Hægfara

Hæð er nú yfir Grænlandi og hafinu fyrir norðan Ísland og breytingar hægar. Kortið hér að neðan gildir síðdegis á miðvikudag (24. júní) og sýnir hæð 500 hPa-flatarins og þykkt. 

Þykktin mælir hita í neðri hluta veðrahvolfs - því meiri sem hún er því hærri er hitinn. Mörkin á milli gulu og grænu litanna er við 5460 metra - en það er nærri meðallagi í síðari hluta júnímánaðar. Nú er veðrahvolfið hlýrra fyrir norðan land heldur en fyrir sunnan það. Þetta er viðsnúningur á því sem venjulegt er. 

Til gamans taldi ritstjórinn hversu algengt þetta hefur verið hér við land frá upphafi háloftaathugana 1949. Taflan hér að neðan sýnir að ástand sem þetta er mun algengara að sumarlagi heldur en að vetri.

mán		fjöldi	dg á ári
jan		17	0,25
feb		17	0,25
mar		19	0,28
apr		25	0,37
maí		71	1,06
jún		121	1,81
júl		124	1,85
ágú		84	1,25
sep		22	0,33
okt		33	0,49
nóv		24	0,36
des		17	0,25
samt		574	8,57

Það er reyndar þannig að þegar þetta gerist er það gjarnan tvo til þrjá daga í röð - tíðni atburða er því í raun heldur lægri en hér er sýnt. En taflan sýnir okkur samt vel að langalgengast er að loft sé hlýrra sunnan við land í öllum mánuðum - 28 daga af 30 í júní en það er aðeins fjórða hvert ár að svona dagur skjóti upp kollinum í janúar. Tíðni þessara „öfugsnúnu“ daga er sjö sinnum meiri í júlí en í janúar.

En aftur að kortinu að ofan. Mjög kalt er við Vestur-Noreg og öruggt að markir kvarta þar og kveina á miðvikudaginn. Hlýtt gæti hins vegar orðið í innfjörðum Grænlands og á stöku stað hér á landi þar sem sjávarloftið smeygir sér undir það hlýja. Yfir Baffinslandi er leiðinda kuldapollur sem á að þvælast um á norðurslóðum næstu daga - vonandi í öruggri fjarlægð frá okkur. 

Athugasemdir

[Hörður Þórðarson, 23.6.2015 kl. 03:55]

Takk fyrir þetta, Trausti. Mig langar til að spyja um þetta harmonie líkan sem þið notið á Íslandi. Ég sá það í þessari færslu http://trj.blog.is/blog/trj/entry/1810713/ en það er ekki hægt að skrifa athugasemdir þar lengur. Það lítur mjög fallega út. Hvað er upplausnin mikil?

Þetta er úr fjögurra kílómetra líkani sem notað er hér á Nýja Sjálandi. Þetta er úrkomu og vindaspá. Þunnu rauðu línurnar eru 200m hæðarlínur en þykku línurnar gefa til kynna að þar, og þar fyrir ofan má búast við snjó.

[Trausti Jónsson, 23.6.2015 kl. 22:30]

Sæll vertu. Lárétt upplausn harmonie-líkansins er 2,5 km net en lóðrétt eru líkanfletirnir 65, sá hæsti í 10 hPa (í um 28 km hæð). Líkanið fær jaðarupplýsingar úr rekstarlíkani evrópureiknimiðstöðvarinnar (ECMWF) á 3 klukkustunda fresti. Það er gangsett með almennri greiningu reiknimiðstöðvarinnar og eigin greiningu á 2 metra hita, raka og snjóhulu fjórum sinnum á dag. Í hvert skipti er reiknað 48 klst fram í tíma. Lesa má meira um líkanið á síðunni sem visað er til hér að neðan.

Talsvert hefur verið unnið með líkanið hér - upplýsingar um landyfirborð eru batnandi. Líkanið er farið að ná vindi og vindstrengjum nokkuð vel - hitinn gæti verið aðeins betri. Enn eru ákveðin vandræði með skúraúrkomu - hún er t.d. of lítil í útsynningi. Til stendur að stækka svæðið aðeins í haust og kemur þá í ljós hvort úrkoman batnar. 

Upplýsingar um líkanið: http://hirlam.org/index.php?option=com_content&view=article&id=65&Itemid=102

Kortin: http://brunnur.vedur.is/kort/spakort/

Skýringar við kort (ekki uppfærðar til nýjustu gerðar): http://brunnur.vedur.is/pub/trausti/kortatexti/

Alltaf gaman að kortum frá suðurhveli - takk fyrir.

hungurdiskar eru líka á fjasbók - og auðveldara að koma að skilaboðum þar: https://www.facebook.com/groups/hungurdiskar/