Köld og hlý júlíbyrjun -

Köld og hlý júlíbyrjun - hvoru megin ert þú lesandi góður? 

Júlímánuður byrjar heldur kuldalega á landinu sunnan- og vestanverðu - en aftur á móti sérlega hlýlega á Austfjörðum. Meðalhiti fyrstu tíu daga mánaðarins í Reykjavík er 9,1 stig, -1,2 stig neðan meðallags áranna 1961-1990, en -2,5 stig neðan meðallags sömu daga síðustu tíu árin. Þetta er kaldasta júlíbyrjun á öldinni í Reykjavík, og reyndar sú kaldasta síðan 1993. Á langa listanum er hiti þessara daga í 130. sæti af 144. Þeir voru hlýjastir 1991, þá var meðalhiti 14,0 stig, en kaldastir voru þeir 1874, 7,6 stig (raunar er sú tala nokkuð á reiki), en næstlægsta talan er nokkuð örugg, 7.8 stig, árið 1892. Árin 1979 og 1983 var meðalhiti þessara daga 8,2 stig í Reykjavík.

Á Akureyri er meðalhiti fyrstu tíu dagana 11,5 stig, +1,5 stigi yfir meðallagi áranna 1961-1990, en +0,7 yfir meðallagi síðustu tíu ára - og í 17. til 18. sæti á 83-ára lista Akureyrar. Þar voru dagarnir tíu hlýjastir 1991 eins og í Reykjavík, meðalhiti 15,4 stig, en kaldastir voru þeir 1970, meðalhiti 6,8 stig.

Að tiltölu hefur verið hlýjast á Austfjörðum, jákvæða vikið er mest í Neskaupsstað þar sem hiti hefur verið +2,2 stig ofan meðallags síðustu tíu ára. Kaldast að tiltölu hefur verið á heiðastöðvum á Suðvesturlandi, vikið er -3,0 stig á Skarðsmýrarfjalli og á Botnsheiði. Í byggð er neikvæða vikið mest á Þingvöllum, -2,9 stig.

röð	10.júlí	spásvæði
18		Faxaflói
18		Breiðafjörður
14		Vestfirðir
8		Strandir og Norðurland vestra
6		Norðurland eystra
4		Austurland að Glettingi
1		Austfirðir
8		Suðausturland
18		Suðurland
16		Miðhálendið

Taflan sýnir röðun meðalhita einstakra spásvæða á öldinni. Á Suðurlandi, við Faxaflóa og við Breiðafjörð er þetta kaldasta júlíbyrjun aldarinnar (18.sæti af 18), en á Austfjörðum hins vegar sú hlýjasta (1. sæti af 18). Kalt hefur einnig verið á Miðhálendinu og Vestfjörðum, en á vestanverðu Norðurlandi og á Suðausturlandi er hitinn nærri miðju raðar.

Úrkoma í Reykjavík hefur mælst 14,6 mm og er það í meðallagi. Á Akureyri er úrkoma ofan meðallags.

Eins og að undanförnu eru sólskinsstundir harla fáar suðvestanlands, hafa aðeins mælst 14 það sem af er mánuði í Reykjavík og hafa þær aðeins 6 sinnum verið færri sömu daga mánaðarins, fæstar 5,2. Það var árið 1977.

Engar breytingar er að sjá allra næstu daga - en misræmi er í spám sem ná lengra fram í tímann - flestar gera þó ekki ráð fyrir grundvallarbreytingum á stöðunni.

Athugasemdir

[bjarni þórðarson (IP-tala skráð) 11.7.2018 kl. 13:59]

Mögnuð sjálfsvörn.

Trausti er afburða veðurfræðingur. Skemmtilegur maður.

Það búið er að spá fyrir daginn og enginn dropi settur á Reykjavík.( Ekki einu sinni 3 ). Það mígrignir hinsvegar og himininn gefur ekkert til kynna annað er úrhelli,

Í stöðunni skellir Trausti 10 dropum á Reykjavík kl.14, til að bjarga því sem bjargað verður.  Þetta finnst mér algjör brillijans.

Ég hinsvegar nýbúinn að opna múr á palli 3. Ég get ekkert gert annað en slá undan og farið í fýlu.

[Trausti Jónsson, 11.7.2018 kl. 14:18]

Löngu hættur í veðurspám - og veit ekki til þess að starfsheiti veðurfræðinga hafi verið breytt - og veit ekki heldur hvaða dropar eru hér til umræðu né hvar þeir hafa birst.