Giskað á árshita í Stykkishólmi

Nú eru 11-mánuðir liðnir af árinu og einn eftir. Nóvember var heldur rýr hvað hita snerti, en menn segja hann samt vera viðunandi. Það er nefnilega enn möguleiki á árshitameti. Ég læt aðra bloggara alveg um að velta vöngum yfir Reykjavíkurhitanum að þessu sinni og vona að þeir haldi því áfram sem lengst. En hér er ætlunin að líta á möguleikana í Stykkishólmi.

Meðalhiti fyrstu 11 mánaða ársins þar er 5,76 stig. Við notum tvo aukastafi til gamans rétt eins og menn gera mun á þúsundustuhlutum úr sekúndu í Formúlunni. Þetta er það næsthæsta sem vitað er um í Hólminum, við þykjumst í þessu tilviki hafa gögn aftur til 1823. Ellefu fyrstu mánuðir ársins 2003 voru lítillega hlýrri, með 5,90°C. Fylgnin milli 11-mánaða hitans og árshitans er hvorki meira eða minna en 0,9833 - en það er svo gott að Alþjóðaveðurfræðistofnunin og fleiri aðilar hafa tekið upp þann ósið að gefa út fréttatilkynningar um ársmeðalhitann strax í byrjun desember. (Svo heyrir maður ekki nærri eins mikið um endanlegar tölur).

En lítum á línurit:

Myndin er í betri upplausn í meðfylgjandi pdf-skjali, sjá viðhengið.

Hér má sjá umrætt samband og jöfnu bestu línu í gegnum punktaþyrpinguna. Ef við setjum töluna 5,76 inn í jöfnuna fæst út ágiskunin 5,33°C fyrir árshitann. Metárið 2003 var hann 5,41°C. Munurinn er aðeins 0,08 stig. Við getum líka giskað öðru vísi, t.d. með því að reikna út hver meðalmunur er á 11-mánaða hitanum og árshitanum. Þá fáum við út töluna 0,37°C. Sú ágiskun yrði 5,39°C eða 0,02 stig undir metinu. Það ár sem stóð sig best á endasprettinum var 2002, enda var desember það ár fádæma hlýr. Slíkur endasprettur myndi skila árinu 2010 upp í nýtt met.

Á myndinni sjáum við eitt ár skera sig úr - langt neðan við línuna. Þetta er hið fræga ár 1880, sem virtist fram á haust ætla að setja met fyrir 19. öldina. Slíkur endasprettur myndi skila okkur niður í 4,62 stig - sem er reyndar býsna hlýtt, 1,1 stigi ofan meðallagsins 1961-1990.

Skrár tengdar þessari bloggfærslu:

• giskað á árshita í Stykkishólmi

Athugasemdir

[Pálmi Freyr Óskarsson, 2.12.2010 kl. 09:48]

Blessaður Trausti

Á Eyjafréttum.is birtist þessi frétt í gær frá Siglingastofnun:

"Óvenjulega þrálátar suðaustanáttir undanfarna mánuði hafa valdið breytingum á ströndinni umhverfis Landeyjahöfn sem eru afar óhagstæðar fyrir rekstur ferjuhafnarinnar. Öldufarsathuganir á árabilinu 1958–2009 sýna að tíðni suðaustlægra ölduátta undanfarið er óvenjulega há og er því full ástæða til að ætla að þær breytingar verði að suðvestlægar áttir verði ríkjandi við Landeyjasand á ný."

Þessu fullyrðingar finnst mér ekki standast hjá Siglingastofnun. Geturðu komið með einkvað sem sýnir hvað áttir eru ríkjandi í og við Vestmannaeyjar?

[Trausti Jónsson, 2.12.2010 kl. 23:47]

Mér sýnist að niðurstöður bresku sérfræðinganna séu í grunninn fengnar úr svokallaðri „endurgreiningu“ Reiknimiðstöðvar evrópskra veðurstofa. Þessi greining er yfirleitt talin áreiðanleg. Veður hvers dags í greiningunni býr til „sýndaröldur“ og ég veit til þess að þeim ber nokkuð vel saman við þær raunverulegu. Betri greining hefur ekki verið gerð sem nær yfir jafn langan tíma. Ég hef um nokkurt skeið fylgst með breytileika vindátta á landinu og þar á meðal á þessu svæði. Ég renni hins vegar blint í sjóinn með það hvort þær tölur hafa eitthvað með sandburð með suðurströndinni að gera - það er ekki fyrirfram víst. En ég skrifa ef til vill eitthvað almennt um þetta síðar.