Spennandi kvöld?

Nú (laugardaginn 10. mars) fer mjög hlýtt loft yfir landið. Það hefur nokkrum sinnum gerst að undanförnu og þrátt fyrir stuttan stans hefur háum hita brugðið fyrir austanlands og norðan.

Í dag heldur hlýja loftið venju sinni og fer mjög hratt hjá en þar sem hvasst er í lofti er rétt að gefa því góðan gaum í kvöld og fram eftir nóttu.

Mættishita í 850 hPa er spáð upp í 21,5 stig yfir Austurlandi kl. 18 og þykktin slæst upp undir 5550 metra.

Varla er þess samt að vænta að met verði slegin - helst þá dagsmet 10. mars.

Má vera að við lítum betur á málið síðar í kvöld.

Athugasemdir

[Gunnar Th. Gunnarsson, 10.3.2012 kl. 22:10]

Kl 21.00 var hitinn á Reyðarfirði á bílmæli mínum (sem er nokk réttur) mest 11,0 gráður, en hitastigið flöktir mikið í vindinum og munar allt að tveimur gráðum með stuttu millibili.

[Trausti Jónsson, 11.3.2012 kl. 01:21]

Á miðnætti höfðu Eskifjörður og Fáskrúðsfjörður náð yfir 14 stig - og Þórdalsheiðin - í 500 metra hæð náði 10 stigum fyrr í kvöld.