Tíu ár

Nú hefur blogg hungurdiska þraukað í tíu ár. Fyrsta færslan birtist 19.ágúst 2010. Pistlarnir eru að sögn teljara orðnir 2677. Hin síðari ár hefur birtingatíðni verið heldur minni en framan af - og ekki eru pistlarnir allir efnismiklir. Mjög margt er ósagt - svo margt að ritstjóranum óar við og alveg ljóst að aldrei kemur það allt fram - ekki einu sinni það sem liggur innan seilingar. Um þessar mundir er tímafrekust samantekt ritstjórans á fréttum af veðri og tíð áranna 1749 til 1924. Miðar því nokkuð, birt hafa verið yfirlit um 80 ár af 176 - stutt í að helmingur þeirra hafi verið „lagður að velli“. Það verður bara að koma í ljós hvort verkefninu lýkur - eða hversu lengi verður áfram haldið.  

Nota hér tækifærið og þakka jákvæðar undirtektir lesenda - sem enn virðast furðumargir. 

Athugasemdir

[Gunnar Rögnvaldsson, 19.8.2020 kl. 22:08]

Þakklátur lesandinn ég þakka þér fyrir þessi ár, og hvet þig samtímis áfram til þinna óviðjafnanlegu veðurrannsóknar-dáða, hugleiðinga og skrifa, Trausti.

Hlakka einkum til vetrarskrifa þinna og þar með til komandi vetrar.

Bestu kveðjur

[Þórhallur Pálsson, 19.8.2020 kl. 22:58]

Hafi þú kæra þökk fyrir alla þína pistla !
Ég hef orðið margs fróðari við lesturinn, þó það hendi að mig bresti skilning á sumu.

[Þorsteinn Briem, 19.8.2020 kl. 23:27]

Mjög áhugaverðir pistlar og til hamingju með áfangann!

[Finnbogi Óskarsson (IP-tala skráð) 20.8.2020 kl. 09:23]

Til hamingju með úthaldið, og bestu þakkir fyrir allan fróðleikinn! 

[Helga Kristjánsdóttir, 20.8.2020 kl. 23:47]

Þakka af alhug allt sem þú skrifar um veðurfar,þótt skilji ekki allar lýsingar háloftanna en er þó farin að þekkja Bola í sjón,til hamingju með áfangann.