Á milli lægða

Við lítum á gervihnattamynd sem tekin er um miðnætti aðfaranótt sunnudagsins 27. nóvember. Þetta er hitamynd, hvít svæði eru köld, því hvítari - því kaldari.

Við Skotland er kröpp illviðrislægð á leið austsuðaustur og mun hún valda illviðri í Danmörku og e.t.v. í Svíþjóð líka. Pólverjar hafa áhyggjur af sjávargangi í norðvestanáttinni á Eystrasalti og Finnar búast við hríð.

Lægðin suður af Grænlandi er enn grunn, 992 hPa í miðju. Hún stefnir í átt til Íslands og fer að hafa áhrif á sunnudagskvöld. Hún dýpkar mikið aðra nótt en sennilega hvessir ekki mikið fyrr en hringrásin í kringum hana fer að þrengja að norðaustanáttinni austan við Grænland. Hvassviðrið verður því til vegna hitabratta í lægstu lögum lofthjúpsins - en ekki undir háloftavindröst eins og í lægðinni norðan við Skotland.

En þeir sem eiga eitthvað undir veðri líta á spár Veðurstofunnar en taka hóflega mark á hjalinu á hungurdiskum.

Athugasemdir

[óli Hilmar Briem Jónsson (IP-tala skráð) 27.11.2011 kl. 10:14]

Takk fyrir pistilinn Trausti.

Þetta eru flottar myndir,  þó þær beri með sér skuggalegar spár.

Og það er örugglega full ástæða til að taka viðvörun þína um

lægðardýpkunina alvarlega og taka fullt mark á hungurdiskum nú

sem fyrr.