Fyrstu tíu dagar októbermánaðar

Meðalhiti fyrstu 10 daga októbermánaðar er 5,3 stig í Reykjavík, -0,7 stigum neðan meðaltals sömu daga árin 1991 til 2020, en -1,2 stigum neðan meðaltals síðustu tíu ára og í 13.hlýjasta sæti (af 20) á öldinni. Hlýjastir voru þessir sömu dagar árið 2002, meðalhiti þá 9,7 stig, en kaldastir voru þeir 2009, meðalhiti 2,6 stig. Á langa listanum er hitinn nú í 81.sæti (af 145). Hlýjastir voru þessir sömu dagar árið 1959, 11,0 stig, en kaldastir 1981, þá var meðalhiti aðeins 0,1 stig.

Á Akureyri er meðalhiti nú 3,7 stig, -1,4 stigum neðan meðallags 1991 til 2020, en -2,1 stigi neðan meðaltals sömu daga síðustu tíu árin.

Kaldast að tiltölu hefur verið á Suðurlandi, þar raðast hitinn í 15.hlýjasta sæti aldarinnar, en hlýjast hefur verið á Austfjörðum þar sem hitinn er í 9.sæti.

Á einstökum veðurstöðvum er jákvætt vik miðað við síðustu tíu ár mest í Oddsskarði, +1,0 stig og +0,9 stig á Gagnheiði, en neikvætt vik er mest á Hveravöllum, -2,8 stig.

Úrkoma hefur mælst 5,4 mm í Reykjavík, aðeins sjöttihluti meðalúrkomu sömu daga 1991 til 2020 og hefur aðeins 9 sinnum verið minni sömu almanaksdaga, síðast árið 2010. Á Akureyri hefur úrkoman mælst 48,6 mm og er það um 60 prósent umfram meðallag.

Sólskinsstundir hafa mælst 42,8 í Reykjavík og er það í ríflegu meðallagi.

Athugasemdir

[P.Valdimar Guðjónsson, 12.10.2020 kl. 11:25]

Tíminn kringum 20. október ár hvert, finnst mér ótrúlega oft "veðrabrigði" hvað varðar hitastig og haust tíðarfar. (Er staðsettur suðrí'Flóa).    

Þarna ræður eflaust mestu bara dagatalið sjálft. Kólnun virðist sem dæmi í kortunum núna.   Ekkert án undantekninga, en sem dæmi er oftast vonlítið að beita kúm lengur á grænfóður en á þessum dagsetningum. 

[Trausti Jónsson, 13.10.2020 kl. 19:55]

Það er algengt að fyrst verði alhvítt hér sunnanlands í kringum eða upp úr 20.október. Í því felast ákveðin andleg tímamót - og þar með einhvern veginn meira afgerandi veðrabreyting en hún kannski er í raun.