Liggur enn í leyni

Kalda loftið liggur enn fram á lappirnar fyrir norðan land - þótt ásókn þess í gær (fimmtudag) hafi ekki skilað því miklum landvinningum. Hlýja loftið leitar aðallega til austurs fyrir sunnan land - hver bylgja hálfgerðra sumarhlýinda gengur austur um Evrópu. 

Á sunnudag verður enn ein hlýindatotan á leið til austurs fyrir sunnan land eins og sjá má á spákorti evrópureiknimiðstöðvarinnar sem gildir um hádegi á sunndag (20. desember).

Jafnhæðarlínur eru heildregnar. Þykkt er sýnd í lit - hún mælir meðalhita í neðri hluta veðrahvolfs. Því meiri sem þykktin er því hlýrra er loftið. Mörkin á milli grænu og bláu litanna er við 5280 metra - rétt yfir meðallagi árstímans hér á landi. 

En við sjáum að töluverður þykktarbratti er fyrir norðan land - jafnþykktarlínur eru þéttar - þar skiptast ört á bláir litir - því dekkri og kaldari eftir því sem norðar dregur. Eins og sjá má er vindur í háloftunum hægur yfir landinu (langt á milli jafnhæðarlína) - en vindátt þó af vestri - nokkuð samsíða þykktarbrattanum - og slakar aðeins á norðaustanáttinni sem þykktarbrattinn er að búa til - 

[Þeir sem rýna í kortið og reyna að slá á vindinn sjá að ljósbláa ræman yfir landinu norðvestanverðu býr til vind sem er meiri en 20 m/s - en jafnhæðarlínurnar (vestanáttin) slá á um kannski 5 m/s. Nettóniðurstaða er því 15 m/s - jæja - við erum bara að slá á þetta - skoðið frekar raunverulegar vindaspár á vef Veðurstofunnar].

Við sjáum í einn af stóru kuldapollum norðurhvels vestan við Grænland - þann sem við höfum gjarnan kallað Stóra-Bola, til aðgreiningar frá öðrum veigaminni. Hann er ekki mjög fyrirferðarmikill en býsna kaldur - þykktin í honum miðjum er minni en 4800 metrar. Grænland verndar okkur að mestu fyrir aðsókn - en samt er aðalóvissa jólahelgarinnar tengd hreyfingum hans - og hvort eitthvað af kuldanum brýst austur um og búi til jólasnjó. 

Bandaríska veðurstofan er með þannig hugmynd þegar þetta er skrifað [10-20 cm í Reykjavík] - en evrópureiknimiðstöðin er mun hógværari (og hefur oftar rétt fyrir sér). Við tölum ekki meir um það - enda gæti jólasnjórinn þess vegna komið strax þar sem hann er ekki þegar kominn. Hér er engu spáð. 

Athugasemdir

[Torfi Stefánsson (IP-tala skráð) 19.12.2015 kl. 08:54]

Ég sá nýlega að það var komið nýtt (ekki-korta)tímabil hjá loftlagsbreytinga-liðinu, þ.e. 30 ára viðmiðunartímabil. 1981-2010 í stað 1961-90. Það er auðvitað miklu sanngjarnara en að vera alltaf að miða við kuldatímabilið ´61-´90 því seinna tímabilið nær bæði kulda- og hlýskeiðinu. 

Ég sé að þú Trausti ert enn með samanburð við kuldaskeiðið - og þá líklega til að sýna fram á hlýnunina síðan þá og að árið í ár sé í raun ekkert svo kalt. Samt stefnir í að það verði heilli gráðu undir meðallagi síðustu 10 ára (4,5 stig en hefur verið 5,5 stig að meðallagi undanfarið).

Sama virðist reyndar vera í gangi hjá panel SÞ og loftlagsfræðingum. Yfirleitt er miðað við mikið kuldatímabil til að sýna hnattræna hlýnun. Viðmiðunin er 1850-1900 (hvort árið sem er miðað við er mjög óljóst). Hlýnunin síðan þá er 0,87 gráður sem hlýtur að teljast mjög lítið á svona löngu tímbili, 115-165 árum.

Ljóst er að hlýnunarfræðin er orðin að mjög ábatasömum iðnaði og nú þegar helstu ráðamenn heimsins eru stokknir á þann vagninn má ætla að fjármálaöflin í heiminum séu farin að gera sér grein fyrir því og ætla að nýta sér það. 

Enda er ekkert verið að tala um að breyta lífsháttum, draga úr ferðalögum, leggja bílnum eða minnka neysluna. Nei aldeilis ekki. Það er tæknin sem á að bjarga okkur - og við þurfum engu að fórna.

Er það þá virkilega svo rosalega framsækið og flott að vara við hnattrænni hlýnun? Er það ekki bara enn einn smáborgarahátturinn?

[Trausti Jónsson, 19.12.2015 kl. 23:46]

Í næsta pistli er fjallað nokkuð um efni athugasemdar 1 - reyndar er hinni brennandi spurningu um það hver er smáborgari ekki svarað - lesendur verða að finna út úr því sjálfir.