Smávegis um sumarhita á Skálafelli

Við lítum á sumarhita á Skálafelli í tilefni umræðu um skaflinn í Gunnlaugsskarði, en varla er annað að sjá en hann lifi sumarið 2014 af. 

Hitamælingar hafa verið gerðar á Skálafelli austan Esju frá því vorið 1996. Þetta er erfiður staður til veðurmælinga. Gríðarlegur vindur er algengur og auk þess oft mikil ísing. Samt er mesta furða hvað hitamælingarnar eru heillegar. Fáeinir vetrarmánuðir hafa þó dottið alveg út og stöðin var samfellt í ólagi frá því í júní 2009 þar til seint í júlí 2010. Sumur þeirra tveggja ára vantar því í mælingarnar.

Taflan hér að neðan sýnir meðalhita mánaðanna júní til ágúst (sumarh) í °C, fjölda athugana þegar hiti var meiri en 10 stig (t>10) og hitasummu ofan 10 stiga (sum>10). Klukkustund þegar hiti mælist 11 stig fær telst eitt summustig, klukkustund með 20 stiga hita fær 10 summustig. Neðst er lína með meðaltali tímabilsins.

ár	t>10	sum>10	sumarh
1996	99	146,0	5,01
1997	177	448,0	5,47
1998	104	137,4	5,81
1999	214	559,9	5,37
2000	166	356,9	5,47
2001	15	11,5	4,69
2002	111	203,7	5,20
2003	229	578,0	6,93
2004	239	1007,4	6,41
2005	148	271,2	5,38
2006	88	113,1	5,09
2007	177	235,6	6,04
2008	213	652,4	6,14
2009
2010
2011	124	167,3	5,29
2012	266	428,6	6,70
2013	156	537,9	5,10
2014	61	65,6	5,95
með	152	348,3	5,65

Hiti mánaðanna júní til ágúst 2014 var 0,3 stigum yfir meðallagi allra áranna. Aftur á móti var fjöldi athugana með hærri hita en 10 stigum ekki nema 61, 91 færri en í meðalsumri. Þetta er næstlakasta sumar tímabilsins hvað þetta varðar (2001 var enn slakara). Einnig er sérlega athyglisvert hversu lág summan er, 307,7 stigum undir meðallagi (líka næstlægst). 

Á Skálafelli var júnímánuður hlýjastur mánaðanna júní til ágúst, í Reykjavík var hann kaldastur þeirra. Júnímánuður 2014 var reyndar hlýjasti júní sem mælst hefur á Skálafelli (athuga að 2009 og 2010 vantar). Meðalhitinn var 6,2 stig.

Svo geta menn velt vöngum yfir þessum tölum og lífi Gunnlaugsskarðsskaflsins. 

Athugasemdir

[Emil Hannes Valgeirsson, 25.9.2014 kl. 00:50]

Já þetta eru mjög sérstakar tölur. Sérstaklega samanburðurinn milli 2013 og 2014.

2013 var ekki hlýtt sumar en samt er summan yfir 10 stigum þetta miklu hærri en 2014. Það má svo kannski segja um árið 2014 í heild að það hafi verið hlýtt en alveg án öfga.

[Hákon S (IP-tala skráð) 25.9.2014 kl. 16:51]

Af hverju skilgreinirðu tölurnar við 10 gráður á þennan hátt? Er það tengt einhverri formúlu um þá orku sem fer í bráðnun?

Ekki það að ég bjóði upp á einhverja betri lausn, en er hugmyndin semsagt sú að snjór bráðni hraðar um sumar sem einkennist af nokkrum heitum tímabilum frekar en sumri með sama meðalhita sem er jafnara? Og er það þá munur sem tengist hitanum beint en ekki t.d. magni sólskins? Þeas. að nota svona summu skilgreiningu gæti náð utan um aðrar breytur en hitastig sem sýna fylgni við heit tímabil, eins og meira sólskin (oftast).

[Trausti Jónsson, 25.9.2014 kl. 21:14]

Emil - já, sumarið var öfgalaust hvað hita varðar - veturinn var það líka. Hákon. Pistillinn er innlegg í umræður um skaflinn í Gunnlaugsskarði og sýnir vel hversu lítið var um mjög hlýja daga síðastliðið sumar - þrátt fyrir almenn hlýindi og mjög háan meðalhita. Talan 10 stig er valin til að sýna þetta. Það er ekkert sérstakt sem gerist í bráðnun nákvæmlega við þessa tölu. Reyndar var dæmið reiknað fyrir fleiri tölur. En mjög sólarlítið var í Esjunni í sumar - og tel ég að sólskin í júní og júlí ráði miklu ásamt hitanum - og fleira reyndar. Það er ekki mjög mikið mál að setja upp mælitölur sem tækju tillit til annarra ráðandi afkomuþátta. Gaman væri ef einhver reyndi það - en gallinn er hins vegar sá að mælingar skortir á skaflinum um lengri tíma til að kvarða slíkt líkan.