljótheitum. Skiptir ekki máli, þar sem hin stöðin heima við bæ sýndi enn hærra gildi.

Heyrði í mönnum sem voru við vinnu innarlega í Berufirðinum um svipað leyti í gær. Þar stóð hlýr strókurinn niður af bröttum fjöllunum og hitinn þar í litlu samræmi við mælingar á Teigarhorni heldur utar.

Til að ná mættishitanum niður úr fjallahæð þarf bæði sérstök og staðbundin skilyrði til niðurstreymis loftins.

ESv