Lúmskt hitamet

Milli kl. 21 og 22 í kvöld fór hiti í Kvískerjum í Öræfum upp í 17,3 stig. Þetta þýðir m.a. að nýleg tafla mín um dægurhitamet í desember er ekki lengur rétt (ó,ó). Gamla metið var 16,4 stig, sett á Dalatanga 1970. Hiti á Kvískerjum í dag hækkaði um 11 stig milli kl. 17 og 18. Það þarf að kíkja betur á það, en annað eins hefur gerst. Á sama tíma hlýnaði ekkert á Fagurhólsmýri sem þó er í nágrenninu. Hámarkshiti þar sýnist mér hafa verið 6,3 stig. Þetta minnti mig á það að einhvern tíma í desember upp úr 1970 fréttist af 24 stiga hita á mæli heimamanna í Kvískerjum. Eins og menn vita er misminni mitt mjög gott en minnið verra. Man einhver eftir þessu?

Mjög hlýtt loft er yfir landinu, ekki nema um 5 stiga frost í 3 km hæð. Þykktin er í kringum meðaltal ágústmánaðar (um 5470 m). Á morgun kólnar lítillega en síðan hlýnar aftur. Kannski koma fleiri hitamet. Sá 12. (sunnudagur) liggur nokkuð vel við höggi, mesti hiti sem vitað er um þann dag er ekki „nema“ 15,1 stig.

 

Athugasemdir

[Sigurður Þór Guðjónsson, 10.12.2010 kl. 01:25]

Þetta var 24. nóv. 1971 á Kvískerjum sem 24 stigin voru og sagt frá því í Veðráttunni fyrir nóvember það ár.

[Trausti Jónsson, 10.12.2010 kl. 01:30]

Bestu þakkir, ég vissi að misminni mínu væri treystandi.

[Gunnar Th. Gunnarsson, 10.12.2010 kl. 01:51]

Snillingar!

Það var dálítið sérstakt í dag um kl. 13, þegar ég fór frá Reyðarfirði til Norðfjarðar. Á Reyðarfirði og Eskifirði var um -1 gráða en í Oddsskarði (rúml. 600 m. hæð) var 6 gráðu hiti.

[Gunnar Th. Gunnarsson, 10.12.2010 kl. 01:55]

... en maður hefur svo sem séð þetta nokkrum sinnum áður