Trúlegar veðurspár

Í dag eru veðurspár fyrir næstu viku aftur orðnar eðlilegar. Nú eigum við bæði að sleppa við mesta háþrýstinginn og versta norðanáhlaupið - það á nú að fara fyrir austan land. Nú er útlit fyrir venjubundinn norðan- og síðan norðaustanþræsing frá og með miðvikudegi. Hann sýnist sem endalaus. En þótt spárnar séu orðnar eðlilegar er veðrið ekki svo venjulegt. Kuldarnir í Evrópu halda áfram og þrýstingur hér verður áfram hár, þó nú sé síður líklegt að met verði. En munum enn að 4 daga spár og þaðan af meira eru oft mjög vitlausar. Vel má vera að næsta spá verði aftur hrokkin út af línunni. Spenna veðurnörda heldur sum sé áfram.

Í dag og í gær hafa mikil og falleg glitský sést um landið norðan- og austanvert. Mjög hátt liggjandi veðrahvörf fylgja fyrirstöðuhæðum og í dag voru þau í 11 km hæð í háloftaathuguninni á Egilsstöðum, þar var þá 70 stiga frost. Glitský þurfa hins vegar enn meira frost til að myndast þannig að líklegt er að skýin séu langtum ofar, en það má kíkja betur á það.

Athugasemdir

[Ben.Ax. (Benedikt Jóhannes Axelsson), 10.12.2010 kl. 18:04]

Þegar ég var ungur í sveit gerði bóndinn á bænum gjarnan 20 mínútna veðurspá. Yfirleitt spáði hann því að það færi að rigna og bað því fólk að herða sig við heyskapinn. Stundum rættust spárnar enda rigndi nokkuð oft í þessari sveit.

[Trausti Jónsson, 11.12.2010 kl. 01:44]

Þakka, Benedikt. Spár af þessu tagi þykja nokkuð merkilegar í dag og heita meira að segja því ágæta, en útlenda nafni "nowcasting". Í veðurorðasafni mínu heita það núspár, umdeilanlegt orð en kannski ekki svo vitlaust. Skyndileit á útlenda orðinu á google gefur um 430 þúsund niðurstöður, en google skilur ekki orðið núspár. Hver veit nema það breytist núna. 

[Sigurður Þór Guðjónsson, 11.12.2010 kl. 12:03]

Verst að spárnar gengu ekki eftir. Við viljum fjör og stuð í veðrinu!

[Trausti Jónsson, 11.12.2010 kl. 17:30]

Spárnar eru ekki ennþá ekki gegnar efir. Enn er möguleiki á 500 hPa desembermeti á svæðinu.