Á síðasta degi júlímánaðar

Veðurlag í júlí hefur í heildina verið svipað og mánuðina tvo á undan. Sólarlítið og fremur svalt á landinu sunnan- og vestanverðu, en meira um bjartviðri og hlýja daga austanlands. Munur á milli landshluta er þó ívið minni en í fyrri mánuðunum tveimur. 

Taflan sýnir hvernig meðalhiti mánaðarins raðast meðal annarra júlímánaða aldarinnar, 18 alls.

röð	ár	mán		spásvæði
17	2018	7		Faxaflói
16	2018	7		Breiðafjörður
16	2018	7		Vestfirðir
15	2018	7		Strandir og Norðurland vestra
10	2018	7		Norðurland eystra
4	2018	7		Austurland að Glettingi
1	2018	7		Austfirðir
11	2018	7		Suðausturland
16	2018	7		Suðurland
14	2018	7		Miðhálendið

Við Faxaflóa er mánuðurinn sá næstkaldasti á öldinni, ómarktækt kaldara var í júlí 2002. Aftur á móti er hann sá hlýjasti á öldinni á Austfjörðum - nærri miðju á norðurlandi eystra og á suðausturlandi. 

Að tiltölu hefur verið hlýjast á fjöllum eystra, jákvætt vik miðað við síðustu tíu ár er mest á Gagnheiði og Fjarðarheiði, +1,5 stig. Neikvæð vik eru mest á Hraunsmúla í Staðarsveit og á Botnsheiði, -1,8 stig miðað við síðustu tíu ár.  

Á landsvísu reiknast meðalhiti í byggð 10,1 stig (endar e.t.v. í 10,2), mun kaldara var í júlí 2015 og júlímánuðir áranna 2001 og 2002 voru einnig kaldari en nú. 

Úrkoma er ofan meðallags um nær allt land - virðist þó vera neðan meðallags á Austfjörðum. Sólarleysi hefur haldið áfram að hrjá íbúa Suður- og Vesturlands. Sólskinsstundir í Reykjavík meðal þeirra fæstu í júlímánuði, þó verður ekki um met að ræða. 

Júlíuppgjör Veðurstofunnar með meðalhita, úrkomu og sólskinsstundafjölda ætti að sýna sig næstu daga. 

Athugasemdir

[Sigþór Sigurðsson (IP-tala skráð) 31.7.2018 kl. 21:08]

Oft er það þannig eins og verið hefur þetta sumarið, að ef sólarlítið, úrkomusamt og svalt er á suðvestur horninu er hið besta veður í Skandinavíu. Þessi júlí mánuður er þó með ólíkindum þar og sé á veðurvef YR.no að jákvætt vik meðalhita í Osló verður 5,7 gráður í júlí (yfir 22. stiga meðalhiti). Er slíkt frávik ekki nær því að vera hamfarir ?  Gæti slíkt gerst hér á landi ? Að í Reykjavík kæmi júlí mánuður með 16-17 atiga neðalhita ?

[Trausti Jónsson, 31.7.2018 kl. 22:55]

Breytileiki hita er talsvert meiri í Osló heldur en í Reykjavík - 5,7 stiga vik þar samsvarar um 3,4 stigum í Reykjavík - þannig að það sem Osló er að upplifa nú er svipað því sem Reykjavík fengi um 14,0 stiga júlímánuð - nokkuð sem aldrei hefur gerst. Hámarkið er 13,0. Þetta er auðvitað með töluverðum ólíkindum.