Sjávarhiti við Suðvesturland (í gegnum tíðina)

Upplýsingar um sjávarhita við Suðvesturland eru enn götóttari en fyrir norðan. Þó er til allgóð röð frá Vestmannaeyjum og nær hún yfir tímabilið 1878 til 1964. Aftur var mælt í Vestmannaeyjum frá 1998 - að minnsta kosti til 2010 - en ritstjóri hungurdiska hefur ekki séð nýrri tölur þaðan. Einnig var alllengi mælt í Grindavík og mætti e.t.v. með splæsingum ná saman eins konar suðurlandsröð svipað og þeirri norðlensku. 

Bláir ferlar sýna mælingar í Vestmannaeyjum, en grænir mælingar úr Grindavík. Atburðir falla nokkuð vel saman. Nokkru kaldara er lengst af í Grindavík - þar gætir landáhrifa meira heldur en í Vestmannaeyjum. Engar mælingar voru í Vestmannaeyjum á kuldaskeiðinu á síðari hluta 20. aldar, en Grindavíkurmælingarnar sýna vel hina míklu hlýnun sem átti sér stað um aldamótin síðustu - rétt eins og fyrir norðan. Hér vantar meðaltöl fyrir 2011 til 2015 - spurning hvað þá hefur gerst?

Á kalda tímanum fyrir 1920 eru sveiflur frá ári til árs ekki mjög miklar í Vestmannaeyjum - miklu, miklu minni heldur en fyrir norðan (sjá pistil gærdagsins) - en það vekur samt athygli að sveifla 10-ára meðaltala kaldra og hlýrra skeiða er samt ámóta mikil á báðum hafsvæðum, nærri 1,5 stig. 

Fjögur ár, 1885 til 1888 (og reyndar 1892 líka), skera sig mjög úr fyrir kulda sakir í sjó við Vestmannaeyjar. Þetta virðast vera ár hámarksútbreiðslu kaldsjávar við Ísland. Í júní 1888 fylti ís höfnina í Vestmannaeyjum. 

Myndin hér að neðan hafur reyndar sést á hungurdiskum áður - 

Athugasemdir

[Sigurður Antonsson, 24.7.2016 kl. 17:32]

Var að mæla sjávarhitann við Kópavoginn í dag, 12°C? Fyrir 2 árum synti ég stundum á sama stað í 15 ¨C í júlí.

Hvað skyldi meðalhiti sjávar við Faxaflóa vera í júlímánuði? Í efsta lagi sjávar 1-5 metra.

Hvar er að finna upplýsingar sem þessar? Margir aðilar með ólíkar þarfir þurfa áreiðanlega að vinna með slíkar upplýsingar. 

[Trausti Jónsson, 25.7.2016 kl. 01:49]

Meðalsjávarhiti á þessum slóðum í júlí er 11 til 12 stig. - Hafrannsóknastofnun mælir nú hita í Reykjavíkurhöfn og birtir á vef sínum: http://www.hafro.is/undir.php?REFID=11&ID=174&REF=2

Þar má t.d. sjá að í þessum júlímánuði (2016) hefur hann sveiflast frá tæpum 10 upp í tæp 13 stig.