Umskipti (leiða til hvers?)

Háþrýstisvæðið mikla sem fært hefur okkur hlýindin að undanförnu er nú að mestu niðurbrotið - og mikill lágþrýstingur kemur í staðinn. En ekki er samt alveg ljóst til hvers hann leiðir - nema hvað ríkjandi áttir verða trúlega austlægar. En verður það sjávaryljað svalloft úr vestri sem endar hér sem austanátt - eða fáum við innslag úr norðri - sem viljugir gætu þá kallað páskahret?

Lítum fyrst sem snöggvast á meðalþrýsting og þrýstivik síðustu tíu daga.

Hér er hæðin í öllu sínu veldi - vestan við hana er loftið komið langt úr suðri - hefur að auki á sér hagstæða hæðarsveigju - enda hefur hiti norðaustan og austanlands verið eftir því - þótt bráðnandi snjór hafi forðað metum að mestu. 

Meðalkort næstu tíu daga (21. til 31. mars) er allt öðru vísi.

Hér er óvenjuöflugt lægðasvæði fyrir sunnan land - mikil neikvæð vik, -18 hPa þar sem mest er. Megnið af loftinu í lægðinni er komið úr vestri, en við sjáum þó að þrýstilínur eru þéttar úti af Norðaustur-Grænlandi en þar lúrir köld stroka úr norðri. 

Þótt þetta norðanloft sé kalt - er það samt hlýrra en að meðaltali á þessum tíma árs. Vestanloftið er hins vegar kaldara en vant er - þótt það sé hlýrra að mati hitamæla. Þetta sést vel á vikakorti 850 hPa hitans sömu daga.

Hlýtt (að tiltölu) fyrir norðan land - en kalt suður í hafi. Harla kunnugleg mynd að verða. En reyndar erum við hér að mæla hitavik í 850 hPa - í um 1300 metra hæð yfir sjávarmáli - norðankuldi nýtur sín betur við sjávarmál - getur laumast undir hlýindin. 

Breytingin verður ekki sérlega snögg - eða ill. Kortið hér að neðan sýnir undirbúning umskiptanna - gildir kl. 6 að morgni miðvikudags 23. mars.

Hér er sérlega djúp lægð (miðað við árstíma), 947 hPa í miðju við Labrador - þar við ströndina er ofsaveður eða jafnvel fárviðri (sé að marka spána). Sé rýnt í kortið má sjá að frost er meira en -15 stig yfir nær öllu Nýfundnalandi - en Atlantshafið tekur á móti og þegar þetta loft verður komið norðaustur á okkar slóðir hefur það hitnað um að minnsta kosti 10 stig. 

Hlýja sóknin í austurjaðri lægðarinnar (rauða örin) er ósköp aum og rennur að mestu út í sandinn. En við Norðaustur-Grænland má einnig sjá -15 og -20 stiga jafnhitalínurnar (í 850 hPa). Sumar spár gera ráð fyrir því að eitthvað af þeim kulda komist hingað til lands um helgina - eða upp úr henni - en aðrar gera ráð fyrir því að Atlantshafsloftið haldi öllum völdum alla tíu dagana og að „hlý“ norðaustanátt haldi áfram að vera hlutskipti okkar  - eins og tíðast í vetur. - Höldum þó gæsalöppunum á hreinu - norðaustanátt er (næstum) aldrei hlý - aðeins hlý að tiltölu. 

En ekki verður langt í norðaustanstrenginn - vindakortið hér að neðan gildir sólarhring síðar en það fyrra.

Hér sýna hvítu örvarnar kalda loftið - sú úr norðri strýkst við Vestfirði - en sú úr suðvestri fer að mestu hjá fyrir sunnan land. 

Athugasemdir

[Hjalti Þórðarson (IP-tala skráð) 22.3.2016 kl. 09:48]

Oft hefur norðaustan áttin verið hlý að tiltölu eins og þú kallar það Trausti. Og það marga undanfarna vetur. Jafnvel svo að einhverja daga í janúar til mars (ekki núna í vetur) er úrkoma í formi slyddu eða rigningu um norðanvert landið og það í norðlaustlægri vindátt. Það er eitthvað sem passar ekki við þá mynd. Á norðanverðu landinu á að snjóa á veturna í norðanátt og hlákurnar eigi að koma í sunnanátt. Auðvitað veit maður að hlýr sjór norður af landinu hefur mikil áhrif. Furðuleg samt hvað mikill kuldi náði að hreiðra um sig í langan tíma í vetur (des-feb), svona allavega miðað við seinni ár. 

[Trausti Jónsson, 22.3.2016 kl. 17:21]

Þó veturinn sem nú er að líða hafi skilað sínum skammti af illviðrum á landsvísu var meðalvindhraði samt minni en verið hefur undanfarin ár. Kalt loftið sem verður til við útgeislun hefur því fengið meiri frið til langsetu yfir landinu norðaustanverðu í vetur - þessa hefur þó mest gætt inn til landins.