Afmælishugleiðing

Um þessar mundir eru liðin 12 ár frá upphafi bloggs ritstjóra hungurdiska. Færslurnar orðnar 2987 - lengri og lengri tími líður þó á milli (að meðaltali) en áður var - en innihaldið rýrnar vonandi ekki svo mjög (að meðaltali). Ekki hefur verið mjög mikið um endurtekningar eða endurvinnslu - en slíks væri sannarlega þörf. Síðustu árin hefur mest rými farið í veðurannála - rifjað upp veður liðins tíma, bæði ára og farið í gegnum einstaka viðburði. Mikið er eftir óunnið - fórnar ritstjórinn oft höndum yfir því öllu saman. 

En ritstjórinn þakkar enn og aftur jákvæðar undirtektir þessi 12 ár - sömuleiðis eru þakkir til Morgunblaðsins fyrir hýsingu og birtingu.

Fyrir 8 árum birti ritstjórinn 70 pistla með myndum á fjasbókarsíðu hungurdiska undir fyrirsögninni „Skýið“. Textarnir eru óformlegir - og myndirnar oftast ekki góðar. Í viðhenginu má finna samantekt þessara pistla - þeir eru ekki prófarkalesnir eða brotnir um - virðið það til betri vegar. Skjalið er á pdf-sniði og nokkuð stórt (13 Mb). 

Skrár tengdar þessari bloggfærslu:

• skýjapistlar hungurdiska 2014

Athugasemdir

[jakob jónsson (IP-tala skráð) 20.8.2022 kl. 13:25]

Hafu góðar þakkir fyrir þína fróðlegu og vönduðu pisla. Vonandi fáum við sem lengst að njóta skrifa þinna.

[Helga Kristjánsdóttir, 21.8.2022 kl. 03:53]

Bestu þakkir fyrir alla þennan fróðleik.