Frost um land allt

Þess má geta að hiti fór hvergi upp fyrir frostmark á landinu í dag (föstudag 1.febrúar). Litlu munaði að vísu á fáeinum stöðvum, minnst í Önundarhorni undir Eyjafjöllum þar sem hámarkshiti dagsins var -0,8 stig. Það er orðið sjaldgæft á síðari árum að slíkir dagar komi, (síðast 12.janúar 2017). Það stafar bæði af hlýnandi veðurfari, en líka - og sennilega ekki síður af fjölgun veðurstöðva sem hámarkshita mæla.

Það truflar líka að sjálfvirka og mannaða kerfið telja ekki alveg samstíga. Notast er við „réttan“ sólarhring á sjálfvirku stöðvunum, en á þeim mönnuðu endar dagurinn kl.18. og nær þar með aftur til kl.18 daginn áður. Þetta þýðir t.d. (tilviljun auðvitað) að það var 13.janúar 2017 (en ekki þann 12.) sem síðast var frost á öllum mönnuðum stöðvum allan „sólarhringinn“. Verði klukkunni breytt ... [þarf að breyta öllum klukkum allra veðurathugana - ].

Dægurlágmarksmet voru þó ekki sett á mjög mörgum stöðvum í dag. Það er vegna þess að fyrir er 1.febrúar árið 2008 sem var víðast hvar mun kaldari en þessi, meðalhiti í byggðum landsins þá -10,3 stig, en -6,5 stig nú.

Skömmu fyrir miðnætti fór frostið í -10,3 stig í Reykjavík, það sama og 31.janúar 2016 og það mesta síðan 6.desember 2013, þá var lágmarkshitinn í Reykjavík -12,5 stig (og -12,8 stig daginn áður).