Kaldur sjór - (á eitthvað að vera að ræða hann?)

Ritstjórinn er í vafa - en þegjum ekki alveg.

Fyrst er kort sem sýnir meðalyfirborðssjávarhita í apríl síðastliðnum - eftir greiningu evrópureiknimiðstöðvarinnar. Ætti að vera sæmilega nærri réttu lagi - nema í námunda við ísjaðarinn þar sem alls konar álitamál koma upp.

Litakvarðinn skýrist sé kortið stækkað. Fjólubláu svæðin sýna hvar yfirborðshitinn er undir frostmarki (ferskvatns), bláir litir ná svo upp í +5 stig og guli liturinn markar +10 stigin. Fjögur rauð strik hafa verið sett inn á myndina, tölumerkt til áherslu.

Strik 1 sýnir að mjög mikill hitamunur er á örmjóu svæði suðaustur af Nýfundnalandi, 10 stig á aðeins nokkur hundruð kílómetrum (og það í mánaðarmeðaltali). Þetta er við norðvesturbrún Golfstraumsins. Þar eru miklir sveipir og hlykkir - og lítil hnik geta þýtt stór hitavik - en að jafnaði ekki mjög merkingarbær. 

Ívíð meiri þýðingu hafa vik við strik 2 - þar jafngildir 1 stig í viki færslu marka hlý- og kaldsjávar um 70 til 100 km. Við strik 3 er flatneskja mun meiri og 1 stigs vik til eða frá eru býsna merkingarbær - „tilfærsla“ um 100 til 300 km í kerfinu. Við straumamótin austur og suðaustur af Ísland eru svo líka skörp skil. 

Við skulum líka hafa hitatölur í huga. Á megninu af svæðinu er hiti meiri en 4 stig - og sumarhlýnun varla hafin. 

Næsta kort sýnir svo vik - miðað við 1981 til 2010.

Strikin eru hér líka. Vikin við strik 1 eru mjög stór - en mjög hlykkjótt og tengjast greinilega einstökum sveipum Golfstraumsbrúnarinnar - erfitt að segja hvað nákvæmlega er hvað. Við strik 2 og 3 er hins vegar engin sjáanleg tenging við legu jafnhitalínanna á fyrra korti. Svæðin eru einfaldlega kaldari en meðaltalið. - Í því er einhver merking. Svæðið þar sem vikin eru meiri en -1 stig er nokkuð stórt - en á megninu af bláa svæðinu eru vikin þó aðeins -0,2 til -1,0 stig. - Það er þó vel marktækt - og munar um. 

Við strik 4 er almennt hlýrra en venjulega - en þó virðast aðalskilaboðin e.t.v. felast í því að skilin séu veikari en að meðaltali - hlýrra að tiltölu norðan þeirra heldur en sunnan. 

Þessi neikvæðu vik hafa nú lifað í rúm tvö ár - byrjuðu vestan til á svæðinu og hafa síðan þokast austur á bóginn. En lifa þau áfram - og hvers vegna urðu þau til?

Lítum á fleira - nokkuð flókna mynd. 

Ja, hérna. Fyrst er að geta þess að myndinni er nappað úr grein eftir Kieke og Yashayaev (2015 - sjá tilvitnun í myndarhaus). Staðurinn sem gögnin sýna er í Labradorhafi - suðvestan Grænlands.

Lárétti ásinn sýnir tíma, byrjar á miðju sumri 2002 (lengst til vinstri) og endar á miðju sumri 2014 (til hægri). Lóðrétti ásinn sýnir þrýsting - í desibörum. Desibarið er hentug þrýstieining í sjó vegna þess að gróflega má segja að þrýstingur aukist um 1 bar á hverja 10 metra dýpis, eða 1 dbar á 1 metra. Desibarakvarðinn samsvarar því nokkurn veginn metrum í sjávardýpi. 

Þetta er sum sé tímaþversnið - sjávardýpi á lóðréttum ás, en tími á láréttum. Litirnir sýna hins vegar mættishita (enginn friður fyrir honum). Mættishiti er í þessu tilviki sá hiti sem sjór fengi ef hann væri dreginn upp af dýpi (til minni þrýstings) til sjávarmáls. Rétt eins og í lofthjúpnum segir mættishitinn mikið um stöðugleika.

Mættishiti fellur með dýpi í sjónum - kaldasti sjórinn liggur neðst. Til að við áttum okkur betur á því sem myndin sýnir skulum við líta stækkaða búta úr henni (neðan við meginmyndina).

Sá sem er til vinstri sýnir okkur vel að árstíðasveifla er í hitanum. Strikin við efri brún myndarinnar sýna áramót - þá gerist eitthvað - alltaf. Út úr þessum bút klippum við svo annan - þann til hægri - sem sýnir árið 2011 - frá sjávaryfirborði og niður á um 700 metra dýpi. 

Hér ættu megindrættir að sjást vel. Sólarylur hitar sjávaryfirborðið að vori og sumri - ylurinn hækkar mættishitann og smám saman blandast hann niður á meira dýpi - það gengur þó illa sé vindur hægur um lengri tíma - hlýr sjórinn flýtur vel. Hraði blöndunarinnar vex þegar kemur að hausti - þá fara haustlægðirnar og öflugir vindar þeirra að hjálpa til - hlýindin eru svo enn á leið niður í djúpið þegar yfirborðið fer um síðir að kólna þegar langt er liðið á haust. - Í desember tekur kuldinn svo völdin - þá fellur hiti (og mættishiti) ört og loks missir yfirborðsjórinn flot og fer að sökkva. Ofsaveður vetrarins auðvelda auk þess blöndun kuldans niður á dýpið. 

Myndin sýnir að þessi kæling blandar sjóinn á hverjum vetri - en mjög mislangt niður. Á aðalmyndinni má sjá að veturnir 2008 og 2014 skera sig úr - þá nær blöndunin miklu dýpra - yfirborðssjórinn hefur kólnað mun meira en aðra vetur. Kólnunin síðarnefnda árið var þó mest. - Og síðan þá hefur sumarhitinn ekki alveg náð sömu hæðum og áður (sést ekki á myndinni), veturinn 2015 bauð upp á svipuð skilyrði - en við vitum ekki enn um þann nýliðna, 2016. 

Við ættum að sjá af þessari mynd að svo getur viljað til að sumarylurinn blandist seint niður - flotið sé gott. Sé sjórinn tiltölulega ferskur aukast líkur á slíku ástandi. Þá gætum við fengið að sjá jákvæð vik í yfirborði yfir sumarið. Gerist það í sumar eru það ekki endilega sérlega jákvæð tíðindi - kuldinn liggur þá trúlega enn í leyni rétt undir og kemur aftur í ljós þegar vindblöndun hefst í haust.

Sú þróun sem við vildum helst sjá er að hægt og rólega dragi úr vikunum - slíkt gæti bent til þess að sumarylurinn sé hægt og bítandi að vinna á kuldanum - og að ferskvatnslagið sé ekki að styrkjast (það vilja menn ekki). 

Þessi seta er nú orðin nógu löng - en við skulum samt taka eftir því að lokum að til að ná lóðréttri blöndun þarf yfirborðshiti að falla niður fyrir 3,5 stig - eða þar um bil. Sú tala er ekki mikið hærri austar í Atlantshafinu - flotsamskipti milli yfirborðs og dýpri laga eru því illmöguleg þar - til þess þyrftum við að sjá -5 stiga sjávarhitavik. Eins og áður var bent á er það svæði sem hiti er lægri en 4 stig lítið miðað við flatarmál hafsvæðisins alls. 

En abbast þetta eitthvað upp á okkur - og þá hvernig? Það er svo önnur saga - og enn lengri - og ekki allt sem sýnist í þeim efnum. 

Athugasemdir

[Guðrún (IP-tala skráð) 8.5.2016 kl. 11:01]

Sæll Trausti og takk fyrir þennan ákaflega fróðlega pistil!

 

Eiginlega hef ég samt fleiri spurningar eftir hann en fyrir J 

Það virðist þó ljóst að á stóru svæði fyrir sunnan Ísland er sjórinn 0-2 gráðum kaldari en meðaltali árstímans á tímabilinu 1980-2010, þó jörðin sé almennt að hlýna.

Samkvæmt hitaþverskurðartímaröðinni frá Labradorhafi virðist þá hitinn á 1-2 km dýpi vera hærri við lok tímabilsins en upphaf þess en hitastigsstigullinn minni. Þarna í lokin verður svo meiri blöndun og því yfirborðshiti lægri? 

Skil ég þig rétt að austar og nær okkur þá verður ekki blöndun vegna vetrarkólnunar þar sem yfirborðshiti sjávarins verður ekki nógu lágur? Og að ef mikið er af ferskvatni við yfirborðið þá vinnur það gegn blöndun – þar sem það er léttara en sjór? 

En lærdómurinn er þá kannski að vindasamur vetur ( eins og 2013/14, og enn frekar 2014/15 ) valda mikill blöndun og köldum yfirborðssjó? Veturinn sem er að enda var nú ekki eins vindasamur hjá okkur, veit ekki um Labradorhaf.

Eru til svona hitaþverskurðartímaraðir frá svæðum nær Íslandi, þar sem hlýr Norðuratlantshafsstraumur streymir norðaustur nær yfirborði en kaldur djúpsjór streymir suður? Það væri forvitnilegt að vita hvort það er sambærilegur hitastigull þar og hefur verið síðustu áratugi, eða hvort hitinn er jafnari líkt og við Labrador?

Bestu kveðjur og kærar þakkir fyrir þetta blogg !

[Trausti Jónsson, 8.5.2016 kl. 12:56]

Á haustin verður alltaf nokkur blöndun á öllu svæðinu bæði vegna kólnunar og vinda. Sú blöndun er hins vegar grunnstæð miðað við það sem gerist í Labradorhafi - og líka fyrir norðan Ísland. Þessi tvö svæði (og hugsanlega líka blettur á Grænlandshafi) eru þeir einu á norðurhveli þar sem blöndun getur átt sér stað milli yfirborðs- og djúpsjávar - djúpsjávarmyndun á sér stað. Vindblöndun - ein og sér - býr ekki til djúpsjó - en útrýmir þó hlýjasta yfirborðslaginu á hverju hausti. Bæði eðlismassi og eðlismassahámark eru háð seltu. Sé vatn ferskt er eðlismassi þess mestur við 4°C - meðan það kólnar niður í 4 stig sekkur það - við lægri hita vex flotið aftur. Eðlismassahámark þetta lækkar aftur á móti með aukinni seltu. Fullsaltur sjór er þyngstur (hefur minnst flot) nærri frostmarki sínu (-2 stig). Flotjafnvægi sjávar er þannig mjög flókið - selta sjávar af mismunandi uppruna er misjöfn - og þar með eru floteiginleikarir það líka. Auk þess breytir hafísmyndun floteiginleikum á „óvæntan“ hátt. - Ég hef því miður ekki séð eiginlegar hitaþverskurðartímaraðir frá svæðum fyrir sunnan land - en meðalhita í lengdarsniðum hins vegar - en aðeins fyrir allt árið. - Sæmilegt samkomulag virðist um að djúpsjávarmyndun auðveldi streymi hlýsjávar úr suðri til norðurs á yfirborði - og mildi þar með veðurfar á okkar slóðum. Hins vegar deila menn um hversu miklu máli þetta skiptir miðað við aðra þætti [t.d. hvort kalt þurfi að vera til að djúpsjávarmyndunin eigi sér stað - og hún virki því fyrst og fremst sem dempari í kuldatíð (með auknu innstreymi hlýsjávar), en skipti hins vegar engu - eða blandi bara upp kaldari sjó - sé hlýtt]. Sitthvað virðist bíta í annars horn og öll kurl ekki komin til grafar.

[Hilmar Hafsteinsson (IP-tala skráð) 8.5.2016 kl. 17:14]

Sæll Trausti. Má skilja vafasamar hugleiðingar þínar um markverða kólnun Atlantshafsins sem opnun á þann möguleika að það muni kólna á Íslandi á næstu áratugum? Ef svo er, skoðast það þá ekki sem viðurkenning á að spár sérfræðinga Veðurstofunnar, et. al, um allt að 6°C hækkun meðalhita á Íslandi á þessari öld séu orðnar dálítið fallvaltar?

http://www.vencoreweather.com/blog/2016/4/28/215-pm-atlantic-ocean-showing-signs-of-a-significant-long-term-shift-in-temperatures-from-warm-to-cold

[Guðrún (IP-tala skráð) 8.5.2016 kl. 17:21]

Takk Trausti aftur fyrir frekari svör

Það er áhugavert fyrir leikmann að skoða þessar myndir og velta fyrir sér þessari eðlisfræði. Hafandi séð hve loftslag er kalt víðast á okkar breiddargráðu vaknar maður til meðvitundar um að hlýjir sjávarstraumar skipta okkur miklu.

Ef ég skil svarið þitt rétt þá sýna hitastigsþverskurðartímaraðirnar sem þú sýndir frá Labradorhafi djúpsjávarmyndun. Er þá hin öfluga blöndun 2014 og 2015 til marks um aukna djúpsjávarmyndun? Sem skv. kenningunni ætti að hjálpa hlýsjónum að sunnan...? 

Það virðist fremur borðleggjandi samt að ef það er mikið ferskvatnsblöndun í yfirborðslögum sjávar sem berst norður þá sekkur það vatn varla þótt það kólni, Wikipedia segir að hámarks eðlismassi ferskvatns sé 1000 kg/m3 við 4 gráður meðan fullsaltur sjór liggur í 1027-1028 við 0-5 gráður og sjávarmálsþrýsting. Blanda sjávar og ferskvatns liggur væntanlega þarna á milli og vill fjóta ofaná saltari sjó.

Þá þarf sennilega ísmyndun til að auka seltuna í sjónum svo það komist eitthvað fútt í þetta!

Allavega, kaldur sjór eða ekki, vorið er komið á prýðilegt skrið svo ég kvarta ekki ! 

Bestu þakkir fyrir fræðsluna, kann að meta þolinmóð svör J

[Trausti Jónsson, 8.5.2016 kl. 19:17]

Guðrún: Hafísmyndun hefur mikil áhrif á stöðugleika (flot) í efstu lögum sjávar - og á fleiri en einn hátt. Eitthvað hefur verið um það fjallað áður á hungurdiskum. Djúpsjávarmyndun í Labradorhafi er ákveðið heilbrigðismerki hringrásarinnar - en til lengri tíma litið skiptir máli hvaða sjógerðir það eru sem eru að sökkva og blandast - því ferskari sem sá sjór sem blandast er - því óheppilegra í lengdina. Kannski má fjalla eitthvað um það síðar. Hilmar: Samræmi er á milli hitafars á Íslandi og á því svæði sem nú er tiltölulega kalt á sumum tímakvörðum en ekki öðrum. Á hafísárunum svonefndu þegar hvað kaldast var hér á landi var t.d. lengi vel fremur hlýtt suðvestan Grænlands - jafnvel hægt að tala um að þar hafi verið óvenjuhlýtt - kuldinn hér og hlýindin þar voru reyndar hluti af sömu atburðarás. Svipað virðist hafa átt sér stað á 19. öld - kaldasti - eða næstkaldasti áratugur þeirrar aldar hér á landi, sá sjöundi, virðist hafa verið sérlega hlýr á því svæði sem kalt er þessa mánuðina. - Sömuleiðis hluti af einhverri atburðarás þess tíma. Við vitum ekkert enn um það hvers konar afleiðingar köldu vikin hafa nú hér á landi - eða hvort þau skipta yfirhöfuð einhverju máli - beinast liggur við að halda að þau auki suðaustanáttir - en þær eru aldrei beinlínis kaldar -. Hilmar virðist hér svo slá nokkuð saman hugtökunum „spá“ annars vegar og „sviðsmynd“ hins vegar í umræðum um sexstigahlýnun - erfitt er að ræða málin í slíkum misskilingi miðjum. En við vitum ekkert handfast um framtíðina.

[Hilmar Hafsteinsson (IP-tala skráð) 8.5.2016 kl. 19:56]

Þakka svarið Trausti. Svo ég umorði spurninguna til að auka líkur á svari: Riðlast ekki sviðsmyndir sérfræðinga Veðurstofunnar, sem sannarlega hafa teiknað upp allt að 6°C meðalárshlýnun á Íslandi á öldinni, ef það heldur áfram að kólna á Íslandi næstu áratugi? Ennfremur má varpa fram þeirri spurningu hvort það fari nú ekki að vera fullljóst að hafstraumar stjórna meðalhita jarðar?

https://www.facebook.com/photo.php?fbid=10209493605325425&set=gm.1042409292497168&type=3&theater

[Emil Hannes Valgeirsson, 8.5.2016 kl. 21:19]

Takk fyrir þessar pælingar. Það hafa verið ýmsar hugmyndir um ástæðu þessarar kólnunar á sjónum. Oft hefur ferskvatnsstreymi frá Grænlandsjökli verið sagt um að kenna og almennri veikingu á golfstraumnum vegna hlýnunar jarðar. Kannski er eitthvað til í því. Ég hef þó meiri trú þessum veðurfarslegum ástæðum sem koma fram hér meðal annars. Vægna þess hvernig lægðir og vindar höguðu sér veturna 2013-14 og 2014-15 þá streymdi ískalt loft út á Atlantshafið frá Kanada og suður af Grænlandi sem gæti hafa kælt yfirborðslög sjávar þessa vetur. En þá er einnig spurning hversu mikið þessir sömu vindar náðu að hafa áhrif á streymi kaldsjávar suður með Labrador og suður með Grænlandi og út á Atlantshafið. Vangaveltur mínar snúast sem sagt um það hvort kæling sjávarins hafi að mestu verið vegna kalds lofts sem streymt hefur yfir hafið, eða hvort vestanvindarnir frá N-Ameríku hafi dregið niður kaldan sjó úr norðri og átt sinn þátt þessari kælingu. 

[Trausti Jónsson, 8.5.2016 kl. 22:36]

Emil - er ekki í vafa um að aukanorðvestanátt vetranna 2014 og 2015 skiptir hér öllu máli. Aukið magn ferskvatns á svæðinu (sé um slíkt að ræða) er annað mál og e.t.v. eitthvað sem má hafa áhyggjur af til lengri tíma - en ekki hvað varðar þessa ákveðnu vikaþrásetu nú. Norðvestanáttarauki á svæðinu yfir Labradorísnum eykur flæði hans til suðurs og eykur ís við Nýfundnaland - en þjappar ísnum líka saman - bráðnun hans í suðlægri stöðu getur svo skilað ferskvatnsauka inn á ný svæði síðar. Að mínu mati er ástæðu norðvestanáttaraukans að finna í hlýindinum við vesturströnd Ameríku - því sem þar var kallað „the Blob“ - „slettan“. Þau hlýindi bæta í styrk Klettafjallaháloftahryggjarins - og auka þar með líka styrk Baffíndragsins - áttin milli kerfanna tveggja verður norðlægari en vant er. - Það eru svo einhverjir veðuratburðir Kyrrahafsins - enn vestar eða sunnar - sem bjuggu slettuna til.

Af einhverjum ástæðum hefur síðari athugasemd frá Hilmari H ekki skilað sér í listann hér fyrir ofan - þrátt fyrir samþykkt. Hún gerir það kannski síðar. Hún er svona:

„Þakka svarið Trausti. Svo ég umorði spurninguna til að auka líkur á svari: Riðlast ekki sviðsmyndir sérfræðinga Veðurstofunnar, sem sannarlega hafa teiknað upp allt að 6°C meðalárshlýnun á Íslandi á öldinni, ef það heldur áfram að kólna á Íslandi næstu áratugi? Ennfremur má varpa fram þeirri spurningu hvort það fari nú ekki að vera fullljóst að hafstraumar stjórna meðalhita jarðar?“

Svar: Kólnun á Íslandi kannast ég lítt við - þótt til allrar hamingju hafi hægt nokkuð á þeirri óðahlýnun sem hér var í gangi um tíma um aldamótin - alla vega tímabundið. Sviðsmyndir gilda auðvitað áfram - þær eru sviðsmyndir - notaðar til afmörkunar vandamála. Í loftslagsskýrslunni sem væntanlega er verið að vitna til eru margar slíkar sviðsmyndir - meira að segja ein sem gerir ráð fyrir kólnun til næstu aldamóta - sú virðist alltaf fara framhjá Hilmari og fleirum - enda er það ekki spá frekar en sú á hinum jaðrinum. Meginsviðsmyndir skýrslunnar sýna þó allar hlýnun á bilinu 0,0 til 3,8 stig til aldamóta - en ekki 6 stig eins og halda mætti af Hilmari. Ný skýrsla er væntanleg í haust eða vetur (2016-2017) - hvaða framtíðarsviðsmyndir verða á borðinu þar veit ég ekki.

Rétt er að hafstraumar ráða ýmsu um hita, jafnvel hnattrænt og auðvitað miklu staðbundið - en orsaka breytinga í hafinu er venjulega að leita í einhverjum atburðum/þróun (stundum yfirstandandi - en stundum löngu liðnum) í lofthjúpnum. Þær gríðarlegu breytingar sem nú eru í gangi á geislunareiginleikum lofthjúpsins munu um síðir hafa áhrif á hafið (fyrir utan svo súrnunina). Við vitum ekki hver.

[Torfi Kristján Stefánsson, 8.5.2016 kl. 22:59]

Til "allrar hamingju" hafi hægt á óðahlýnunni um aldamótin, segir þú! Ég er ekki viss um að allir séu sammála þeim fögnuði þínum Trausti! Ég bjó þá í Svíþjóð og heyrði gleði fólks hér heima yfir hlýindunum. Loksins kom þokkalegur hiti á höfuðborgarsvæðinu á sumrin, eða upp undir 20 stig suma góðvirðisdaga sem varla hafði gerst áður! Gróðri fór einnig mjög fram á þessum árum. 

Á þessu hefur hægt talsvert eins og þú staðfestir hér, líklega síðan 2006, og virðist sem verið sé að sækja í gamla farið. Tiltölulega kalt vor og svöl sumur. 
Mér finnst nú að við hér á norðurhjara ættum að fagna hlýnuninni á okkar svæði en jafnframt harma hlýnun annars staðar á hnettinum sem nógu hlýtt er fyrir.

[Hilmar Hafsteinsson (IP-tala skráð) 8.5.2016 kl. 23:33]

Endurtekið þakklæti fyrir svarið Trausti. Vinsamlegast leiðréttu mig, en ég fæ ekki betur séð en að á bls. 113 í skýrslunni "Hnattrænar loftslagsbreytingar og áhrif þeirra á Íslandi" frá 2008 standi eftirfarandi:

"Niðurstöður margra loftslagslíkana benda til þess að fram undir miðja öld muni hlýna um rúmlega 0,2 gráður á áratug á Íslandi. Um miðja öldina verður heildarhlýnunin 1°C miðað við árið 2008, en óvissumörk eru ±1,1°C. Þótt óvissumörkin séu nokkur eru þó yfirgnæfandi líkur á hlýnun. Fyrir síðari hluta aldarinnar er hlýnunin mjög háð forsendum um losun gróðurhúsalofttegunda og liggur á bilinu 1,4 til 2,4°C með líklegri óvissu á bilinu 1,0 til 1,5°C."

Samkvæmt ofanrituðu reiknast mér til að hámarkshitasviðsmynd fram undir miðja öld gangi út á 2,1°C og að sama skapi 3,9°C fyrir síðari hluta aldarinnar.

Ég gerðist svo djarfur að leggja saman 2,1 og 3,9 og fékk út 6°C.

[Trausti Jónsson, 8.5.2016 kl. 23:56]

Hilmar - ekki er þrasað um að skýrslan minnist á 6 stig - hún gerir það - en samt eru aðalsviðsmyndir á allt öðru bili - eins og sjá má greinilegast á myndunum á bls. 114 og 115 - þær ná ekki einu sinni upp í 5 stig - en niður í -1 stig. Aðalsviðsmyndir eru markaðar með örvum. Í myndartexta á síðu 114 stendur: „Langlíklegast er að það hlýni til loka aldarinnar. Ólíklegt er að það hafi kólnað við lok aldarinnar, en áratugasveiflur í veðurfari geta valdið tímabundinni kólnun um allt að einni gráðu.“ Hér er sum sé ekki einu sinni fullyrt með vissu að það hlýni yfirhöfuð nokkuð til loka aldarinnar - heldur stendur einungis „langlíklegast er“. Sömuleiðis stendur „ólíklegt er að það hafi kólnað ...“ - en ekkert er fullyrt um að slíkt muni alls ekki gerast. - Öllum möguleikum haldið opnum eins og vera ber - en líklegar afleiðingar mismunandi sviðsmynda tíundaðar. - En ólíklegir hlutir eru sífellt að gerast - oftast hefur enginn haft grun um þá fyrirfram - eins er og verður með veðrið.  

[Hilmar Hafsteinsson (IP-tala skráð) 9.5.2016 kl. 18:40]

Mæl þú manna heilastur Trausti. Ólíklegir hlutir eru sannarlega sífellt að gerast. Nú síðast var fráfarandi varaformaður IPCC að staðfesta að meint manngerð hnatthlýnun ætti engan þátt í náttúrulegum sveiflum El Nino.

Þær gríðarlegu breytingar sem sífellt eru í gangi í geislunareiginleikum lofthjúpsins eru að sjálfsögðu af náttúrulegum toga.

http://www.examiner.com/article/global-warming-not-behind-el-ninos-says-former-ipcc-chair