Háþrýstisvæði og hlýrra loft (?)

Þótt „hretið“ að undanförnu nái vart máli sem slíkt - (alla vega meðal pollíönnuaðdáenda sem og veðurtrúbræðra ritstjóra hungurdiska - skiljum skýrt hér á milli) hefur veðrið verið heldur dauflegt. Landsmeðalhiti undanfarinna daga er á bilinu 3 til 4 stig - sem er að vísu ekki nema einu til einu og hálfu stigi undir meðallagi síðustu tíu ára - en við viljum meira. 

Nú hagar svo til að hlýtt loft stefnir í átt til landsins - en því miður bæði úr suðvestri og suðaustri - kalda loftið lendir kannski bara undir báðum sóknum - króast af? - En reiknimiðstöðvar gera samt ráð fyrir því að suðvestansóknin nái landi.

Ef rétt reynist er það auðvitað fínt - sérstaklega fyrir landið austanvert, en aftur á móti er vestanáttin sjaldnast fagnaðarefni á Vesturlandi á þessum árstíma - en við sjáum til með það.

Kortið sýnir sjávarmálsspá evrópureiknimiðstöðvarinnar sem gildir síðdegis á sunnudag (8. maí) - einnig fylgir hiti í 850 hPa.

Hér er kalda loftið enn yfir landinu - en vindur er afskaplega hægur og veður meinlítið. En þó eru einhverjir grænir smáblettir yfir landinu - og tákna úrkomu. Hlýja loftið úr suðaustri virðist ekki eiga langa leið til landsins - en sú sókn virðist renna út í sandinn hvað okkur varðar vegna hlýindanna sem stefna til norðurs austur af Nýfundnalandi. 

Meginás kalda loftsins hrekst því fyrst til vesturs undan austansókninni - en áður hlýindi ná til okkar stuggar suðvestansóknin kuldanum aftur til austurs og framlengir dvöl hans í nágrenni okkar. - En svo kemur vestanáttin víst um síðir. - Reynist þær spár réttar verður athyglisvert að sjá hana rífa í hafísinn á Grænlandssundi - sem reyndar er með minnsta móti. 

Tíu daga þykktarvikaspá reiknimiðstöðvarinnar sýnir vel austur- og vesturhitann - og hvernig við liggjum að meðaltali á milli. Þykktin mælir hita í neðri hluta veðrahvolfs og vik hennar frá meðallagi eru allgóður vísir á hitafar við jörð. 

Þetta er nú talsvert betra en verið hefur (ef rétt reynist) - og spárnar í kvöld gefa jafnvel von í mestu hlýindi ársins til þessa. Tími til kominn - því marsmánuður á enn fjóra hlýjustu daga þess.  

Athugasemdir

[Anna Sigríður Guðmundsdóttir, 7.5.2016 kl. 01:44]

Þú stendur þig vel Trausti. Verst að hafa ekki svona vitringanna leiðarljóssins trausta-spámenn í bankaspádeildum áhættusömu kaupahallarinnar. Þar er allra veðra von á hverjum degi, og engin björgunarsveit til að grípa fórnarlömb kauphallarspilavítisins.

Maður er eiginlega alveg orðin dofin fyrir raunverulegum náttúruhamförum, veðrum og vindum, því heimskauphallar-náttúruhamfarirnar eru svo miklu skaðlegri.

Ef kuldaveður drepa ekki allt kvikt, þá gera kauphallar-bankamafíurnar það.

M.b.kv. 

[Torfi Stefánsson (IP-tala skráð) 7.5.2016 kl. 08:34]

Já, hún Pollýanna! "ekki nema" einni til einni og hálfri gráðu kaldari byrjun á maí en meðaltal síðustu 10 ára! Það finnst mér mikið enda aldrei verið þjakaður af Pollýönnu-syndróminu.

Ég býst við að Húsvíkingar geti tekið undir með mér: http://www.visir.is/jafntefli-i-snjokomu-a-husavik/article/2016160509233

Annars væri forvitnilegt - og þakksamlegt - að fá nákvæmar tölur yfir hitafarið þessa fyrstu vikuna í maí, bæði í borginni og á Akureyri. 

[Trausti Jónsson, 7.5.2016 kl. 12:00]

Þakka vænar óskir Anna Sigríður. Græðgin er sannarlega hættuleg synd - en þær eru fleiri systur hennar, enn lævísari - og allar leiða okkur til helvítis - á síðustu tímum auðvitað undir fögrum framfaraslagorðum. - En í náttúrunni býr réttlæti tilviljunarinnar - og fellir hún ekki alltaf dóma að okkar skapi. - En hungurdiskar eru víst ekki stjórn- eða trúmálablogg og rétt að ritstjórinn haldi sér við sitt.

Torfi. Fyrsta vika maí er ekki alveg liðin - en meðalhiti í Reykjavík fyrstu 6 dagana er 4,4 stig, +0,1 stigi yfir meðallagi áranna 1961 til 1990, en -1,5 stigum undir meðallagi síðutu tíu ára. Á Akureyri er hitinn 3,5 stig, +0,5 stigum yfir 1961 til 1990, en -1,7 undir meðallagi síðustu tíu ára. Hiti er yfir meðallagi áranna tíu á fáeinum stöðvum eystra, mest +0,5 stig á Teigarhorni, en mest undir inn til landsins á Norðurlandi, -2,3 stig við Mývatn. Reykjavíkurhitinn er í 41. sæti á 68-ára listanum - það telst ekki á hretasvæðinu, sömu daga 1979 var meðalhitinn 7 stigum lægri en nú - og ámóta kalt var 1982. Ársmeðalhitinn í Reykjavík er nú í 23. sæti á 68-ára listanum - hátt í 20 sætum ofar en á sama tíma í fyrra.

[Guðrún (IP-tala skráð) 7.5.2016 kl. 15:53]

Takk fyrir þessa pistla Trausti.

Eru einhverjar fréttir af sjávarhita fyrir sunnan Grænland? Það var mikið rætt um kaldan yfirborðssjó á þessum slóðum fyrir um ári síðan, og áhugavert væri að fá fréttir af því hvort þessi kuldapollur er enn fyrir hendi, eða hvort yfirborðshiti sjávar hefur farið aftur í meðallag.

[Trausti Jónsson, 7.5.2016 kl. 18:30]

Guðrún, „kuldinn“ suður í hafi er enn til staðar - hefur heldur breitt úr sér austur á bóginn - en vikin ekki aukist. Síðastliðinn vetur fór mildari höndum um hafið en tveir þeir næstu á undan - þó tekur viðsnúningur tíma - kannski langan.