Smávegis af desember

Norðaustan- og austanáttir voru ríkjandi í mánuðinum. Það sést vel á þrýsti- og þrýstivikakorti evrópureiknimiðstöðvarinnar.

Jafnþrýstilínur eru heildregnar, en vik sýnd með litum. Bláir litir sýna neikvæð vik - mikil yfir Bretlandseyjum, en þau rauðbrúnu eru jákvæð, allmikil yfir Grænlandi, norðaustanáttin mun stríðari heldur en að jafnaði. Uppi í miðju veðrahvolfi var hins vegar hálfgerð áttleysa, vestanáttin „brást“. 

Þetta hafði í för með sér eindregin úrkomuvik líka.

Hér má líka sjá meðalþrýstinginn (heildregnar línur - en gisnar dregnar en á fyrra korti). Litirnir sýna úrkomuvik, sett fram í prósentum. Á Austfjörðum segir líkanið hana hafa verið meir fimmfalt meðallag - ekkert óskaplega fjarri lagi. Mesta úrkoma í einum punkti í líkaninu var um 490 mm - nokkru minni en mest var á veðurstöð (um 800 mm á Seyðisfirði og rúmlega 600 í Neskaupstað og á Hánefsstöðum í Seyðisfirði). Trúlega giskar nákvæmara líkan heldur betur á heildarúrkomuna heldur en líkan reiknimiðstöðvarinnar. [Þó það sé grófara en hin eru ekki mörg ár síðan ritstjóra hungurdiska hefði þótt upplausn þess hárnákvæm - en svona eru framfarirnar]. 

Það má finna slatta af desembermánuðum með ámóta stríða norðaustanátt - þarf ekki að leita lengra til baka en eitt ár til að finna svipað. Að þessu sinni var þó styttra í suðlægu áttirnar í háloftunum fyrir austan land heldur en oftast áður. Er þar trúlega að leita skýringar á úrkomuákefðinni nú. 

Þakka Bolla P. að vanda fyrir kortagerðina. 

Athugasemdir

[Þórhallur Pálsson, 4.1.2021 kl. 11:45]

Tek einnig eftir dökkbláu svæði yfir Suður Noregi (Østlandet).
Þar urðu einnig atburðir sem rötuðu í fréttir, ekki síður en á Seyðisfirði, þót væru ólíks eðlis.

Kv.  ÞP

[Helga Kristjánsdóttir, 5.1.2021 kl. 02:14]

´Þessir óútreiknanlegu vindar eru óttalega tortímandi,en það sjaldgæfir að menn hræðast þá ekki þegar það virðist upplagt að byggja sér bústað á svæðum hér heima og í Noregi, á svo ólíkum stöðum sem þeir eru.. Ætli maður hræddist ekki frekar Norðaustanáttina en þessa suðlægu í háloftunum sem olli þessumm usla,en vinir mínir á Hánefsstöðum urðu ekki fyrir skakkaföllum að þessu sinni. Það gæti allt eins þornað í LÆKNUM sem þau virkja fyrir ofan bæinn,þess vegna hafa þau vararafstöð. en ég vildi endilega óska þér-
 Gleðilegs árs og þakka allar skemmtilegu veðurmyndirnar og skíringarnar.