Sumardagafjöldi í Reykjavík

Nú lítum við á sumardagafjölda í Reykjavík það sem af er sumri. Vegna tölvuvandræða á Veðurstofu verðum við að láta aðra umfjöllun um uppgjör ágústmánaðar og sumarsins bíða þar til eftir helgina. Skilgreiningu sumardags má finna eldri pistlum.

Myndin sýnir sumardagafjölda hvers árs í Reykjavík frá 1949 til 2018. Það verður að taka fram að að meðaltali eru tveir sumardagar í september - þannig að formlega séð er þetta uppgjör ekki endanlegt. En satt best að segja er útkoman heldur hrakleg miðað við það sem algengast hefur verið á þessari öld. Sumardagar teljast 12 til þessa í sumar, enginn í júní, fjórir í júlí og átta í ágúst. Meðaltal aldarinnar er 34 dagar á ári. Aftur á móti kemur í ljós að meðalsumardagafjöldi á árunum 1961-1990 var ekki nema 13 - þannig að miðað við þá tíma telst núlíðandi sumar í meðallagi. 

Bætist enginn dagur við í september (eða október) er sumardagafjöldinn sá minnsti síðan 1995. 

Vestanáttin hefur verið með stríðara móti í háloftunum í sumar. Við lítum á meðaltöl hennar.

Háloftaathuganir ná reyndar ekki nema aftur til 1949, en við látum endurgreiningar giska á stöðuna áratugina þrjá þar á undan. Kvörðum hefur verið snúið við - þá sjáum við betur samræmi við hina myndina. Súlurnar liggja því neðar á myndinni eftir því sem vestanáttin er meiri. Hún var mest sumarið 1983 - þá voru sumardagar líka fæstir í Reykjavík. Vestanáttin var sterk 1995 - þá voru sumardagar í Reykjavík aðeins 5. Við sjáum líka að vestanáttin var líka fremur sterk bæði sumarið 2013 og í sumar, 2018, en samt ekki mjög langt ofan meðallags 1961-1990. 

Vestanátt háloftanna hefur nefnilega verið alveg sérlega slök hér við land lengst af á þessari öld. Að tengja „óvenjumikla“ vestanátt sumarsins í sumar veðurfarsbreytingum er því harla vafasamt - ef við sjáum yfirhöfuð einhverja hneigð í þessu línuriti er það helst í (sumar-)slaka vestanáttarinnar á undanförnum 15 árum. - En sjálfsagt er málið flóknara en það. 

Mest austanáttarsumra er 1950 - skriðusumarið mikla á Austurlandi. 

Sumardagar á Akureyri eru nú orðnir 38, 8 færri en að meðaltali á öldinni til þessa - en venjulega bætast nokkrir við í september þannig að enn er góður möguleiki á að meðaltali verði náð þar. 

Athugasemdir

[Hjlti Þórðarson (IP-tala skráð) 2.9.2018 kl. 16:31]

Takk kærlega fyrir þennan fróðleik Trausti. Þetta með sumardagafjöldann er skemmtileg nálgun á sumarið. Þarna líka er hægt að sjá svart á hvítu, eða á mynd réttara sagt, nákvæmlega eins og manni hefur fundist. Hef talað við marga sem fluttu á suðvesturhornið um og eftir aldamótn og töluðu um hve miklu betri sumrin væru í Reykjavík heldur en á Norðurlandi. Jú, jú, þetta var rétt þ.e.a.s. sumrin eftir aldamótin sem voru óvanalega góð á þeim slóðum og mörg hver mun betri en þau norðlensku. En ef lengra aftur er farið sést líka vel hve þessi góðu sumur eftir aldamótin skera sig úr. Kannski er samjöfnuður við einhver sumur á fjórða áratugnum. Þegar ég er að alast upp og fór að hafa eitthvert smávit (etv svona um og eftir 1980) var oft talað um rigningarnar á suðurlandi og hve miklu sólríkara og þurrara væri á Norðurlandi. Norðlensku sumrin voru mörg hver ágæt en jú heldur betur misjöfn og muna flestir, sem á annaðborð lifðu það, sumrin 1979 og að ég held 1983 (sem skora einnig mjög lítið í Reykjavík) sem voru algjör ógeð með stanslausri norðanátt og köldu veðri.