Hringekjan heldur áfram að snúast

Lægðin sem valdið hefur illviðri á landinu í dag (laugardag) virðist í aðalatriðum ætla að fara hringinn í kringum landið - fór í dag vestur með Norðurlandi, en í nótt og framan af degi á morgun suður með Vesturlandi og síðan austur með Suðurlandi - og svo jafnvel norður með Austurlandi og vestur með Norðurlandi aftur. Furðumeikill vindstrengur fylgir í vestur- og suðurjöðrum lægðarinnar - nú og svo er auðvitað venjubundin norðaustanstrengur um Grænlandssund sem alltaf þarf að fylgjast með. 

Þessi lægð verður að mestu búin að ljúka sér af á mánudag og útlit fyrir sæmilegan frið þann dag.

Kortið gildir síðdegis á mánudag. Þá er hins vegar ný lægð komin á vettvang suðaustan við landið. Hún er ekki enn orðin til í raunheimi nú á laugardagskvöldi þegar þessi texti er sleginn inn. Við trúum líkaninu samt - svona í aðalatriðum að minnsta kosti. Þessi nýja lægð er minni um sig en hin fyrri og er spáð yfir landið með leiðindaveðri á aðfaranótt og nokkuð fram eftir degi á þriðjudag. Þá má aftur búast við skafrenningi víða á vegum og samgönguröskunum þótt vonandi verði allt ívið vægara en var í dag og verður á morgun. 

Svo sjáum við enn nýja lægð vestur við Labrador - hún á að koma hingað síðar í vikunni - en er stærri um sig og líklega hlýrri þó henni sé spáð fyrir sunnan land - jafnvel gæti hlánað eitthvað um stund - án þess að til sunnanáttar komi. 

Frekari framtíð er afskaplega óráðin - reiknimiðstöðvar hrökkva stórlega til frá einni spárunu til annarrar. - Allt opið sumsé. 

Spáð er miklum hlýindum í heiðhvolfi - allt niður að veðrahvörfum þegar kemur fram í miðja viku. Ekki þó methlýindum hér yfir okkur - en samt nokkuð óvenjulegum. Febrúarmetið í 100 hPa hlýindum yfir Keflavík er -38,3 stig, en evrópureiknimiðstöðin spáir -40 í þeim fleti á miðvikudag. 

Athugasemdir

[Hjalti Þórðarson (IP-tala skráð) 11.2.2018 kl. 13:17]

Takk fyrir fróðleik Trausti. Snúin lægð og lægðarbólur. Hvernig var með lægðina miklu í október 1995, sem olli óveðrinu og snjóflóðum fyrir vestan, var hú ekki á svipuðu róli. Fór fyrir sunnan land og keyrði svo vestur með Norðurlandi en þó sennilega ekki eins langt vestur. Ekki ætla ég þó að líkja þessu núna við viðbjóðinn sem var í veðrinu 1995. Veðrið þá var alveg sér kapituli útaf fyrir sig.

[Trausti Jónsson, 11.2.2018 kl. 13:34]

Súðavíkurlægðin fór ekki ósvipaða leið en veður var verra - bæði varð hvassara og einnig var úrkoma mun meiri en nú. Síðan kom önnur ámóta vond lægð strax ofan í þannig að veðrið stóð dögum saman.

[Jón G. Guðmundsson (IP-tala skráð) 11.2.2018 kl. 15:32]

Er það bara ég, eða eru óvenju margar lægðir þennan veturinn að "bakka yfir landið" þ.e. fara í NA-átt sunnanvið eða yfir suðausturland og "bakka" síðan í vestur eða suðvestur yfirlandið aftur?

[Trausti Jónsson, 11.2.2018 kl. 21:25]

Þessi lægðaleið virðist í tísku um þessar mundir - tíska sem alloft kemur upp en er samt ekki sú algengasta.