Hey í harðindum?

Ritstjóra hungurdiska finnst eitthvað orðið öfugsnúið þegar farið er að fagna komu leiðindakuldapolls úr norðri sem einskonar vonarpenings (svo ekki sé talað um endurlausnara). Alla vega er ljóst að kuldapollar sem þessi þykja almennt vera boðberar verstu leiðinda að sumarlagi - í júlí klippa þeir marga daga úr örstuttu sumri - þó vægir og ómerkilegir séu.

En - svona er þurrkurinn farinn að leika okkur grátt og hin alvarlega gróðureldahætta mikil að fáeinir hraglandadropar vekja einhverjar vonir - með sínum 1 til 5 stiga hita og það í maí. En til allar hamingju virðist sú veðurtíska enn undirliggjandi að það fari vel með - vindar verði hægir og engin aftök af neinu tagi í sjónmáli. 

Kuldapollurinn stóri yfir Norðuríshafi kemur til allrar hamingju lítt við sögu - en léttir aðeins á sér með því að senda örverpi suður um Ísland á fimmtudag og föstudag - stendur raunar stutt við. 

Kortið sýnir stöðuna í 500 hPa-fletinum - í miðju veðrahvolfi - á fimmtudagskvöld. Þá á miðja kuldapollsins að vera við Vestfirði á leið til suðurs eða suðsuðvesturs. Ekki er þetta öflugt kerfi - en þó er um -34 stiga frost í miðjunni og þykktin undir þessu er minni en 5200 metrar - ekki met á þessum árstíma, en nær þó inn í botn-10 á síðustu 100 árum ef við þrengjum dagagluggann niður í 11. til 15.maí. Minnsta þykkt sem við vitum um eftir 12.maí var talsvert lægri, 5110 metrar - en það átti sér stað 15.maí 2012 (og getið í hungurdiskapistli á þeim tíma). Þá var hið versta veður - en það stendur ekki til að þessu sinni þó svalt verði. - Í dag (þriðjudag 11.maí) var þykktin yfir miðju landi 5280 metrar, hiti í neðri hluta veðrahvolfs 4 stigum hærri en hann á að vera um miðnætti á fimmtudagskvöld. 

En í þessu tilviki verður sum sé að fórna hita (sem þó er ekki hár) og sólskini fyrir einhverja úrkomuvon - (sem svo kannski bregst) - flest er hey í harðindum. 

Athugasemdir

[Þorvaldur Sigurðsson (IP-tala skráð) 11.5.2021 kl. 21:42]

Hver er nú hin "rétta" merking orðsins vonarpeningur? Í minni sveit þýðir það talsvert annað en vonarstjarna eða endurlausnari. Og sennilega líka á Mýrunum.

[Trausti Jónsson, 11.5.2021 kl. 22:09]

Þú hefur auðvitað alveg rétt fyrir þér Þorvaldur, vonarpeningur þarf frekast á endurlausnara að halda - hann er það ekki sjálfur. En svona snýst merking hugtaka í tímans rás - þau geta víkkað - í örvæntingu hlutafjármarkaða og veðmála getur vonarpeningur einmitt orðið að endurlausnara (hrossið sem gat ekki unnið bjargaði veðmálafíklinum). Það er hin „teygða“ merking sem ég hafði í huga. Orðabók Blöndals segir - það er hin gamla merking: „vonarpeningur: Menneske el. Dyr, om hvis Fremtid godt kan haabes, men intet sikkert udsiges“. Ég biðst afsökunar skeri þetta í augu. 

[Helga Kristjánsdóttir, 12.5.2021 kl. 00:42]

En þessi blívur:"allt er hey í harðindum" Spörfuglanna sem bíða eftir árstíða hlaðborðinu.

[Hjalti Þórðarson (IP-tala skráð) 14.5.2021 kl. 21:32]

Leiðindakuldi flestalla daga og sérstaklega kalt á nóttunni. Vorþurrkar eru nánast árlegir í minni sveit í Skagafirði og þykja því ekki fréttaefni. Tveir skúrir komu í gær (efast þó að þeir hefðu mælst á mælir) í fyrsta skipti í 21 dag og var gaman að heyra fuglana syngja gleðisöngva yfir voninni að auðveldara væri að ná í fæðu sem er í moldinni. En því miður varð þeim ekki að ósk sinni og smátíma seinna varð allt jafnskrælnað og áður enda dofnaði söngurinn fljótt.