Óvenjumikill munur á mánaðameðalhita

Margir hafa nefnt við ritstjóra hungurdiska hið óvenjulega meðalhitafall milli nóvember- og desembermánaða síðasta árs (2022). Sérlaga hlýtt var í nóvember en kalt í desember. Munur á milli meðalhita mánaðanna var allvíða um og yfir 10 stig, mestur þó á Þingvöllum. (9,0 stig í Reykjavík). 

Meðalhiti á Þingvöllum var +4,6 stig í nóvember, en -7,1 stig í desember. Þetta var næsthlýjasti nóvember sem vitað er um (heldur hlýrra var 1945). Desember er aftur á móti sá kaldasti sem vitað er um þar um slóðir. Munurinn á meðalhita mánaðanna tveggja nú var 11,7 stig. Sýnist í fljótu bragði (en þó ekki að alveg óathuguðu máli) að þetta sé mesta hitafall milli meðalhita tveggja mánaða á Íslandi. [Hiti féll um 10,2 stig við Mývatn á milli október og nóvember 1996].

Þetta slær þó ekki út mestu breytingu í hina áttina - meðalhiti í mars 1881 var -19,8 stig á Siglufirði, en +0,1 stig í apríl (munur 19,9 stig). Munurinn milli hita þessara mánaða var 16,3 stig í Stykkishólmi og 15,5 stig í Grímsey (áreiðanlegri meðaltöl heldur en þau frá Siglufirði).

Að meðaltali er munur á hita hlýjasta og kaldasta mánaðar ársins á Þingvöllum 14,8 stig, var mestur 1936, 20,2 stig, en minnstur 10,4 stig, 1972. Árið 2022 var hann 17,5 stig. Samfelldar mælingar á Þingvöllum og nágrenni ná aftur til sumarsins 1934.

Athugasemdir

[Tómas Ibsen Halldórsson, 14.1.2023 kl. 20:39]

Takk fyrir þessar upplýsingar Trausti. Fróðlegt væri að sjá sambærilegar upplýsingar fyrir árið 1918 ef þær eru til og liggja fyrir.

[Trausti Jónsson, 15.1.2023 kl. 00:46]

Tómas - mánaðameðalhiti allra mánaða 1918 má finna í viðhengi þessa pistils - samskonar pistlar (og viðhengi) eru til á hungurdiskum fyrir öll ár 1801 til 1924 og allmörg síðari ár einnig: Árið 1918 - hvernig var með veðrið eftir að frostunum lauk? - trj.blog.is

Einnig má lesa nokkuð um kuldana 1918 í þessum pistlum:

https://www.vedur.is/vedur/frodleikur/greinar/nr/1163

https://www.vedur.is/vedur/frodleikur/greinar/nr/1042

https://www.vedur.is/vedur/frodleikur/greinar/nr/1141

og 1917 í þessum:

https://trj.blog.is/blog/trj/entry/2208081/

https://trj.blog.is/blog/trj/entry/2214539/

https://trj.blog.is/blog/trj/entry/2193859/

[Tómas Ibsen Halldórsson, 15.1.2023 kl. 12:44]

Kærar þakkir fyrir þetta Trausti.