Hlýtt loft yfir landinu föstudag og laugardag

Mjög hlýtt loft verður yfir landinu á föstudag (16. október) og líka lengst af á laugardag. Þetta má sjá á spákorti evrópureiknimiðstöðvarinnar hér að neðan.

Kortið gildir kl. 18 á föstudag. Jafnþykktarlínur eru heildregnar, þykktin mælir hita í neðri hluta veðrahvolfs - því meiri sem hún er því hlýrra er loftið. Hámarksþykktin er yfir 5540 metrum við Austfirði. Það er alltaf spurning hversu mjög þessa hita gæti niður í mannheimum. Það fer eftir vindi og stöðugleika. Litirnir á myndinni sýna hita í 850 hPa-fletinum - sem verður um þessar mundir í um 1400 metra hæð. Hann er nærri 10 stig þar sem hann er mestur við Austfirði. Mættishitinn í 850 hPa - en við notum hann oft sem einskonar þak á mögulegan hita verður vel yfir 20 stigum. 

Landsdægurmet 16. október er 18,2 stig - og orðið býsna gamalt, frá Teigarhorni 1934. Daginn eftir, þann 17. er ríkjandi dægurmet ekki nema 17,0 stig, sett á Hólum í Hornafirði 1978. Með heppni gætu þessi met fallið - en er auðvitað ekki víst - og við verðum svosem ekki fyrir neinum sérstökum vonbrigðum þó það gerist ekki. 

Seint á laugardag fer veður kólnandi - fer alla vega langt úr seilingu við landsdægurhitamet. Svo eru sumar spár að gera ráð fyrir meiri kólnun fyrir miðja næstu viku - en jafnframt er því spáð að landið verði í lægðabraut. 

Athugasemdir

[Torfi Stefánsson (IP-tala skráð) 16.10.2015 kl. 06:22]

Sumar spár að spá "meiri kólnun fyrir miðja næstu viku"?

Mér sýnist nú Veðurstofan og Yr (sú norska) vera ansi samstíga í að spá frosti frá og með miðvikudeginum á öllu landinu.

Veðurstofan spáir snjókomu á norðanverðu landinu þegar á þriðjudaginn og um nær allt land um kvöldið.

Veturinn er sem sé að leggjast að - en vonandi ekki með neinum látum.