Ólíkir vetur - hvað snjóalög varðar

Ólíkir eru þeir bræður veturnir 2013 til 2014 og 2014 til 2015. Fyrri veturinn snjóaði gríðarmikið í fjöll á Norður- og Austurlandi - en svo hlýtt var að snjólítið var í lág- og útsveitum. Í vetur virðist hins vegar hafa snjóað meira í fjöll um landið sunnan- og vestanvert. Þótt veður hafi verið nokkuð svalara í vetur en í fyrra gætir þess lítt í snjóalögum víðast hvar á landinu - ekki þó alls staðar. Á vef Veðurstofunnar má á hverjum degi finna kort sem sýna snjódýpt á veðurstöðvum.

En það er gaman að líta á það hvernig sýndarsnjór harmonie-líkansins sýnir muninn á vetrunum tveimur. Kortið er nokkuð litskrúðugt, en skýrist sé horft á það um stund (og enn meir sé það stækkað).

Litatónar úr frá gráu um hvítt yfir í fjólublátt og blátt sýna svæði þar sem sýndarsnjór er meiri í ár en í fyrra. Tónar úr sandgulu yfir í brúnt og þaðan í grænt sýna minni snjó í ár heldur en á sama tíma í fyrra. Hafa verður í huga að nánast snjólaust var þennan dag í útsveitum á Norðausturlandi í fyrra - en nú er þar lítilsháttar snjór. 

En það sem sést fljótlega er að mun meiri snjór enn í fyrra er nú á fjöllum og jöklum sunnan í móti á landinu. Sömuleiðis á vesturhluta Vestfjarða. Aftur á móti er mun minni snjór á fjöllum á landinu norðan- og austanverðu heldur en í fyrra - sömuleiðis á norðanverðum Vestfjörðum - og allt suður á fjalllendið í kringum Gilsfjörð. Takið einnig eftir því að minni snjór virðist vera norðaustan við Mýrdalsjökul heldur en á sama tíma í fyrra - þar er líka eins konar skuggi fyrir suðvestanáttinni rétt eins og um landið norðaustanvert. 

Kortið sýnir vel hvernig ríkjandi vindáttir hafa áhrif á snjóalögin. Veturinn 2013 til 2014 var einn mesti austanáttavetur allra tíma - en sá núlíðandi hefur verið nær meðallagi - eða jafnvel í suðvestlægari kantinum. - Ætlunin er að líta á það mál síðar hér á hungurdiskum. 

En veturinn er ekki búinn. Snjór er að jafnaði ekki í hámarki á hálendinu í venjulegu árferði fyrr en seint í apríl - og enn síðar á hærri fjöllum og jöklum. Enn á eftir að bæta á snjó - hvort það verður í áframhaldandi vestlægum áttum eða þá í hefðbundnari norðaustanátt vitum við ekki. En það er ótrúlegt hvað mikið bráðnar á þeim stutta tíma sem sumarið er.