Met - en þó ekki samanburðarhæft við annað

Síðastliðna nótt [9.maí] mældist -22,2 stiga frost á veðurstöðinni á Dyngjujökli, stöðin er í nærri 1700 metra hæð yfir sjávarmáli, sú langhæsta á landinu og í allt öðru veðurfari en allar aðrar stöðvar. Þann 2.maí 2013 mældist frostið á Brúarjökli -21,7 stig (í um 850 m hæð). Mesta frost sem mælst hefur í byggð í maí er -17,6 stig. Það mældist á Grímsstöðum á Fjöllum sama dag og metið var sett á Brúarjökli (2.maí 2013).

Athugað hefur verið á Dyngjujökli frá 2016, en mikið vantar í mæliröðina. Fjöldi meta mun því falla þar næstu árin verði athugunum haldið áfram. Hitamælir stöðvarinnar er ekki í staðalhæð (lægri en á öðrum stöðvum) - og því ekki um staðalaðstæður að ræða. - En út af fyrir sig er þetta lægsti hiti sem mælst hefur á íslenskri veðurstöð í maímánuði.  

Athugasemdir

[Helga Kristjánsdóttir, 10.5.2020 kl. 22:12]

Allt í einu kom upp forvitni að vita með hverju hitamælar á veðurstofum við jökla mæla,þótt nægi að þekkja kvikasilfrið í munnmælum.   

[Trausti Jónsson, 11.5.2020 kl. 00:21]

Þú getur líka keypt þér kvikasilfurslausan munnmæli - það eru til nokkar gerðir. Mismunandi hiti skapar mismunandi spennumun milli tveggja mismunandi málma - (í grófum dráttum). Nú hefur evrópursambandið bannað kvikasilfursmæla - líka fyrir fólk. Tæknilega sinnaðir geta flett upp orðinu thermocouple á netinu til frekari upplýsinga. https://en.wikipedia.org/wiki/Thermocouple