Smávegis af langvinnum hlýindum

Hlýindin eru mönnum ofarlega í huga, nú, föstudaginn 17. febrúar. Þau ekki langt frá toppi á bæði febrúarhitalistum (í 3. sæti af 143 í Reykjavík) sem og þeim sem sýna hita frá áramótum (í 2. til 3. sæti af 69 í Reykjavík). - En best stendur þó allur tíminn frá 1. október sig miðað við fyrri ár.

Meðalhiti þessa tímabils í Reykjavík er nú 4,1 stig - og virðist allgóður möguleiki á að það slái út meðalhita allra október til febrúartímabila frá upphafi mælinga. - Meðalhiti í október 2002 til febrúar 2003 var 3,5 stig í Reykjavík og sömu tölu má finna sömu almanaksmánuði veturinn 1945 til 1946.

Staðan á Akureyri og í Stykkishólmi er enn vænlegri, 3,5 stig á Akureyri frá 1. október nú, en ekki „nema“ 2,2 í október 1941 til febrúar 1942. Í Stykkishólmi eru tölurnar 3,8 stig nú og 3,0 hæst áður, líka 1941 til 1942.

Þó heldur kaldara sé framundan - sé að marka spár - telur evrópureiknimiðstöðin samt að hiti verði um 2 stigum ofan meðallags áranna 1981 til 2010 næstu tíu daga. 

Úrkoman er líka mikil - sérstaklega í Reykjavík þar sem summan frá 1. október er nú 639 mm. Fjögur tímabil frá 1. október til febrúarloka eiga hærri tölur, 2007 til 2008 með 698 mm, 1920 til 1921 með 685 mm, og 1924 til 1925 með 668 mm. Svo eiga Vífilsstaðir 731 mm sömu mánuði 1912 til 1913 - við vitum ekki hversu samanburðarhæfar þær mælingar eru.

En enn eru tíu dagar til mánaðamóta og fráleitt verður úrkomulaust þann tíma - sýnist að evrópureiknimiðstöðin sé að spá um 50 mm til mánaðamóta. Þó þær spár verði að teljast verulega óvissar er enn greinilega allgóður möguleiki á úrkomumeti.

Mjög snjólétt er á láglendi um þessar mundir, hvergi alhvítt í byggð í dag (föstudag 17.febrúar). Slíkir dagar hefa komið á stangli í febrúar á þessari öld - flestir 4 í sama mánuði árið 2006, en síðan þarf að fara aftur til 1972 til að finna nokkurn aldauðan dag í febrúar - þá voru alauðu dagarnir líka fjórir. Í febrúar 1965 voru þeir sex. Aftar komumst við ekki - daglegar snjóhuluupplýsingar frá eldri tíð eru af skornum skammti í stafrænum gagnagrunnum.  

Vindur hefur nú verið sérlega hægur í marga daga - minni en 4 m/s á láglendi í fjóra daga í röð. Það er óvenjulegt og frá því sjálfvirka stöðvanetið komst á skrið er aðeins vitað um tvo hægari febrúardaga heldur en gærdaginn (fimmtudag 16. febrúar), þeir sýndu sig í febrúar 2005. 


« Síðasta færsla | Næsta færsla »

Athugasemdir

1 Smámynd: Gunnar Heiðarsson

Sæll Trausti

Hvernig var veðurfar í jan, feb og mars, árið 1965? Í mynningunni voru janúar og febrúar það ár einstaklega hlýir en síðan snjóaði mjög mikið í mars, hér á SV horninu. Er þetta rétt munað hjá mér eða er ellin farin að segja til sín?

Gunnar Heiðarsson, 18.2.2017 kl. 08:24

2 Smámynd: Trausti Jónsson

Hiti í janúar 1965 var lítillega undir meðallagi, febrúar fádæmahlýr, en mars aftur á móti mjög kaldur (nema síðustu dagarnir - sem voru óvenjuhlýir). Það var mjög snjólétt - líka í mars.

Trausti Jónsson, 18.2.2017 kl. 16:32

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Nóv. 2019
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Nýjustu myndir

  • w-blogg151119g
  • w-blogg151119g
  • w-blogg151119g
  • w-blogg151119f
  • w-blogg151119e

Heimsóknir

Flettingar

  • Í dag (18.11.): 2
  • Sl. sólarhring: 161
  • Sl. viku: 1857
  • Frá upphafi: 1851368

Annað

  • Innlit í dag: 2
  • Innlit sl. viku: 1580
  • Gestir í dag: 2
  • IP-tölur í dag: 2

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband