Þarf eina lægð enn - til þess að hann kólni að marki

Nú er hann genginn í norðanátt - sem ekki er þó sérlega köld. Landsmeðalhiti í dag (fimmtudag 12. nóvember) var nærri meðallagi síðustu tíu ára - og á ekki að lækka mikið - strax. 

Kortið sýnir stöðuna síðdegis á laugardag. 

Lægðin sem plagar austlendinga á morgun - föstudag - er þá komin austur til Noregs - en það er nýja lægðin vestur af Bretlandseyjum sem gæti dregið með sér (eða étið) háloftakerfin tvö sem nú tefja framrás norðanloftsins til okkar. Í einhverjum skilningi er lægð þessi leifar fellibylsins Kate. 

Háloftakerfin tvö sem rætt er um er hæðarhryggur fyrir norðan land - kalda loftið kemst ekki greiðlega framhjá honum þar sem hann er - gæti kannski laumast undir - og köld háloftalægð á Grænlandshafi sem beinir lofti úr suðaustri yfir landið. Þótt þetta loft sé frekar kalt - er það ekki nærri nógu kalt til þess að teljast til vetrarsveitanna höggþungu. 

En lægðin á kortinu hér að ofan á að dýpka og valda allhvassri norðaustanátt hér á land á mánudag. 

Við skulum líka líta á 500 hPa-kortið sem gildir á sama tíma (síðdegis á laugardag).

Heimskautaröstin er hér fyrir sunnan land - og við því tæknilega í kalda loftinu - svölu haustlofti. En ef lægðin á Grænlandshafi dregst til austurs fyrir sunnan land - og hæðin eyðist gæti orðið til greið leið til suðurs yfir Ísland fyrir vetrarloftið - en ekki fyrr en í fyrsta lagi seint á þriðjudag en líklega enn seinna - og hugsanlega ekki. - En þar sem evrópureiknimiðstöðin og bandaríska veðurstofan virðast í aðalatriðum sammála um innreið vetrarins skulum við trúa - í bili - en áskiljum okkur rétt til að skipta um skoðun (við erum alltaf að því hvort eð er. 

Athugasemdir

[Torfi Stefánsson (IP-tala skráð) 13.11.2015 kl. 09:15]

Svalt haustloft? Það snjóar nú yfirleitt ekki á haustin, né að það frysti um allt land. Ég finnst því kominn tími til að hætta þessu haust-tali og sætta sig við það að veturinn sé kominn. Það er frost í kortunum eins langt og spár ná og úrkoman sem fellur verður snjór.

Hálkan á götum, gangstéttum og hjólastígum austurborgarinnar segir okkur að nú er vetur en ekki haust!

[Helga Kristjánsdóttir, 13.11.2015 kl. 14:16]

 Ónei Torfi það er sumar,sólin skýn og bræðir alla hélu.-- 

[Torfi Stefánsson (IP-tala skráð) 13.11.2015 kl. 17:20]

 Sólin skín er það ekki?

[Hilmar Hafsteinsson (IP-tala skráð) 13.11.2015 kl. 22:06]

Er hvíta vetrarlega úrkoman í Öskjuhlíðinni ekki örugglega snjór Trausti?